Erimiyaasi 5 - Kafa Linguistics Project

Yerusaalemichi Xuꞌo

¹ “Dayinnetoona nalliibeeti, ibere mooyonoo qaawiibeeti ashoon, danemmo ittoshi tunegaata, Yerusaalemi gommona okk hach shaꞌebote; xiishi ciinote; bi addibaaboochoo qaawibote; ittoshi danegaata, Yerusaalemin maaremmo taane.

² ‘Beeyechi Doono Yeeri beege’ ii boonoshi wogeebeeto kootooniye” iye.

³ Doono Yeero, ibere mooyon qaawiibeeto neene; boonoshin naxehine; tunebaani aaxxiyaaneenaꞌone; boonoshin yiikkehine; tunebaani ne waan wottemmon qajjiyeete. Boonoshi baroon shiishee xaqqoyee beshoon kupphiiheete; gondoochee wottemmonoo qajjiyeete.

⁴ Aroocheenoo ishichiyo: “Doono Yeerichi gommon, boonoshi Nuggishoochi sheeroonoo ariyaaneenaꞌo boonoshi tunetoyich, iberoochaa ebi girechinaꞌo mullaalleenaꞌone.

⁵ Ogoogeenaꞌo waan hamiree, boonoshich gettemmo taane; Doono Yeerichi gommon, boonoshi Nuggishoochi sheeroonoo, ariyemminaꞌone” iyo. Tunebaani boonoshi bulliyoo kicaa ikkeenaꞌone; boonoshiyoo waanjoon tiichitinaꞌone; cuyoonoo kuxxitinaꞌone.

⁶ Boonoshi axaaxoo bi woddetoyich, Yeerinoo boonoshi qajjitoyich, daaheroo kubboochee keyiree boonoshin tiichemmone; barahee okeroo boonoshin kuutemmone; maahoo boonoshi katemooch ottemmone; aroochee kechiibeeto bullin yangixxemmone.

⁷ “Taan qajjiyote; nuggisheenaꞌo tuneyaaneenaꞌona wogehote; ittoshin ta michiitoyee gubb shunoo maahote; yahechinaꞌo kexoochoo kiceehote. Ebich ittoshin ta maaremmo aabichireeshiye?

⁸ Shiimeeti hareshoommon tuneheete; boonoshi ikkikkoona boonoshi nuucheenaꞌochi mecheenaꞌon qaawiyeete.

⁹ Ebiyoommi mooyoyich boonoshin naxoo qayote? Ebiyoommi macceenaꞌo toommooch nichoon kichoon qayote?” iye Doono Yeeri.

¹⁰ “Boonoshi woyinee bechee daggooch giyiree duubiibote; tunebaani ciroona aalliyaahote; Doono Yeericho tuno boonoshi qajjitoyich bi ateenaꞌon hoꞌote;

¹¹ Israꞌeeleenaꞌonaa Yihudee asheenaꞌona, ciroona taach gibeneyaaneenaꞌo tunetinaꞌone” iye Doono Yeeri.

¹² Doono Yeeri toommooch koottiꞌi ishichiyeete: “Aroo amoonolla tuniyaachemmone; gonde mooyo no toommooch waataachemmone; shaacoon woyee goraadoon beegaachemmo noone.

¹³ Doono Yeerichi qaaro boonoshi waan aallo bi tunetoyich, keemechinaꞌo keemmiibeeto yongoommo tunemmone; ebi boonoshi gettito boonoshi toommooch tunemmone” iyeete.

¹⁴ Ebich Beshe Mawe Nuggishoo Doono Yeeri ishichiye: “Asheenaꞌo ebin boonoshi gettitoyich, ta qaaroon ne noonoochaa qaaqqoommon, hini asheenaꞌonoo mixoommon tuniyemmo taane; qaaqqoo boonoshin maayemmone.

¹⁵ “Israꞌeelee kechi asheenaꞌote, wohi showoochee aageteenaꞌon ittoshi toommooch deebemmo taane” iye Doono Yeeri. “Eboshiyoo giidechinaꞌo, wonneechinaꞌo, boonoshi yibbaatoon ittoshi ariyaaneenaꞌonaa amoon boonoshi gettiibeeto gaata, shalligoon ittoshi hakkaaneenaꞌonane.

¹⁶ Boonoshi shangee gonenoo haawutteti maashoommone; boonoshi bulliyona ginee anaaminaꞌone.

¹⁷ Budeexi ne maayoonaa kexeexi ne maayoonon, maa aalliyemminaꞌone; ne anaami bushiisheenaꞌonaa ne maache bushiisheenaꞌonon wuxemminaꞌone; ne bageenaꞌonaa ne miiminaꞌonon bashi maayemminaꞌone; ne woyinoonaa ne balaasoonon aalliyemminaꞌone; ne gibenaabeeti manje ne katemeenaꞌon happi, asheenaꞌon goraadoona wuxemminaꞌone” iye.

¹⁸ Doono Yeeri ishichiye: “Tunebaani are yemeenoocholla tunetaa, ciroona ittoshin aalliyaachemmo taane.

¹⁹ Ittoshi asheenaꞌo ‘No Nuggishoo Doono Yeeri amoyich ebi bulli mooyon no toommooch tuniihe’ boonoshi getigaata, newoo boonoshich ‘Taan ittoshi qayoommon, ittoshi showoochaa bara nuggisheenaꞌoyich ittoshi goyinnoommon, ebiyoommon ittoshicho tuneyaani showoochaa bare asheenaꞌoyich hajjeyemmo ittoshine’ itone gettemmo neene” iye.

Yeerichi Asheenaꞌoyich Icheti Meqqeqqoo

^20-22 Doono Yeeri ishichiye: “Yaaqobi kexoochaa ebin getote; Yihudee showoochaa ebin awaajjibote: Hini aafo beetaa ciinaani, waamo beetaanoo waayeyaani yeexere, wottoo shalligaalli asheenaꞌote, ebin waayebote: Amoyich taan shataachote? Ta aafoochaanoo amoyich keqqii qeweyaachote? Aaco besheyaachemmoyich qacoon baharee gashoona shuuraani gaagemo tuniyaꞌa geddeti Nuggishoo taane; aayo bi tiyitaanona tiichii beshoon hakkaache; bi goohitaanona besheyaache.

²³ Tunebaani ta asho ittoshich babbere wottoo hukkechi mullo beetone; ta gommon qajjiꞌi badd hammito ittoshine.

²⁴ “Ittoshiyoo ‘Batti batti amiyonaa digeni amiyonon nooch dichiibeeti, marehoon bi gooroona nooch deebiibeeti, no Nuggishoo Doono Yeerin shatone’ getaano ittoshine.

²⁵ Eboshin ittoshi xuꞌo ittoshi waanee echiitone; ittoshi axaaxoo ebi deꞌe mooyinaꞌon ittoshich mucciitone.

²⁶ “Ta asheenaꞌo daggooch gonde asheenaꞌo beetinaꞌone; dabbechochoommon ottiyeete; shaachoon shaachiꞌi asheenaꞌon kambeheete.

²⁷ Asho kafoon yechiꞌi guubooch ceechoommon dawushiꞌi boonoshi daneti mooyona boonoshi kexon ceechitinaꞌone; ebin tuniyoona gaannechinaꞌonaa arichetinaꞌona tuneheete.

²⁸ Aangitinaꞌone; awujjiinoo itinaꞌone; boonoshi gondo oogichii beshitone. Nihaalloochi dayinnetoyich neexeyaacheete; girechinaꞌochi taggoonoo taggeyaacheete.

²⁹ “Ta, Doono Yeeri ebi mooyinaꞌoyich boonoshin nax bedaachote? Ebiyoommi aageteenaꞌo toommooch, ta qelloona nichoon kichiya bedaachote?

³⁰ Keqqichiti wone mooyo showee toommooch tunetone:

³¹ Keemechinaꞌo kootoon keemmiyeete; qeesheenaꞌoo keemechinaꞌo kocoona qeejjiyeete; ta asheenaꞌoo ebiyoommi mooyon shunniyeete; tunebaani ebi moochi ciirooba amooniye boonoshi tunemmo?” iye.