Erimiyaasi 44 - Kafa Linguistics Project

Gibits Beeti Israꞌeeleenaꞌoyich Getteeti Qaaro

¹ Gibitsee showooch beeti Migidool, Xafinaasinaa Memifisi katemeenaꞌooch, wotta Phaxiroosee showoochoo beeti Ayihudeenaꞌon ciinnii beetona Erimiyaasich Doono Yeeri ishichiye:

² “Israꞌeelee Nuggishoo, Beshe Mawe Doono Yeeri ishichiye: Yerusaaleminaa Yihudee katemeenaꞌonochi toommooch ta deebeti gonde mooyo bullin beeggito ittoshine; hanaach beddaahaa eboshi happeeꞌi echetinaꞌone; arooch kotemmo ikkolla aalloone.

³ Ebi tuneto ebi katemeenaꞌooch beebee echeti asheenaꞌo ta kaaroon boodoyich, boonoshi tuniiti gondoyichiye; boonoshiyoo tunebeeta ittoshi, ittoshi qaabbechinaꞌoo ariyaani bare nuggisheenaꞌoyich ixaanoon shoohonaa goyinnoonoyich hammiyeete.

⁴ Ta shixxaabeeti ciigiiti mooyon boonoshi tuniyaachemmoyich wochii wochii boonoshi waan keemechi ta guuninaꞌon daachiihoye.

⁵ Tunebaani boonoshi waamon gaꞌii ellee waayeyaaneenaꞌone; bare nuggisheenaꞌoyich ixaanee shoohona boonoshi shuune beeti gondoocheenoo wotteyaaneenaꞌone.

⁶ Ebich ta neboonaa ta kaaroona kindiye; Yihudee katemeenaꞌonaa Yerusaalemi gomminaꞌonooch aaxxehe; hanaach ittoshi beeggii beetoommon happeetinaꞌone; shokkoonoo echetinaꞌone.

⁷ “Andoo Israꞌeelee Nuggishoo, Beshe Mawe Doono Yeeri ishichiye: Yihudee asheenaꞌoochee curo echeyaachemmoyich, anaamonaa maacheenon, bushiisheenaꞌonaa gaggereenaꞌonon, ittoshi daggoochee aalliyoyich, ebi ooge gonde mooyon ittoshi toommooch ittoshi tuniibeeto amoyichiye?

⁸ Ittoshin aalliyoyich, showee toommeexi aageteenaꞌo daggoochaa wuche, ittoshi getteyemmonaa naaggeyemmonoyich, beeya ittoshi waati Gibitsaa bare nuggisheenaꞌoyich ixaanoon shoohona, ittoshi kishee shuunoona ta kaaremmoyich ittoshi tuniibeeto amoyichiye?

⁹ Iberoochaa Yihudee showoonaa Yerusaalemi addibaaboonoochaa boonoshi tuniiti ittoshi qaabbechinaꞌochi gondoon, Yihudee taateenaꞌochi gondoon, boonoshi mecheenaꞌochi gondoon, ittoshi gondoon, ittoshi mecheenaꞌochi gondoon battetote?

¹⁰ Hanaach beddaahaa boonoshi qelloon giishiyaaneenaꞌone; shataaneenaꞌone; ittoshinaa ittoshi qaabbechinaꞌonochi aafooch ta kotiiti qociyoona hamaaneenaꞌone.

¹¹ “Ebich Israꞌeelee Nuggishoo, Beshe Mawe Doono Yeeri ishichiye: Yihudee asho bullin aalliyoyich ta aafoon ittoshi toommooch gondiyemmo taane.

¹² Gibits hami aroochoo kotoyich maacciti Yihudee cureenaꞌo aallemmoyich tuniyemmo taane; bulliyona aalleminaꞌone; Gibitsee showooch dihemminaꞌone. Goraadoona, shaacoonoo aallemminaꞌone; giishoochee oogooch beddaahaa, goraadoona, shaacoonoo qitemminaꞌone; shixxeyemminaꞌone; wuche getteyemminaꞌone; maxxaareyemminaꞌone; naaggeyemminaꞌone.

¹³ Yerusaalemin ta naxoommon, Gibits beetinaꞌon goraadoona, shaacoona, biiyoonoo naxemmo taane.

¹⁴ Gibitsee showooch kotoyich hammiti, Yihudee cureenaꞌoochee muriccemmo woyee wodemmo, boonoshi qaatiibeeti Yihudee showooch kotoyich wottemmo, koniyoona aalloone; yookketi giishecheenaꞌoyee besh koniyoona muricaachemmone” iye.

¹⁵ Boonoshi mecheenaꞌo bare nuggisheenaꞌoyich ixaanoon shoohon ariibeeti doonjeenaꞌo bulli, arooch neexeti maacheenaꞌo bulli, Gibitsee showooch beeti Phaxiroos koteti Israꞌeeleenaꞌooch beddaahaa ooge kicoo tuneꞌi, Erimiyaasich ishichiyeete:

¹⁶ “Doono Yeeri shigoona nooch ne getteti qaaroon waayeyaachone.

¹⁷ Tunebaani noonnaa no qaabbechinaꞌona, no taateenaꞌonaa no ukkireenaꞌona, Yihudee katemeenaꞌonaa Yerusaaleminoochaa tuniyaabee no echetoommon, shimaajji taateyich, ixaanoon shoohonaa uyee buuroon ukkoonoyich, no noonoochee kechiti qaaro bullin tuniyemmo noone; ebin no tunii beehooba koshon michaa beemmo noone; noochoo gaawee beehe; gonde mooyon beegaano noone.

¹⁸ Tunebaani shimaajji taateyich ixaanee shoohon, uyee buuroon ukkoonoo no qajjetoyee hach, bulli mooyona iriteeto noone; goraadoona, shaacoonoo ciireto noone” iyeete.

¹⁹ Maacheenaꞌoo daakkiꞌi “Shimaajji taateyich ixaanoon no shookkehoobinaa uyee buuroon no ukkiyoobina, bi misiloon yechiti koshon no kachiitonaa uyee buuroon no ukkitona no keneenaꞌo ariyaanooniye?” iyeete.

²⁰ Aroochee Erimiyaasi ebin biich wochiti asho bullich, anaaminaꞌonaa maacheenaꞌonoyich ishichiꞌi wochiye:

²¹ “Ittoshinaa ittoshi qaabbechinaꞌona, ittoshi taateenaꞌonaa ittoshi ukkireenaꞌona, showee asheenaꞌoo, Yihudee katemeenaꞌonaa Yerusaalemi gomminaꞌonoochaa ixaanoon ittoshi shookkiton, Doono Yeeri gabaachehe? Woyee bi mullooch tiphimaachehe?

²² Doono Yeeri ittoshi gonde shuunoonaa ittoshi tuniiti eeꞌe mooyonon haaꞌiyoon hakkaanoone; ebich ittoshi showoo shokkaachoonaa amolla aalloona tune echemmone; wuche, getteyemmone; maxxaareyemmone; hanaach tunetoommonoo ashaalloon tunemmone.

²³ Ixaanoon ittoshi shokkitoyich, Doono Yeerin ittoshi xuqqitoyich, Doono Yeerichi qaaroyich deꞌa geto ittoshi qajjitoyich, bi sheeroona, bi qociyoona, bi getoonoo hamo ittoshi qajjitoyich, and ittoshi beeggii beetoommon, gonde mooyo ittoshi toommooch waatone” iye.

²⁴ Erimiyaasi asho bullinaa maachoo bullinoyich ishichiye: “Gibits beeti Yihudee asheenaꞌote, bulla Doono Yeerichi qaaroon waayebote.

²⁵ Israꞌeelee Nuggishoo, Beshe Mawe Doono Yeeri ishichiye: Ittoshinaa ittoshi mecheenaꞌona ittoshi noonoona ‘Shimaajji taateyich ixaanoon shoohonaa uyee buuroon ukkoonoyich no mookketon ceechemmo noone’ ittoshi iton ceechito ittoshine. Illa ittoshi mookkoon kupphiibote; ittoshi mookkoon ceechibote!

²⁶ Gibits koteti Yihudee asheenaꞌote, ebich Doono Yeerichi qaaroon waayebote; Doono Yeeri ishichiye: Gibits koteti Yihudee asho bulli ebiyee bekk ta shigoona ‘Beeyechi Nuggishoo Doono Yeeri beege’ geti bi wogeyaachemmoyich ooge ta shigoona wogeto taane.

²⁷ Deꞌoyich tuneyaanoon gondoyich boonoshin ciinnemmo taane; Gibits beeti Yihudee asheenaꞌo bulla aallemmooch beddaahaa goraadoona, shaacoonoo ciiremminaꞌone.

²⁸ Goraadoochee muriciree Yihudee showooch wottemminaꞌo giishecheenaꞌone; arooch kotoyich Gibits giyiti Yihudee cureenaꞌo ta qaaroonaa boonoshi qaaroonoochee konicho ceennemmo gaata ariyemminaꞌone.

²⁹ “Ittoshi toommooch deebemmo taane ta ito ceennemmo bi tunoon ittoshi ariyemmoyich, hini xaaꞌoochaa ittoshin naxemmo ta tunoyich ebi ittoshich malletoo tunebe:

³⁰ Yihudee taatoo Sedeqiyaasin, biin wuxiya qaawiti bi etto tuneti Baabloonee taatoo Nabukadinatsorich beshiyaꞌa ta imoommon, Gibitsee taatoo Farooni Hofiirin, biin wuxiya qaawiibeeti bi etteenaꞌoyich beshiiree immemmo taane, iye Doono Yeeri” iye.