Erimiyaasi 4 - Kafa Linguistics Project

Gondoochee Wotteechi Ceego

¹ Doono Yeeri ishichiye: “Israꞌeelo! Ne wottemmo gaata, ta waan wottebe. Ciigiiti mooyon ta aafoochee ne wokkiigaata, yallyallimoon ne qayigaata,

² ‘Beeyechi Doono Yeeri beege’ iyaꞌa iberoona, dayinnetoona, cadiqoonoo ne wogegaata, aageteenaꞌo taanna diireyemminaꞌone; taannoo yebenemminaꞌone” iye.

³ Doono Yeeri Yihudee asheenaꞌonaa Yerusaalemi beeyechinaꞌonoyich ishichii beetone: “Gocheyaanoon qeyiti showoon goyote; angichi daggooch ittoshi yaroon shookkaahote;

⁴ Yihudee asheenaꞌonaa Yerusaalemi beeyechinaꞌonote! Ittoshi gonde shuunoyich koniyoona takkoon hakkaachemmi ta kaaro qaaqqoochoommon aaxxemmo bi tunetoyich, ittoshi mulloon dokireeree, Doono Yeeri taach hajjeebote.

Yihudin Kocha Ettee Womo

⁵ “Yihudee showoonaa Yerusaaleminoochaa awaajjibote! Showoo bulliichoo shametoon hugote! Oogichishoo cookibee: ‘Ittoshi waataa kiceeree manje katemeenaꞌooch wocone’ getote!

⁶ Dambi-waanee gonde mooyonaa oogeti aalloonon deebemmo ta tunetoyich, Tsiyoon waan malletoon tiijjiree mallibote; wocote; yagiyaahote!

⁷ Daaheroo dunne shaaroochee kechitone; aageteenaꞌon aalliyemmo tiyitone; Yihudee showoon shokko echiyoyich bi xaaꞌoochee kechitone; ne katemeenaꞌoo tiisheree ashaalleenaꞌo tunemminaꞌone.

⁸ Doono Yeerichi kupphe kaaro, no waanee wottoo bi qajjitoyich, dookoon tahebote; eefebote; woowo, getote” iye.

⁹ Doono Yeeri ishichiye: “Ebiyooba taatoonaa iraashoonochi mullo muujjemmone; qeesheenaꞌo qewemminaꞌone; keemechinaꞌoo keqqemminaꞌone” iye.

¹⁰ Tawoo “Nuggishoo Doono Yeero, goraado boonoshi hawooch qojjeechaa, ‘Ittoshich diggoo tunemmone’ iyaꞌa hini ashoonaa Yerusaaleminon amoyich oogichii dawushinne?” iyo.

¹¹ Ebiyooba hini ashoonaa Yerusaaleminoyich ishicheyemmone: “Woqqoyich woyee xalliyoyich tuneyaanoon michiibeeti yongo barahooch beeti hulloo tuneti geppeenaꞌoochee ta asho waan yongemmone.

¹² Giidechi yongo ta getoona boonoshi toommooch woyemmone; ebi nalloon boonoshi toommooch gettaabeeto taane” iye.

Yihudee Showoo Ettoona Giicheyoo

¹³ Ebiyoche etto quboochoommon woyemmone; bi gaarinaꞌoo yubee yongoomminaꞌone; bi haresheenaꞌo booyoyee beshe afaafinechinaꞌone. Nooch woowo, aalleto noone!

¹⁴ Yerusaaleme, ne wodemmoyich ne mulloon gonde mooyoochee mayi xalliibe. Ne gonde gaboo ne waan bi beeyemmo aati wottooniye?

¹⁵ Daani katemoochee qaaro waayee beetone; geppechi showoo Efreemee gonde mooyo aawaajjee beetone.

¹⁶ “Etto wohi showoochee Yihudee katemeenaꞌo toommooch cookeebee waabeeto bi tunoon aageteenaꞌoyich arichiibote; Yerusaalemichoo getote.

¹⁷ Ta toommooch hukkoon boonoshi tiijjitoyich budeexi maayoon quyeebeeti asheenaꞌochoommon Yerusaalemin giichemminaꞌone” iye Doono Yeeri.

¹⁸ “Ne shaaddoonaa ne shuunoona ebin ne toommooch shakkiitone; ebi ne gondo mulloon tiichemmi oogeti magge caame mooyon ne toommooch deebitone” iye.

Erimiyaasi Bi Asheenaꞌoyich Eefo

¹⁹ Ye ta xuuxo! Ye ta xuuxo! Biiyoona qaferehoye. Ye ta mullo! Ta mullo maacaa qicciye; shametee qaaroonaa, kokkoree qaaroonon ta waayetoyich cikkoon hakkaache.

²⁰ Naxee hillooch naxo dabbiye; showoo bulli tiishee aallehe; ta duukkaanoo diqqoona, ta maccillaatoo qillifee yexx bedaan beetaa, aalletone.

²¹ Baanderoon ta ciini beeyemmo, shametee qaaroon ta waaye beeyemmo, aati wottooniye?

²² Doono Yeeri ishichiye: “Ta asheenaꞌo taan boonoshi ariyee qayona mullaalleenaꞌone; gabaalli bushiisheenaꞌone; shalligoo boonoshich aalloone; gondoon shuunoona arichetinaꞌone; tunebaani gaawe shuunoon shuuno ariyaaneenaꞌone” iye.

Erimiyaasi Yaaꞌoona Aallee Womon Beego

²³ Showee toommooch ciinneho; ebiyoche xafoonaa amaalli hulloonane; shimaayoon ciinneho; bekko arooch aalle.

²⁴ Guudinaꞌon ciinneho; ebiyoche qewee beetinaꞌone; geppeenaꞌoo okk hach shuuriyeete.

²⁵ Ciinnaa ta iyaa, ebiyoche arooch asho aalle; shimaajji kafeenaꞌoo biittii aalletinaꞌone.

²⁶ Ciinnaa ta iyaa, qeemi showoo barahoo tunetone; katemeenaꞌo bulla Doono Yeeri aafoochee, kupphe bi kaaroochee tiyitona happeetinaꞌone.

²⁷ Doono Yeeri ishichiye: “Showoo bulli shokkoon echemmone; tunebaani ciichiree aalliyaachemmo taane.

²⁸ Ebich showoo eeppemmone; shimaayoo bi toommooch manderemmone. Getteto taane; ta gaboon shaddaachemmo taane; maacceto taane; kisheyaachemmo taane” iye.

²⁹ Hareshechinaꞌonaa shangechinaꞌonochi qaaroochee tiyitona, katemoo bulli goojjemmone; dunne shaarooch giyemmone; echeenaꞌo xaqqee guudooch kechemminaꞌone; katemoo bulli shokko echemmone; arooch kotemmi asho aallemmone.

³⁰ Hini aallooch beddeti Yerusaaleme! Amooniye ne tunaabeeto? Ceelle tahoon ne taho, aachee tahoona ne cocoo, ne aafooch huutoon ne huuto, ne achoonoo ne shiimo duuboone. Ne shunechinaꞌo neen hoxetinaꞌone; ne kashoonoo qaawii beetinaꞌone.

³¹ Maaxoo manjeti, batti batti bushoon shiya maaceraabeeti maachechi qaaroommi qaaroon waayehoye; ebiyoo Tsiyooni kashee guuteyee qaaroone; bi kishoon yaggiichaa “Taach woowo! Ashoon wuxii beetinaꞌo aafooch mullo baalleeti taane” ii beetine.