Erimiyaasi 37 - Kafa Linguistics Project

Sedeqiyaasi Erimiyaasin Echeti Echo

¹ Baabloonee taatoo Nabukadinatsori Yoyaqiimichi bushoo Yoyakiinichi keroon Yosiyaasichi bushoo Sedeqiyaasin Yihudee showooch taatiihe.

² Biyoo tuneba, bi maddechinaꞌo, showee ashooch beddaahaa keemechi Erimiyaasina getteeti Doono Yeerichi qaaroon waayeyaaneenaꞌone.

³ Taatoo Sedeqiyaasi “No maccoyich no Nuggishoo Doono Yeer waan qollebe” iꞌi Shelemaayichi bushoo Yehukaalinaa Maseyaahichi bushoo, qeeshoo Sofoniyaasinon keemechi Erimiyaas waan wochee daachiihe.

⁴ Erimiyaasi batt cuyee kexooch giyaano bi tunetoyich, ashi daggooch kechii giyii beehe.

⁵ Faroonichi ginee naayinaꞌo Gibitsee boonoshi kechitoyich, Yerusaalemin giichiꞌi beeti Baabloonee ginee naayinaꞌo ebi boonoshi woroon waayeꞌi Yerusaalemee wotteheete.

⁶ Aroochee Doono Yeeri Erimiyaasich ishichiye:

⁷ “Wocheyechinaꞌoyich, ‘Taan ittoshi echemmoyich ta waan ittoshin wocheti Yihudee taatoyich Israꞌeelee Nuggishoo Doono Yeeri ishichiye: “Ittoshin gaachoyich waati Faroonichi ginee naayinaꞌo boonoshi showooch, Gibits wottemminaꞌone.

⁸ Baabloonee asheenaꞌo wochi waaree hini katemoon kochemminaꞌone; katemoonoo yechemminaꞌone; qaaqqoonoo michemminaꞌone” getote’ gete.

⁹ “Doono Yeeri ishichiye: ‘Baabloonee ginee naayinaꞌo noon qayi hammemminaꞌone’ geti ittoshi qelloon dawushiyaahote; wotta hamaachemminaꞌone.

¹⁰ Ittoshin kochiibeeti Baabloonee ginee naayinaꞌo bullin ittoshi kochii wochimmo gaatoona, boonoshiichee muriccii echeꞌi bi duukkaani duukkaanooch beeti mayeti asheenaꞌo bulli tiyiree hini katemoon qaaqqoona michemminaꞌone” iye.

Erimiyaasi Cucheyoo

¹¹ Faroonichi ginee naayinaꞌo katinnitoyich Baabloonee ginee naayinaꞌo Yerusaalemee wottehooba,

¹² Erimiyaasi bi asheenaꞌo daggoochee bi qoodoon deꞌoyich Biiniyaamee showooch hamma Yerusaalemee kechiye.

¹³ Biiniyaami Kellooch bi shaggaahaa, kellechinaꞌochi ukkiroo tuneti, Hanaaniyichi bushoo, Shelemaayichi bushoo, Iriyaahi “Baabloonee showooch aallaa hammaaniye ne beeto” iꞌi keemechi Erimiyaasin yechiye.

¹⁴ Erimiyaasiyoo “Ebi kootoone; Baabloonee showooch aallaa hammaa toonoone ta beeto” iye. Tunebaani Iriyaahi biichon waayemmon qajjiye; Erimiyaasin yechiꞌi iraasheenaꞌo waan deebiye.

¹⁵ Iraasheenaꞌoo ippoona tiyii Erimiyaasin yexxiyeete; cuyee kexo boonoshi tuniiti koorechi Yonaataani kexooch cuchiyeete.

¹⁶ Erimiyaasiyoo kechi dech beeti xebbe gatooch cucheꞌi aroochoo meeti aaboon kotehe.

¹⁷ Aroochee taatoo Sedeqiyaasi wochii Erimiyaasin deebiꞌi, bi taatee kexoochaa aashoona “Doono Yeeri neech gettiti qaaro beete?” iꞌi echehe. Erimiyaasiyoo “Eeha, beetone; Baabloonee taatoo kishooch beshiitaa ichemmo neene” iye.

¹⁸ Erimiyaasiyoo taatoo Sedeqiyaasich ishichiye: “Cuyee kexooch taan ne geddeto neech, ne maddechinaꞌoyich, asheenaꞌoyich amee gondoon ta shuunetenane?

¹⁹ ‘Baabloonee taatoo neenoo hini showoonoo koyoyich waataachemmone’ iꞌi keemoon neech keemmiti ne keemechinaꞌo aayeete?

²⁰ Taatoo ta doonocho, ta qolloon waayeree ta echeton ne tuniyemmoyich neen qollehoye; aroochaa ta qitaachemmoyich, koorechi Yonaataani kexooch taan wochiyaahine” iye.

²¹ Ebich taatoo Sedeqiyaasi getoon immiye; boonoshiyoo Erimiyaasin kellechinaꞌochi addibaabooch kotiiheete; katemoochee kosho bulli ciiremmi wottoon koshon kachii beetinaꞌo waanee qemi qemonaa ikkikke kosho biich ichee beehe; ebina Erimiyaasi kellechinaꞌochi addibaabooch kotehe.