Erimiyaasi 41 - Kafa Linguistics Project

¹ Aroobee natoobee shabattinnee agenooba, taatee yaroonaa taatoochi katini ginee iraasheenaꞌoochee ikkoo tuneti Elishami bushoo, Netaani bushoo Ishmaꞌeeli aashire asheenaꞌona tookkii Mitsipha, Ahiqaamichi bushoo Gedaliy waan waahe; are Mitsiphaa koshon tookkiꞌi maabee,

² Netaani bushoo Ishmaꞌeelinaa biinna tookkii beeti aashire asheenaꞌona tiyiꞌi, showee toommooch Baabloonee taatoo iraashiiti, Shafaanichi bushoo, Ahiqaamichi bushoo Gedaliyin goraadoona wuxiyeete.

³ Ishmaꞌeeli Gedaliyina tookkii Mitsipha beeti Ayihudo bullinaa arooch daneti Baabloonee ginee naayinaꞌo bullinon wuxiye.

⁴ Gedaliyin bi wuxiti decharooba koniyoona ebi mooyon ariyaan beetaa,

⁵ shinne asheenaꞌo boonoshi ishaanoon cakkeꞌi, boonoshi tahoon keexxiꞌi, boonoshi achoonoo gariꞌi, Shekeemi katemoochee, Shiloohi katemoochee, Shamaari katemoochee, maayi buuroonaa ixaanoonon yechiꞌi Doono Yeerichi yaafee kexooch giddiyoyich waaheete.

⁶ Netaani bushoo Ishmaꞌeeli Mitsiphee kechii eeppiibee boonoshin daneya waahe. Boonoshina daneꞌi boonoshich, “Ahiqaamichi bushoo Gedaliy waan wobote” iye.

⁷ Katemee maac boonoshi waahaa; Netaani bushoo Ishmaꞌeelinaa biinna tookkii beeti asheenaꞌona boonoshin wuxiyeete; oppoochoo duppiyeete.

⁸ Tunebaani boonoshi daggooch beeti aashire asheenaꞌo Ishmaꞌeelich ishichiyeete: “Budooch no aachiti teepphoo, sheqoo, zayitoonaa eeyona beeto bi tunetoyich noon wuxiyaahine” iyeete; biyoo boonoshin qajjiye; bareenaꞌona tookkii boonoshin wuxaanoone.

⁹ Ishmaꞌeeli bi wuxiiti asheenaꞌochi dubenoon bi duppiti ooge oppo, Aasi Israꞌeelee taatoo Baꞌaashina bi koyehooba bi iichiiti aachi oppoone; Netaani bushoo Ishmaꞌeeliyoo aroon dubenoona ceechiye.

¹⁰ Ishmaꞌeeli Mitsipha beeti asheenaꞌochi curo bullin, quyee naayinaꞌochi iraashoo Naabuzaridaani Ahiqaamichi bushoo Gedaliyich quyiiti taatoochi maache bushiisheenaꞌonaa echeꞌi Mitsipha beeti asho bullinon kecciye; Netaani bushoo Ishmaꞌeeli kecciꞌi Amoonee showooch kimma tiyiye.

¹¹ Qareehi bushoo Yohanaaninaa biinna tookkii beeti ginee naayinaꞌochi ukkireenaꞌo bullina Netaani bushoo Ishmaꞌeeli shuuneti gonde mooyo bullin waayeꞌi,

¹² Netaani bushoo Ishmaꞌeelina koyeya boonoshi anaaminaꞌo bullin yechiꞌi hammiyeete; Gibeꞌooni katemooch beeti ooge aachi gashoochaanoo daneheete.

¹³ Ishmaꞌeelina tookkii beeti asho bulli, Qareehi bushoo Yohanaaninaa biinna tookkii beeti ginee naayinaꞌochi ukkireenaꞌonon beeggiꞌi emiriyeete.

¹⁴ Ebina Ishmaꞌeeli Mitsiphee kecciti macceenaꞌo bulla gubb wotteheete; Qareehi bushoo Yohanaan waanoo hammiyeete.

¹⁵ Tunebaani Netaani bushoo Ishmaꞌeeli shimitte asheenaꞌona tookkii Yohanaani kishoochee muricciꞌi, Amoonee showooch hammiye.

¹⁶ Qareehi bushoo Yohanaaninaa biinna tookkii beeti ginee naayinaꞌochi ukkireenaꞌona, Netaani bushoo Ishmaꞌeeli Ahiqaamichi bushoo Gedaliyin Mitsiphaa bi wuxitoyee gubb, Mitsiphee keccii bi daammiti eche asheenaꞌo bullin wochiyeete; Yohanaani wochii deebiti eboshiyoo, ginee naayinaꞌo, maacheenaꞌo, bushiisheenaꞌonaa taatee kechi iraasheenaꞌone.

¹⁷ Boonoshiyoo Gibits hamoyich boonoshi gabitoyich aroochee tiyii hammiꞌi, Beetilehemi gaꞌooch beeti Geruut Kimiham kasheheete;

¹⁸ ebiyoo Baabloonee taatoo bi showee toommooch bi ukkiriiti Ahiqaamichi bushoo Gedaliyin Ishmaꞌeeli wuxitoyich, Baabloonee asheenaꞌon shattiꞌiniye.