Erimiyaasi 49 - Kafa Linguistics ProjectAmooni Toommooch Nalleyemmi Nalloo 1 Amoonee asheenaꞌon ciinnii beetona Doono Yeeri ishichiye: “Israꞌeelich anaami bushiishoo aalloone? Woyee woraasho aalloone? Amoyich Milikoomich goyinneebeeti asheenaꞌo Gaadi yoodeenaꞌon yookkiꞌi bi katemeenaꞌon woraashiyeete? 2 Ebich Amoonee asheenaꞌochi katemoo tuneti Raabi toommooch kokkoree qaaroon ta waayiyemmi aabo woyemmone” iye Doono Yeeri. “Buriceechi gutoo tunemmone; bi gafeenaꞌoo qaaqqoona miccemminaꞌone; Israꞌeeliyoo biin woraashitinaꞌon woraashemmone” iye Doono Yeeri. 3 “Heshiboni asheenaꞌote! Aayi katemoo happeetoyich biich eefote; Raabi katemeexi maacheenaꞌote! Milikoomi, bi qeesheenaꞌonaa bi ukkireenaꞌona ikkittinoona kecceyemminaꞌo boonoshi tunetoyich eefote; dookoon taheree eefote; uxeree daggooch gaawaagaawebote. 4 ‘Taan kocha ta waan woyemmo konine?’ iyaꞌa ne gaannoon gibenaabeeti hini gibeneyaanoocho, ne bamboona, maayo ceenniti ne bamboona ne yebeneebeeto amoyichiye? 5 Ne guudoona beetinaꞌo bulli waanee keqqoon ne toommooch deebemmo taane, iye Beshe Mawe Nuggishoo Doono Yeeri. Ittoshi ikkikkoona ittoshi aafooch beeti xaaꞌeenaꞌooch yookkeyemmo ittoshine; maxxee beetinaꞌon kicemmo aalloone. 6 “Tunebaani aroyee gubb Amooni yareenaꞌochi kecoon wochemmo taane” iye Doono Yeeri. Edoomi Toommooch Nalleyemmi Nalloo 7 Edoomichon Beshe Mawe Doono Yeeri ishichiye: “Temaani katemooch ariyoo aalloone? Shalligechinaꞌo waanee ciico aalletone? Boonoshi ariyoo ciiretone? 8 Biin ta naxemmi Esayichi aalloon bi toommooch ta deebemmi aabo tunetoyich, Dedaani katemooch kotetinaꞌote, gubb wotte wociree xaqqee gofooch kotebote. 9 Woyinee macechinaꞌo ne waan boonoshi waagaata, giishechoon echiyaacheheete? Gaayeenaꞌo xumoona boonoshi waagaata, boonoshi gaajjemmo boonoshich qaawiton baach toone? 10 Tunebaani ta, Esayin shokkaachoon echiihoye; aashoon bi hakkaachemmoyich, bi aashe xaaꞌeenaꞌon gaxxiyoye; bi bushiisheenaꞌo, bi maneenaꞌo, bi giyeenaꞌo aalletinaꞌone; biyoo beetaachemmone. 11 Ittoshi daggooch beeti nihaalli bushiisheenaꞌon qayote; kashoona boonoshi beeyemmoyich tuniyemmo taane; ittoshi xuumeenaꞌoo taan gibenebeete” iye. 12 Ebich Doono Yeeri ishichiye: “Xuuxee xoofoon uch bedaani asheenaꞌo giidoona uchemminaꞌo boonoshi tunegaata, ittoshi uyaanoon ittoshi echemmo aabichireeshiye? Uyishalli ittoshi gettemmo naxoochee echeyaachemmo ittoshine. 13 Botsiri wuche getteyemmo, naaggeyemmo, qixeyemmonaa ufo tunemmona bi tunoon taanna wogehoye, iye Doono Yeeri. Bi katemeenaꞌoo bulli aaboon shokkoon echemminaꞌone” iye. 14 Doono Yeer waanee ikke wochoon waayeto taane; “Edoomin koyoyich kiceebote; koyoochoo tibote” gettemmi wocheyecho aageteenaꞌo daggooch wocheetone. 15 “Ebiyoche aageteenaꞌo daggooch giishecho, asheenaꞌo daggoochoo hoxeeto, neen tuniyemmo taane. 16 Manje xaqqee daggooch kotetocho, guudi cilloon yechetocho, ne shattiyoonaa ne mullee geecoona neen dawushitone. Booyochoommon ne kexon ne hashakkaayiteenona, aroochee neen kindiyemmo taane” iye Doono Yeeri. 17 “Edoomi wuche getteyemmone; aroona besheebeeto bulli wuche gettemmone; bi toommooch shaggiti naxoyich bulli bi toommooch cooqqiremmone. 18 Sodoomi, Gomoorinaa boonoshi guudoona beeti katemeenaꞌonochi toommooch shaggitoommo Edoomi toommooch shaggemmone; koniyoona arooch koteyaachemmone; asho arooch beetaachemmone” iye Doono Yeeri. 19 “Daaheroo Yoordaanoosi dunne shaaroochee bageenaꞌochi gaddooch bi womoommon, diqqoona waaree boonoshi showoochee boonoshin yookkemmo taane; ta kaacceton boonoshi toommooch ukkiriyemmo taane. Taanoommo konine? Taan echoon hakkemmo konine? Ta aafooch neexoon hakkemmi wulloo konine? 20 Ebich Doono Yeeri ta, Edoomi toommooch tuniiya ta itonaa Temaani katemooch beetinaꞌo toommooch ta gabiti gaboonon waayebote: Gijjeenaꞌoochee bagee gaggereenaꞌolla geecheyemminaꞌone; boonoshi dogo shokkoon echemmone. 21 Boonoshi dihee qaaroochee tiyitona showoo shuuremmone; boonoshi eeppi qaaro Ceelle baharooch beddaahaa waayeyemmone. 22 Ebiyoche booyochoommon keyi biittemmone; bi qoshoonoo Botsiri toommooch yaggemmone; Edoomi ginee naayinaꞌo mulloo ebiyooba maaxoo manjeti maachechi mulloochoommon shattemmone” iye. Damaasiqi Toommooch Nalleyemmi Nalloo 23 “Damaasiqi katemeechon gonde mooyon boonoshi waayetoyich, Hamaatinaa Arifaadina geewitinaꞌone; keqqoonoo ciiretinaꞌone; shiwureebeeti baharoochoommon waagwaagiyemminaꞌone. 24 Damaasiqee katemoo niretone; wocoyichoo gubb wottetone; qewo biin yechitone; maaxoo manjeti maachechoommon xuuxoonaa maaxoona biin yechitone. 25 Emirikkiti katemoo, aricheti katemoo aabichiꞌi duppehe? 26 Ebich bi gurimaasheenaꞌo bi addibaabooch dihemminaꞌone; ebiyooba bi ginee naayinaꞌo bulla aallemminaꞌone” iye Beshe Mawe Doono Yeeri. 27 “Damaasiqi katemee uxerooch qaaqqoon tuchemmo taane; qaaqqoo Been Hadaadichi taatee kexon michemmone” iye. Qedaarinaa Hatsoorinochi Toommooch Nalleyemmi Nalloo 28 Baabloonee taatoo Nabukadinatsori kochiti Qedaaree showoonaa Hatsoori taatittineechonon Doono Yeeri ishichiye: “Tibote, Qedaaree showoon koyote! Aabi-keyo waani ashoon aalliibote! 29 Boonoshi duukkaanoonaa boonoshi gijjeenaꞌona daammeyemminaꞌone; boonoshi maccillaateenaꞌonaa boonoshi qiico bullina, boonoshi gaaleenaꞌoo boonoshi kishoochee daammeyemminaꞌone; ‘Guudo bulliich keqqoo beetone’ geti cookemminaꞌone. 30 “Baabloonee taatoo Nabukadinatsori ittoshi toommooch bi koceetoyich, ittoshin kocha bi gabitoyich Hatsoor beetinaꞌote, wohooch wocote; xaqqee gofee maac kotebote” iye Doono Yeeri. 31 “Tibote, keqqaalloon diggoona beeti ashoon koyote” iye Doono Yeeri. “Kelloonaa tuggoona aalloon bi ikkeeto koteꞌi beeton koyote. 32 Boonoshi gaaleenaꞌo boggeyemminaꞌone; boonoshi meeti gijjeenaꞌo kecceyemminaꞌone; boonoshi qelloon qebbii beetinaꞌon yongee toommooch shaccemmo taane; boonoshi daaro bulliichee aalloon boonoshi toommooch deebemmo taane” iye Doono Yeeri. 33 “Hatsoori boqqelleenaꞌo beeyi xaaꞌoon tunemmone; bulli aabooch shokkoon echemmone; asho arooch beetaachemmone; asho arooch koteyaachemmone” iye. Elaami Toommooch Nalleyemmi Nalloo 34 Yihudee taatoo Sedeqiyaasichi batti batti taatee yemeenooch Elaamichon Doono Yeeri keemechi Erimiyaasich gettiti qaaro: 35 Beshe Mawe Doono Yeeri ishichiye: “Elaamichi hakkee dego tuneti bi maꞌoon tiichemmo taane. 36 Awudde shimaajji tuggoochee Elaami toommooch awudde yongeenaꞌon deebemmo taane; ebi awudde yongeenaꞌoochoo bi asheenaꞌon shaccemmo taane; Elaamee showoochee yookketinaꞌo shagaani aagetoo daneyaachemmone. 37 Boonoshi etteenaꞌonaa boonoshi kashoon qaawii beetinaꞌonochi aafoochaa Elaamee showeexi asheenaꞌon keqqichemmo taane; boonoshi toommooch gonde mooyon ebiyoo kupphe ta kaaroon deebemmo taane, iye Doono Yeeri. Boonoshin ta aalliimmi wottoon goraadoon boonoshi hillooch daachiyemmo taane. 38 Ta taatee qeenon Elaamee showooch kotiyemmo taane; aroochee taatoonaa bi ukkireenaꞌonon aalliyemmo taane” iye Doono Yeeri. 39 “Tunebaani gubbi yemeenooch Elaamee showee kecoon wochemmo taane” iye Doono Yeeri. |
SIM International, 2020.