Erimiyaasi 36 - Kafa Linguistics Project

Yeerichi Qaaroon Baaruuki Shemmo

¹ Yihudee taatoo Yosiyaasichi bushoo Yoyaqiimi taateti awuddinnee natooch, Doono Yeeri bi qaaroona Erimiyaasich ishichiye:

² “Kooree natoon deebiree neech ta getteti aaboochee, ebiyoo Yosiyaasi taatee yemeenoochee tiijjii hanaach beddaahaa Yihudee asheenaꞌochon, Israꞌeelee asheenaꞌochonaa aagetee asheenaꞌo bullichonon ta getteti qaaro bullin kooribe.

³ Diqqich Yihudee asheenaꞌo boonoshi toommooch tuniiya ta gabiti gonde mooyon waayeree boonoshi ikkikkoona boonoshi gonde gommoochee wottemminaꞌone; tawoo boonoshi gondoonaa boonoshi axaaxoonon echebe gettemmo taane” iye.

⁴ Aroochee Erimiyaasi Neraayichi bushoo Baaruukin ceeggiye; Baaruukiyoo Doono Yeeri gettiti qaaro bullin Erimiyaasi noonoochee waayeꞌi kooree natooch kooriye.

⁵ Aroochee Erimiyaasi Baaruukichi ishichiꞌi gettiye: “Doono Yeerichi yaafee kexooch ta giyaachemmoyich bajjeeto taane.

⁶ Ebich Doono Yeerichi yaafee kexooch hamiree, noonoona ta getaa kooree natooch ne kooriti, Doono Yeerichi qaaroon, coomee aabooba asheenaꞌoyich shemmebe; boonoshi katemi katemoochee waati Yihudee asheenaꞌo bulliyoo waayemmoyich tuniiree shemmebe.

⁷ Doono Yeeri hini ashi toommooch gettiti kaaroonaa naxoona oogeto bi tunetoyich, diqqich Doono Yeeri aafooch corootemminaꞌo, asho bi ikkikkoonoo bi gondoochee wottemmo tunemmone” iye.

⁸ Neraayichi bushoo Baaruuki, Doono Yeerichi yaafee kexoochaa, Doono Yeerichi qaaroon qoddeti macaafoochee shemmebe iꞌi keemechi Erimiyaasi biich gettito bullin tuniihe.

⁹ Yihudee taatoo Yosiyaasichi bushoo Yoyaqiimi taateti uuchinnee natoobee yiixiyinnee agenooch, Yerusaalemi katemee asho bullinaa Yihudee katemeenaꞌoochee Yerusaalem waati asheenaꞌo bullina Doono Yeeri aafooch coomoon awaajjiyeete.

¹⁰ Baaruukiyoo Erimiyaasi gettiti qaaroon, Doono Yeerichi yaafee kexeexi damba qachi addibaaboochaa, Doono Yeerichi yaafee kexooch giyeebeeti Andire Kellooch beeti koorechi Shafaanichi bushoo Gemaariyichi gatoochaa asho bullich qoddeti macaafoon shemmehe.

¹¹ Shafaanichi bushoo Gemaariyichi bushoo Mikiyaasi Doono Yeerichi qaaro bullin qoddeti macaafoochee shemmeetaa waayeꞌi,

¹² taatee kexooch, koorechochi gatooch kindiye; aroochoo ukkireenaꞌo bulli, koorechi Elishami, Shemayaahichi bushoo Delayi, Akiboori bushoo Elinaataani, Shafaanichi bushoo Gemaariyi, Hanaaniyichi bushoo Sedeqiyaasi, ukkireenaꞌo bulliyoo koteꞌi beetinaꞌone.

¹³ Mikiyaasiyoo Baaruuki asheenaꞌoyich qoddeti macaafoochee bi shemmetaa bi waayeto bullin boonoshich gettiye.

¹⁴ Ukkireenaꞌo bulla “Asheenaꞌo bullich ne shemmeti qoddeti macaafoon yeshi wobe” iꞌi Kushiyichi bushoo, Shelemaayichi bushoo, Netaanichi bushoo, Yehuudina wocheheete. Ebina Neraayichi bushoo Baaruukiyoo qoddeti macaafoon yechii boonoshi waan waahe.

¹⁵ Boonoshiyoo “Koteechi ebi qoddeti macaafoon nooch shemmebe” iyeete. Ebina Baaruuki boonoshich shemmehe.

¹⁶ Ebi qaaro bullin waayeꞌi shatona boonoshinaa boonoshina ciineeheete. Aroochee Baaruukich “Ebi qaaro bullin taatoyich geto nooch qaawiihe” iyeete.

¹⁷ Baaruukinoo ishichiꞌi echeheete: “Ebi qaaro bullin aabichaꞌa ne koorito gaata nooch gete; Erimiyaasi neech getenane?” iyeete.

¹⁸ Baaruukiyoo boonoshich ishichiye: “Erimiyaasi ebi qaaro bullin bi noonoona taach gettiye; tawoo eboshin qalemoona kooree natooch kooriyoye” iye.

¹⁹ Aroochee iraasheenaꞌo Baaruukich ishichiyeete: “Neennaa Erimiyaasina hamiree aashebote; aabiich ittoshi beeto gaata koniyoona ariyaaye” iyeete.

Natee Macaafoon Taatoo Michoo

²⁰ Aroochee iraasheenaꞌo taatoo waan addibaabooch hammiyeete; tunebaani qoddeti macaafoon koorechi Elishamichi gatooch kotiitinaꞌone; ebi qaaro bullinoo taatoyich gettiyeete.

²¹ Ebi macaafoon bi deebemmoyich Yehuudin taatoo daachiihe; Yehuudiyoo koorechi Elishamichi gatoochee deebiye. Yehuudiyoo ebi qoddeti macaafoon taatoonaa taatoochi gaꞌooch neexeꞌi beeti iraasheenaꞌonoyich shemmehe.

²² Taatoo yiixiyinnee agenooch, bi yooyi kexooch koteꞌiniye bi beeto; aaxxeebeeti qaaqqoo bi aafooch beetone.

²³ Yehuudi keejje woyee awudde kuxon bi shemmemmi haddoona, qoddeti macaafo bulli miccimmi wottoon, taatoo appoona maaccii qaaqqooch duppii beehe.

²⁴ Taatoo tuneba ebi qaaroon waayeti bi maddechinaꞌo bulli shataaneenaꞌone; boonoshi tahoonoo keexaaneenaꞌone.

²⁵ Elinaataani, Delayinaa Gemaariyina qoddeti macaafoon bi michaachemmoyich taatoon qolleheete; tunebaani taatoo boonoshi qolloon waayeyaanoone.

²⁶ Koorechi Baaruukinaa keemechi Erimiyaasinon boonoshi yechemmoyich, taatoochi bushoo Yerahimeelin, Azirelichi bushoo Seraayinaa Abidelichi bushoo Shelemaayinoyich taatoo gettiye; tunebaani Doono Yeeri boonoshin aachiye.

Wochinnoon Erimiyaasi Kooriti Qaaro

²⁷ Qoddeti macaafoonaa Erimiyaasi noonoochee Baaruuki kooriti qaaroonon taatoo michitoyee gubb, Doono Yeeri bi qaaroona Erimiyaasich ishichiye:

²⁸ “Wochinnoon bare kooree natoon deebe; Yihudee taatoo Yoyaqiimi michiti qoddeti macaafooch beeti wonnee qaaro bullin kooribe.

²⁹ Yihudee taatoo Yoyaqiimichoo ishichibe: Doono Yeeri ishichiye: ‘ “Baabloonee taatoo iberoochaa woyemmone; hini showoon, aroochoo beeti ashoonaa gijjoonon aalliyemmone” iyaꞌa ne koorito amoyichiye?’ getona qoddeti macaafoon michito neene.

³⁰ Ebich Yihudee taatoo Yoyaqiimichon Doono Yeeri ta ishichiyoye: Daawitichi taatee qeenooch kotemmo biich beetaachemmone; bi dubeno maach dupperee areddee gaamoonaa xumee doshoonoyich tunemmone.

³¹ Ta biin, bi bushiisheenaꞌon, bi iraasheenaꞌon, boonoshi gondoyich naxemmo taane; taachon waayo boonoshi qajjitoyich, boonoshi toommooch deebemmo taane ta iti aallo bullin boonoshinaa Yerusaalem beeyechinaꞌona toommooch, Yihudee asheenaꞌo toommoochoo deebemmo taane, itone gete” iye.

³² Aroochee Erimiyaasi bare kooree natoon deebiꞌi Neraayichi bushoo koorechi Baaruukich immiye; Baaruukiyoo Yihudee taatoo qaaqqoona michiti qoddeti macaafooch beeti qaaro bullin Erimiyaasi noonoochee waayeꞌi kooriye; wodde shaahe qaaroo eboshi toommooch daakkeehe.