Erimiyaasi 43 - Kafa Linguistics Project

Erimiyaasin Asheenaꞌo Gibits Daamo

¹ Boonoshi Nuggishoo Doono Yeeri boonoshich deejjiti, boonoshi Nuggishoo Doono Yeerichi qaaro bullin, Erimiyaasi asho bullich gettii bi ciichitoyee gubb,

² Hoshaayichi bushoo Azariyaasi, Qareehi bushoo Yohanaaninaa geecechi asheenaꞌo bullina Erimiyaasich ishichiyeete: “Koottaaniye ne beeto; ‘Arooch beemoyich Gibits hammaahote’ gete iꞌi Doono Yeeri neen deejjaanoone.

³ Tunebaani Neraayichi bushoo Baaruukine Baabloonee asheenaꞌo noon wuxemmoyich, Baabloonee showooch noon keci boonoshi daammemmoyich boonoshi kishooch noon beshii ne immemmoyich, neen shuurikkito” iyeete.

⁴ Ebich Qareehi bushoo Yohanaani, ginee naayinaꞌochi iraasheenaꞌo bullinaa asho bullina, Yihudee showooch kotoyich Doono Yeeri qaaroyich deꞌa getaaneenaꞌone.

⁵ Tunebaani Qareehi bushoo Yohanaaninaa ginee naayinaꞌochi iraasheenaꞌo bullina, boonoshi yookketi aagetoo bulliichee Yihudee showooch koteya waati Yihudee cureenaꞌo bullin,

⁶ anaaminaꞌon, maacheenaꞌon, bushiisheenaꞌon, taatoochi maache bushiisheenaꞌon, quyee naayinaꞌochi iraashoo Naabuzaridaani Shafaani bushoochi bushoo, Ahiqaamichi bushoo Gedaliyichi kishooch bi echiiti asheenaꞌo bullin, keemechi Erimiyaasinaa Neraayichi bushoo Baaruukinon daammiyeete.

⁷ Doono Yeerichi qaaroyich deꞌa geto boonoshi qajjitoyich, Gibits hammiyeete; Xafinaasi katemooch shaggiyeete.

⁸ Xafinaasi katemoochaa Doono Yeeri Erimiyaasich ishichiye:

⁹ “Ne kishoona ogooge xaqqeenaꞌon daamiree Yihudee asheenaꞌo ciini beetaa, Xafinaasi katemooch beeti taatee kechi gimi kellooch, nuuqqoona shuuneeti godee dech ebi xaqqeenaꞌon duuhe.

¹⁰ Boonoshichoo ishichibe: Israꞌeelee Nuggishoo, Beshe Mawe Doono Yeeri ishichiye: ‘Ta guuno tuneti Baabloonee taatoo Nabukadinatsorin wochiiree deebemmo taane; biyoo bi taatee qeenon ebi duukketi xaqqee toommooch kotiyemmone; bi taatee duukkaanoonoo aree toommooch xogemmone.

¹¹ Waaree Gibitsee showoon yexxemmone; qitooch maachetinaꞌon qitooch, kecceyooch maachetinaꞌon kecooch, goraadoyich maachetinaꞌon goraadooch beshiiree immemmone.

¹² Biyoo Gibitsee nuggisheenaꞌo kexinaꞌooch qaaqqoon tuchemmone; michemmone; boonoshi nuggisheenaꞌon keci daammemmone; qiddoo daroon bi xappoommon Gibitsee showoon biichooch daakkemmone; boonoshi waanee diggoona kechemmone.

¹³ Gibits beeti Heliyopolisi katemeexi xaqqee giimbeenaꞌon tiichemmone; Gibitsee nuggisheenaꞌo kexinaꞌooch qaaqqoon tuchemmone’ itone gete” iye.