Erimiyaasi 48 - Kafa Linguistics Project

Moꞌabi Toommooch Nalleyemmi Nalloo

¹ Moꞌabee showeechon Israꞌeelee Nuggishoo, Beshe Mawe Doono Yeeri ishichiye: “Neebi katemoo tiishemmo bi tunetoyich biich woowo! Qiriyatayimi katemoo yeellemmone; yecheshoo gettemmone; manje bi mishigo tiishemmone; bi asho yeellemmone.

² Ebiyee bekk Moꞌabichi oogo beetaachemmone; Heshibonaa asheenaꞌo ‘Ittoshi waataa, aagetoon bi tuneyaachemmoyich biin aalliibone’ gettemminaꞌone. Bi toommooch gondoon gabemminaꞌone; Madimeeni katemoocho! Cicirikkiyemmo neene; goraado neen yookkemmone.

³ Happeyeechi, billimii aalleechi cookee qaaroon Horonayimee waayebote.

⁴ Moꞌabee showoo tiishetone; bi bushiisheenaꞌo eefeheete.

⁵ Deshee damba eefibee Luhiit kechemminaꞌone; shaggiti aalloyich cookibee Horonayimi dugilloon kindemminaꞌone.

⁶ Hushoona aalleree ittoshi kashoon wodiibote; baraheexi kuroommon tunebote.

⁷ Ittoshi hakkoonaa ittoshi gaannoonon ittoshi gibenetoyich, ittoshiyoo kecceyemmo ittoshine; Kemooshiyoo bi qeesheenaꞌonaa bi iraasheenaꞌona tookki kecaa hammemmone.

⁸ Doono Yeeri gettitoommon aalliyecho katemoo bulliich woyemmone; ikke katemmolla muricaachemmone; bamboo aallemmone; gaddoo duubemmone.

⁹ Biiti bi muriccemmoyich Moꞌabich qoshoon imbote; bi katemeenaꞌoo arooch koteto aalli shokkoon tunemminaꞌone” iye.

¹⁰ Doono Yeerichi shuunoon, beeneebee shuuneebeeto uppeton tunebe; bi goraadoonoo damee ukkoochee bajjiibeeto, uppeton tunebe.

Moꞌabee Katemeenaꞌo Tiisho

¹¹ “Moꞌabi, woyinee uyee dechiich koteti shicoommone; bi bushittinoochee tiijjiꞌi maggoone; qiicoochee qiicooch woneyaanoone; kecceꞌinoo hamaanoone; ebich bi shaawo bacceyaanoone; bi cinnoo baraanoone.

^12-13 Ebich biin woniyemmi ashoon bi waan ta deejjemmi aabo waa beetone; bi gaaneenaꞌon shokkoon echiyemmone; baareteenaꞌonoo tiichemmone. Israꞌeeleenaꞌo boonoshi gibeneebeeti Beeteelina boonoshi yeelloommon, Moꞌabeenaꞌoo Kemooshina yeellemminaꞌone” iye Doono Yeeri.

¹⁴ “Ittoshi aabichiꞌi, ‘Hakkecho noone; koyoochaanoo giidecho noone’ iyote?

¹⁵ Moꞌabi tiishetone; bi katemeenaꞌo kochee aalletinaꞌone; kaacceti boonoshi gurimaasheenaꞌoo guureya kinditinaꞌone” iye bi shigo Beshe Mawe Doono Yeeri getteebeeti Taatoo.

¹⁶ “Moꞌabichi tiisho katinnitone; bi iritoo kaate shaggemmone.

¹⁷ Bi guudoona beeti ittoshi bullinaa bi shigoon ariibeeti ittoshi bullina ‘Kupphe taatittinee hakkoo, taatittinee giidoo tiishetoche!’ getiree biich eefote.

¹⁸ “Moꞌabin aalliyemmo ittoshi toommooch bi waatoyich, manje ittoshi katemeenaꞌon aalliyemmo bi tunetoyich Diibooni katemooch beetinaꞌote, ittoshi oogee xaaꞌoochee desh kindibote; butte showooch kotebote.

¹⁹ Aroꞌeer beetinaꞌote, gommi gashooch neexaachi ciinote! Woccii beetonaa muriccaa beetinon ‘Amo shaggiye?’ geti echebote.

²⁰ Moꞌabi bi happeyoona yeelletone; woowo, geti cookibote; Moꞌabi tiisheto tunoon Arinooni aacoochaa yibbaatebote.

²¹ “Naqqe showooch beeti katemeenaꞌo Holooni, Yahitsaahi, Mefaati,

²² Diibooni, Neebi, Beet Dibilatayimi,

²³ Qiriyatayimi, Beet Gamuuli, Beet Meꞌooni,

²⁴ Qiriyootinaa Botsirinochi toommooch, wohonaa katinoonooch beeti Moꞌabee katemoo bulli toommoochoo nalloo waatone.

²⁵ Moꞌabichi qaro xooꞌetone; bi mochoo hollitone, iye Doono Yeeri.

Moꞌabi Cooneyoo

²⁶ “Doono Yeeri ta toommooch bi geecitoyich Moꞌabin mashiibote; bi cooyee toommoochoo gederebe; cooneebe.

²⁷ Israꞌeeli neenna hoxeyaanoone? Biichon ne yibbaatemmi haddoona ne qelloon qeeqqeraa ne beeto gaayeenaꞌo daggoochee bi yechetenane?

²⁸ “Moꞌabee showooch kotetinaꞌote, katemeenaꞌon qayiree xaqqee guudooch kotebote; bambee noonooch bi kexon haggaabeeti daabbicheyoommon tunebote.

²⁹ Oogichiꞌi Moꞌabi geecoon, bi yebenoon, kaama bi ciixoon, bi coonderoon, bi miyonoo waayeto noone.

³⁰ Bi hoxoon ariibeeto taane, iye Doono Yeeri. Bi coonderoonaa bi shuunoona duuboone.

³¹ Ebich Moꞌabich eeppemmo taane; Moꞌabee asho bullich uukkemmo taane; Qiir Hareseti asheenaꞌoyich eeppemmo taane.

³² Sibimi woyinoocho! Yazeerich ta eeppetoyee beshoon neech eeppehoye; ne ateenaꞌo baharoon kimmiꞌi Yazeeri baharooch beddaahaa shaggitinaꞌone; aalliyecho gaangiti ne michi aafoonaa ne woyinoonochi toommooch waatone.

³³ Qeemo tuneti Moꞌabee showoochee wucwuconaa emiroona aalletone; woyinee uyo oppoochee bi keyaachemmoyich tuniito taane; duuchecho ililoona duushaachemmone; cookee qaaro waayeetaanolla aroo ililoo toonoone.

³⁴ “Heshiboninaa Elaleehina eefeheete; boonoshi qaaroo Yahaats beddaahaa waayeehe; Tsoꞌaree Horonayiminaa Egilaat Shelishiyinooch beddaahaa waayeehe; Nimiriimi aacoo tahemmone.

³⁵ Geppeexi goyinnee xaaꞌoochaa deejjoon giddii beeton, bi nuggishoyich ixaanoon shookkii beeton Moꞌabee showoochee aalliyemmo taane, iye Doono Yeeri.

³⁶ “Boonoshi kiciti gaanno bi aalletoyich Moꞌabee asheenaꞌonaa Qiir Hareseti asheenaꞌonoyich shumburoona eeppii beetinaꞌochoommon shooshemmo taane.

³⁷ Bullichi qello cakkemmone; ishaanoo maachemmone; kishoo kocheyemmone; shimetoo dookoon eddemmone.

³⁸ Koniyoona aaxxiyaani qiicoochoommon Moꞌabin ta tiichetoyich, bi kechi toommeexi kexo bulli toommooch, bi addibaabooch, bulli xaaꞌooch, eefoani beeto, bare mooyo aalloone” iye Doono Yeeri.

³⁹ “Aabichii tiishehe! Aabichii eeppiye! Aabichii yeelleꞌi gubboon wochiye! Moꞌabi bi guudoona beeto bullina cooneetone; keqqooch tunetone” iye.

⁴⁰ Ebich Doono Yeeri ishichiye: “Etto booyochoommon bi toommooch yoobi kindemmone; bi qoshoonoo Moꞌabi toommooch yaggemmone.

⁴¹ Katemeenaꞌonaa mishigeenaꞌona yecheyemminaꞌone; Moꞌabi ginee naayinaꞌo mullo, maaxoo manjeti maachechi mulloochoommon shattemmone.

⁴² Moꞌabi Doono Yeeri toommooch bi geecitoyich aallemmone; ebiyee bekkoo aagetoon tuneyaachemmone.

⁴³ Moꞌabee showooch beeti asheenaꞌote, keqqoo, oppoonaa shaachoona ittoshi aaf beetone” iye Doono Yeeri.

⁴⁴ “Boonoshi toommooch naxo woyemmi natooch ebi mooyinaꞌon Moꞌabi toommooch deebemmo ta tunetoyich, keqqoochee muriccimmo oppooch dihemmone; oppoochee kechimmoo shaachooch yecheyemmone, iye Doono Yeeri.

⁴⁵ “Xuupphitinaꞌo hakkoo guuteeꞌi Heshiboni yiirooch neexetinaꞌone; ebiyoo Heshibonee qaaqqoo, Sihoonee qaaqqee aaxxo kechiꞌi, Moꞌabichi baroon, koyi shunnechinaꞌochi shimboonoo bi maatoyichiye.

⁴⁶ Ne anaami bushiisheenaꞌonaa ne maache bushiisheenaꞌona kecaa boonoshi hammitoyich, Moꞌabo, neech woowo! Kemooshich goyinneebeeti asho aalletone.

⁴⁷ “Tunebaani ciiree yemeenooch Moꞌabichi kecoon wochemmo taane, iye Doono Yeeri” iye. Moꞌabi toommooch maacheti nalloo ebi wottoone.