Erimiyaasi 42 - Kafa Linguistics Project

Boonoshich Bi Corootemmoyich Erimiyaasin Asheenaꞌo Echo

¹ Ginee naayinaꞌochi iraasheenaꞌo bulli, Qareehi bushoo Yohanaani, Hoshaayichi bushoo Azariyaasinaa giishoochee oogooch beddaahaa beeti asho bullina waaheete.

² Giddeꞌinoo keemechi Erimiyaasich ishichiyeete: “No qollaa beeton ne tuniyemmoyich neen qollehone: Ne Nuggishoo Doono Yeer waan nooch corootibe; hini curo bullich corootibe. Ne beeggaa beetoommon, meetoochee giishecho echeto noone;

³ ne Nuggishoo Doono Yeeri no hammemmi gommonaa no shuunemmonon nooch bi bekkiyemmoyich nooch corootibe” iyeete.

⁴ Keemechi Erimiyaasiyoo boonoshich ishichiye: “Waayeto taane; ittoshi echetoommon ittoshi Nuggishoo Doono Yeer waan corootemmo taane; Doono Yeeri wochimmo amoonolla ittoshich gettemmo taane; ittoshich aachaachemmo taane” iye.

⁵ Aroochee Erimiyaasich ishichiyeete: “Ne Nuggishoo Doono Yeeri neenna no waan bi deejjimmi qaaro bulliyoommona tuniyoo no qayigaata, Doono Yeeri no toommooch iberoonaa gibeneeti miixoona tunebe.

⁶ No Nuggishoo Doono Yeerichi qaaroyich deꞌa no getaa nooch bi kaamemmoyich, gondebe woyee gaawebe neen no wochaabeeti no Nuggishoo Doono Yeerichi qaaroyich deꞌa gettemmo noone” iyeete.

Erimiyaasichi Corootoyich Yeeri Wochiti Wochoo

⁷ Aashire qemoyee gubb, Doono Yeeri Erimiyaasich gettiye.

⁸ Aroochee Erimiyaasi Qareehi bushoo Yohanaanin, biinna tookkii beeti ginee naayinaꞌochi iraasheenaꞌo bullin, giishoochee oogooch beddaahaa beeti asho bullin ceekkiiꞌi

⁹ boonoshich ishichiye: “Bi aafooch ittoshi qolloon ta giddiyemmoyich taan ittoshi wocheti Israꞌeelee Nuggishoo Doono Yeeri ishichiye:

¹⁰ ‘Ittoshi toommooch ta deebeti gonde mooyoyich ta ayinitoyich hini showooch ittoshi beegaata, ittoshi diccemmonalli ittoshi happeyemmon tuniyaache; ittoshin bechishalli ta gettemmo waaxaachemmo taane.

¹¹ Ittoshi shattiibeeti Baabloonee taatoon shattaahote; ittoshin wodiyoyich, bi kishoochee ittoshin kichoyich, ta ittoshina tookki tunemmo ta tunetoyich, biin shattaahote, iye Doono Yeeri.

¹² Ta ittoshich ariqqemmo taane; biyoo ittoshich ariqqeree ittoshi hajjee showooch ittoshi beeyemmoyich tuniyemmone’ iye.

¹³ “Tunebaani ittoshi ‘No hini showooch koteyaachone’ ittoshi getigaata, ittoshi Nuggishoo Doono Yeerichi qaaroon waayo ittoshi qayigaata,

¹⁴ ‘Tuneyaache; koyoon no beegaachemmi, shametee qaaroon no waayeyaachemmi, no shaaceyaachemmi Gibits hammemmo noone; aroochoo kotemmo noone’ ittoshi getigaata,

¹⁵ Yihudee cureenaꞌote, and illa Doono Yeerichi qaaroon waayebote. Israꞌeelee Nuggishoo Beshe Mawe Doono Yeeri ishichiye: ‘Gibits gimoyich, aroochoo kotoyich ittoshi aafoon ittoshi wochigaata,

¹⁶ ittoshi shattiibeeti goraado are Gibitsaa ittoshin danemmone; bi naboona ittoshi keqqiibeeti shaacoo are Gibitsaa ittoshi toommooch shaggemmone; aroochaanoo qitemmo ittoshine.

¹⁷ Gibits giyiꞌi aroochoo kotoyich, maacciti asheenaꞌo toommooch ebi tunemmone: Goraadoona, shaacoona, biiyoona qitemminaꞌone; ta deebemmi gonde mooyoochee koniyoona echeyaachemmone; koniyoona muricaachemmone’ iye.

¹⁸ Israꞌeelee Nuggishoo, Beshe Mawe Doono Yeeri ishichiye: ‘Ta kaaroonaa ta neboona Yerusaalem beetinaꞌo toommooch bi kindoommon, Gibits ittoshi giyiyooba ittoshi toommooch kindemmone. Upeyemmo ittoshine; wuche, getteyemmo ittoshine; ufoyich tunemmo ittoshine; cooneyemmo ittoshine; hini showoonoo wochinnoon beegaachemmo ittoshine’ iye.

¹⁹ “Yihudee cureenaꞌote, Doono Yeeri ittoshin ‘Gibits hammaahote’ itone; hanaach ittoshich kupphiyaꞌa ta geton xiishi ariibote.

²⁰ ‘No Nuggishoo Doono Yeer waan nooch corootibe; no Nuggishoo Doono Yeeri neech gettimmon nooch gete; nowoo tuniyemmo noone’ iꞌi ittoshi Nuggishoo Doono Yeer waan taan ittoshi wochetoyich, wochii ittoshi qelloon dawushito ittoshine.

²¹ Tawoo hanaach ebin ittoshich getteto taane; tunebaani ittoshi, ittoshich ta gettemmoyich taan bi deejjiti amee mooyonona ittoshi Nuggishoo Doono Yeerich deꞌa getaano ittoshine.

²² And hammii kotoyich ittoshi shunniibeeti showoochaa goraadoona, shaacoona, biiyoonoo qitemmo ittoshi tunoon xiishi ariibote” iye.