Erimiyaasi 38 - Kafa Linguistics Project

Oppooch Erimiyaasi Duppeyoo

¹ Mataanichi bushoo Shefaxiyi, Fashuurichi bushoo Gedaliyi, Shelemaayichi bushoo Yukaalinaa Malikiyichi bushoo Fashuurina Erimiyaasi asheenaꞌo bullich ishichiꞌi bi gettiti qaaroon waayeheete.

² “Doono Yeeri ishichiye: ‘Hini katemooch echemmo goraadoona, shaacoonaa biiyoona qitemmone; tunebaani Baablooneenaꞌoyich kishoon immimmo kashoona beeyemmone; kashoona beeyemmone; ginoochee muriciree kashoonoo beeyemmone’

³ Doono Yeeri ishichiye: ‘Iberoochaa hini katemoo Baabloonee taatoo ginee naayinaꞌo kishooch beshiitaa ichemmone; biyoo yechemmone’ itone” iye.

⁴ Aroochee iraasheenaꞌo taatoyich ishichiyeete: “Ebiyoommi qaaroon getona hini katemooch echeti ginee naayinaꞌochi mochoon, asheenaꞌo bullichi mochoon, bi nirii beetoyich, ebi uro qitibe; ebiyoo ebi uro hini asheenaꞌoyich gonde mooyonalli deꞌoon qaawaano bi tunetoyichiye” iyeete.

⁵ Aroochee taatoo Sedeqiyaasi ishichiye: “Bi beeto ittoshi kishoochiye; taatoo bayon hakkaachemmone” iye.

⁶ Ebina Erimiyaasin daammiyeete; kellechinaꞌochi addibaabooch beeti, taatoochi bushoo Malikiyichi aachi oppooch woderoona desh kindiiꞌi duppiyeete; oppooch dengo baachalli beeto aaco aalloone; Erimiyaasiyoo dengoona qoochehe.

⁷ Taatee kexooch beeti, Topphiyee asho tuneti guruusho Ebeedmeleeki Erimiyaasin oppooch boonoshi dufon waayehe. Ebiyooba taatoo Biiniyaami Kellooch koteꞌiniye bi beeto.

⁸ Ebeedmeleeki taatee kexoochee kechii hammiꞌi taatoyich ishichiye:

⁹ “Taatoo ta doonocho, hini asheenaꞌo keemechi Erimiyaasin oppooch dufona boonoshi tuniito bulli gonde mooyone; wotta katemooch beeti kosho ciiretoyich, aroochaa shaacoona qitemmone” iye.

¹⁰ Topphiyee asho Ebeedmeleekich taatoo ishichiye: “Neenna tookki shaashe asheenaꞌon daambe; keemechi Erimiyaasin qitaan bi beetaa oppoochee kichibe” iye.

¹¹ Ebina Ebeedmeleeki asheenaꞌon biinna tookkii yechii taatee kechi qiicee kexoyee desh beeti gatooch hammiye; aroochee geene butoonaa kuxe tahoonon deebiye; ebinoo woderoona Erimiyaasich oppooch daachiihe.

¹² Aroochee Topphiyee asho Ebeedmeleeki Erimiyaasich ishichiye: “Ebi geene butoonaa kuxe tahoonon ne shoopphoonaa woderoonochi gutte daggooch gede” iye; Erimiyaasiyoo geddiye.

¹³ Erimiyaasinoo woderoona geechiyeete; oppoocheenoo kichiyeete; Erimiyaasiyoo kellechinaꞌochi addibaabooch kotee beehe.

Sedeqiyaasi Ciicoon Erimiyaas Waanee Echo

¹⁴ Taatoo Sedeqiyaasi keemechi Erimiyaasin wochiiꞌi Doono Yeerichi yaafee kechi keejjinnee kellooch deebiye. Erimiyaasich taatoo ishichiye: “Ikke mooyon neen echemmo taane; amoonolla taach aachiyaahine” iye.

¹⁵ Erimiyaasi Sedeqiyaasich ishichiye: “Neech ta getigaata, iberoochaa taan wuxaachenne? Ta ciicenoo waayeyaachemmo neene” iye.

¹⁶ Aroochee taatoo Sedeqiyaasi “Kashoon nooch immiti beeyechi Doono Yeeri beege! Neen wuxaachemmo taane; ne kashoon qaawiibeeti, ebi asheenaꞌo kishooch beshiiree imaachemmo taane” iꞌi Erimiyaasich aashoona wogehe.

¹⁷ Erimiyaasiyoo Sedeqiyaasich: “Israꞌeelee Nuggishoo, Beshe Mawe Doono Yeeri ishichiye: ‘Baabloonee taatoochi ginee iraasheenaꞌoyich kishoon ne imigaata, ne kasho muriccemmone; hini katemoo qaaqqoona micaachemmone; neennaa ne kechi asheenaꞌona kashoona beeyemmo ittoshine.

¹⁸ Tunebaani Baabloonee ginee iraasheenaꞌoyich kishoon imo ne qayigaata, hini katemoo Baabloonee asheenaꞌoyich beshiitaa ichemmone; boonoshiyoo qaaqqoona michemminaꞌone; newoo boonoshi kishoochee muricaachemmo neene’ itone” iye.

¹⁹ Taatoo Sedeqiyaasi Erimiyaasich ishichiye: “Baablooneenaꞌoyich kishoon immiti Ayihudeenaꞌoyich taan beshii immemminaꞌone; boonoshiyoo ta kashoona kaachemminaꞌone iyaꞌa shattoye” iye.

²⁰ Erimiyaasi ishichiye: “Boonoshich beshiitaa icheyaachemmo neene; neech ta gettemmi Doono Yeerichi qaaroyich deꞌa gete; neech diggoo tunemmone; ne kasho muriccemmone.

²¹ Tunebaani kishoo imo ne qayigaata, Doono Yeeri taach bekkiiti yaaꞌoo ebine:

²² Yihudee taatee kexooch echeti maacheenaꞌo bulla Baabloonee taatoochi ginee iraasheenaꞌo waan yeshaa hammemminaꞌone; ebi maacheenaꞌoo: ‘Gibeneeti ne nuucheenaꞌo neen muriciitinaꞌone; ne toommoochoo sharii yittiitinaꞌone; ne baateenaꞌo dengoona yechetinaꞌone; ne nuucheenaꞌoo ne waanee gubb wottetinaꞌone’ gettemminaꞌone.

²³ “Ne mecheenaꞌonaa ne bushiisheenaꞌona bulla daamee Baablooneenaꞌoyich ichemminaꞌone; newoo ne qelloona boonoshi kishoochee muricaachemmo neene; tunebaani Baabloonee taatoona yecheyemmo neene; hini katemoo qaaqqoona miccemmone” iye.

²⁴ Sedeqiyaasi Erimiyaasich ishichiye: “Ebi no yibbaatoon koniyoona ariyaaye; newoo qitaachemmo neene.

²⁵ Neenna ta yibbaatoon iraasheenaꞌo waayegaata, ne waan waaree, ‘Nooch gete; taatoyich ne getteto amoone? Taatoo neech gettito amoone? Nooch aachiyaahine; nowoo neen wuxaachemmo noone’ gettemminaꞌone.

²⁶ Newoo boonoshich ishichibe: ‘Aroochaa ta qitaachemmoyich, Yonaataani kexooch taan daachiyaahine iyaꞌaniye taatoon ta qolleto’ gete” iye.

²⁷ Aroochee iraasheenaꞌo bulla Erimiyaas waan waaꞌi biin echeheete; biyoo taatoo biich gettitoommon boonoshich wochiye. Ebina mooyo waayeyaano bi tunetoyich biinna tookkii yibbaatoon neechiyeete.

²⁸ Erimiyaasiyoo Yerusaalem yecheti decooch beddaahaa kellechinaꞌochi addibaabooch beehe.