Erimiyaasi 39 - Kafa Linguistics Project

Yerusaalemi Yecho

¹ Yihudee taatoo Sedeqiyaasi taateti yiixiyinnee natoobee aashirinnee agenooch Baabloonee taatoo Nabukadinatsorinaa bi ginee naayinaꞌo bullina waaꞌi Yerusaalemin kocha giichiyeete.

² Sedeqiyaasi taateti aaraa ikkinnee natooba, awuddinnee agenee yiixiyinnee qemooba katemee uxeroo gaakkeehe.

³ Yerusaalem yecheehooba Baabloonee taatoochi iraashoo bulli, eboshiyoo, Nerigal Sharetseeri, Samigaar Neebi, ginee iraashoo Sarisekiiminaa bare Nerigal Sharetseerina Baabloonee taatoochi eche iraasheenaꞌona tookkii giyiꞌi Daggi Kellooch koteheete.

⁴ Yihudee taatoo Sedeqiyaasinaa bi ginee naayinaꞌo bullina boonoshin beeggiꞌi, woceheete; xumoona taatoochi becheenaꞌo beetona, gutte uxeree daggooch beeti kelloona katemoochee kechiꞌi Yoordaanoosi bamboo waan hammiyeete.

⁵ Baabloonee taatoochi ginee naayinaꞌo boonoshin yookkii dabbiyeete; Yaarikee gaddoochaa Sedeqiyaasin dabbii yechiyeete; yechiꞌinoo Hamaatee showooch beeti, Ribila, Baabloonee taatoo Nabukadinatsor waan deebiyeete. Biyoo Sedeqiyaasi toommooch nalliye.

⁶ Baabloonee taatoo Ribilaa Sedeqiyaasichi bushiisheenaꞌon bi aafoochaa wuxiye; wottoo Baabloonee taatoo Yihudee showeexi ogoogeenaꞌon wuxiye.

⁷ Sedeqiyaasichi aafoonoo qoqenee kichiye; Baabloonee showooch daamoyich sansalatoona cuchiye.

⁸ Baabloonee asheenaꞌoo taatee kexonaa asheenaꞌo kexinaꞌonon qaaqqoona michiyeete; Yerusaalemi katemee uxeroonoo happiyeete.

⁹ Taatoo quyee naayinaꞌochi iraashoo Naabuzaridaani katemooch echeti ashoon, biich kishoo immiti asheenaꞌon, echeti ashi cureenaꞌon Baabloonee showooch keccii daammiye.

¹⁰ Tunebaani hucigumbe girechinaꞌon, Yihudee showooch echiihe; woyinee budonaa goyoonon ebiyooba boonoshich immiye.

Erimiyaasi Biicheyoo

¹¹ Erimiyaasichon Baabloonee taatoo Nabukadinatsori, quyee naayinaꞌochi iraashoo Naabuzaridaanich ishichiꞌi gettiye:

¹² “Daamiree gaawichi quyebe; bi qaawiibeeti mooyon biich tuniiballi gonde mooyon tuniyaahine” iye.

¹³ Ebich quyee naayinaꞌochi iraashoo Naabuzaridaani, ginee iraashoo Nebushazibaani, Nerigal Sharetseerinaa Baabloonee taatoochi iraasheenaꞌo bullina

¹⁴ kellechinaꞌochi addibaaboochee Erimiyaasin wochiiꞌi deebiyeete. Bi kexooch biin bi bechemmoyich, Shafaanichi bushoo Ahiqaamichi bushoo Gedaliyich immiyeete. Ebina Erimiyaasi bi asheenaꞌo daggooch kotehe.

Ebeedmeleekich Gibenikkeeti Gibeno

¹⁵ Erimiyaasi kellechinaꞌochi addibaabooch cucheꞌi bi beetaa Doono Yeeri bi qaaroona biich ishichiye:

¹⁶ “Hamiree Topphiyee asho Ebeedmeleekich ishichi gete: ‘Israꞌeelee Nuggishoo, Beshe Mawe Doono Yeeri ishichiye: Hini katemee toommooch deꞌoon tuneyaanoon gondoon deebemmo taane; ebiyooba ne aafoochaa ebi mooyo ceennemmone.

¹⁷ Tunebaani ebiyooba ta, neen wodiyemmo taane, iye Doono Yeeri. Ne shattaabeeti asheenaꞌo kishooch beshiitaa icheyaachemmo neene.

¹⁸ Neen wodiyemmo taane; taan ne gibenetoyich kashoona muriccemmo neene; goraadoona qitaachemmo neene itone’ gete” iye.