Erimiyaasi 40 - Kafa Linguistics Project

Erimiyaasi Gedaliyina Tookkii Koto

¹ Yerusaaleminaa Yihudee showoonoochee Baabloonee showooch kecaa hammii beetinaꞌona tookkii sansalatoona biin cuchii bi daamiyooba, quyee naayinaꞌochi iraashoo Naabuzaridaani Raamaa Erimiyaasin bi biichitoyee gubb, Doono Yeeri bi qaaroona Erimiyaasich gettiye.

² Quyee naayinaꞌochi iraashoo Erimiyaasin daammiꞌi biich ishichiye: “Ne Nuggishoo Doono Yeeri ebi gonde mooyon hini xaaꞌooch awaajjitone;

³ ebi naxoonoo Doono Yeeri deebitone; bi gettitoommonoo tuniitone; Doono Yeeri toommooch axaaxoon ittoshi shuunetonaa bi qaaroyich deꞌa geto ittoshi qajjitonoyich, ebi mooyo ittoshi toommooch tunetone.

⁴ Ne kishooch beeti sansalatoochee neen hanaach biicheto taane; gaaweton shaahiꞌi neech bi bekkegaata, taanna tookki Baabloonee showooch hambe; gaawichiree neen heetemmo taane; tunebaani Baabloonee showooch hamo gondoon tuneꞌi neech bi bekkegaata, woyaahine; ebeege, showoo bulli ne aafooch beetone; ne gaboochaa neech gaawemmonaa neen emirikkimmonooch hambe” iye.

⁵ Erimiyaasi batt gubb wotteyaan bi beetaa, Naabuzaridaani daakkiꞌi, “Baabloonee taatoo, Yihudee katemeenaꞌo toommooch ukkiriiti, biyoo Shafaanichi bushoo, Ahiqaamichi bushoo Gedaliy waan wottebe; biinna tookki asheenaꞌo daggoochoo kotebe; woyee ne gaboochaa hamoyich kaamoo tunemmo aabiichona hambe” iye. Ebina quyee naayinaꞌochi iraashoo shohoonaa wojjoonon immiꞌi daachiihe.

⁶ Aroochee Erimiyaasi Ahiqaamichi bushoo Gedaliyi beetooch, Mitsipha, hammiye; biinna tookkii are showooch echeti asheenaꞌo daggooch kotehe.

Gedaliyi Wuxeyoo

⁷ Kishoo imaani ginee iraasheenaꞌonaa ginee naayinaꞌo bullina, Ahiqaamichi bushoo Gedaliyin Baabloonee taatoo showee toommooch, Baabloonee showooch kecaa hamaani showee toommeexi girechi anaaminaꞌochi, maacheenaꞌonaa bushiisheenaꞌonochi toommoochoo bi ukkiriyoon waayeꞌi,

⁸ Netaani bushoo Ishmaꞌeeli, Qareehi bushoo Yohanaaninaa Yonaataanina, Tanihumeti bushoo Seraayi, Nexoofee asho Efaayichi bushiisheenaꞌo, Maꞌakee asho Yezaaniyi, boonoshinaa boonoshi ginee naayinaꞌona Gedaliy waan Mitsipha waaheete.

⁹ Shafaanichi bushoo, Ahiqaamichi bushoo Gedaliyi boonoshinaa boonoshi ginee naayinaꞌonoyich ishichiꞌi wogoon giyihe: “Baabloonee asheenaꞌoyich maddoyich shattaahote; hini showooch kotebote; Baabloonee taatoyich maddibote. Ebin ittoshi tuniigaata ittoshich diggoo tunemmone;

¹⁰ tawoo, no waan woyemmi Baabloonee asheenaꞌo aafooch ittoshi qoodooch neexoyich Mitsipha kotemmo taane; tunebaani ittoshi woyinoon, manjeebeeti michi aafoonaa zayitoonon kicibote; ittoshi qiicoochoo gedote; ittoshi yechiti katemoochoo kotebote” iye.

¹¹ Moꞌabee showooch, Amoonee asheenaꞌo daggooch, Edoomee showoonaa showoo bullinooch beeti Ayihudeenaꞌo bulli Baabloonee taatoo Ayihudee cureenaꞌon echiyoon, Shafaanichi bushoo Ahiqaamichi bushoo Gedaliyin boonoshi toommooch bi ukkiriyoon waayeꞌi,

¹² bulla boonoshi yookketoochee wotteheete; Yihudee showooch, Gedaliyi beetooch Mitsipha waaheete; woyinoonaa manjeebeeti michi aafoonon woddii kiciyeete.

¹³ Qareehi bushoo Yohanaaninaa gaddooch beeti ginee naayinaꞌochi ukkireenaꞌo bullina Gedaliy waan Mitsipha waaꞌi

¹⁴ biich ishichiyeete: “Amoonee asheenaꞌo taatoo Baꞌaalisi neen wuxoyich Netaani bushoo Ishmaꞌeelin bi deejjoon arii beetine?” iyeete. Tunebaani Ahiqaamichi bushoo Gedaliyi boonoshin iberiyaanoone.

¹⁵ “Hamiree, koniyoona ariyaanoon Netaani bushoo Ishmaꞌeelin wuxibone; ne waan kiceeti Ayihudo bulli shacemmoyich, Yihudee curo dooggemmoyich, ne kashoon bi kichemmo amoyichiye?” iꞌi Qareehi bushoo Yohanaani aashoona Gedaliyich Mitsiphaa gettiye.

¹⁶ Tunebaani Ahiqaamichi bushoo Gedaliyi, Qareehi bushoo Yohanaanich ishichiye: “Ishmaꞌeelichon ne gettaabeeto kooto bi tunetoyich ebi mooyon tuniyaahine” iye.