Erimiyaasi 34 - Kafa Linguistics Project

Sedeqiyaasich Getteeti Wocho

¹ Baabloonee taatoo Nabukadinatsorinaa bi ginee naayinaꞌo bullina, bi hajjiibeeti taatee showoonaa aagetoonooch beeti ginee naayinaꞌoo Yerusaaleminaa bi guudoona beeti katemoo bullinon kochii boonoshi beehooba, Doono Yeeri bi qaaroona Erimiyaasich ishichiye:

² “Israꞌeelee Nuggishoo Doono Yeeri ishichiye: Hamiree Yihudee taatoo Sedeqiyaasich ishichi gete: ‘Doono Yeeri ishichiye: Hini katemoon Baabloonee taatoo kishooch beshiiree immemmo taane; qaaqqoonoo michemmone.

³ Iberoochaa newoo yecheeshalli ne gettemmo bi kishoochee muricaachemmo neene; yecheyemmo neene; bi kishoochoo beshiitaa ichemmo neene; Baabloonee taatoon aafoona ciinnemmo baroonoo danemmo neene; biyoo ne toommooch yibbaatemmone; Baabloonee showoochoo hammemmo neene.

⁴ “ ‘Tunebaani Yihudee taatoo Sedeqiyaaso! Doono Yeerichi qaaroon waayebe; Doono Yeeri neechon ishichii beetone: Goraadoona qitaachemmo neene;

⁵ diggoona qitemmo neene. Asheenaꞌo neyee aaf beebee echeti ne qaabbechi taateenaꞌochi oogoyich, ixaanoon boonoshi shoohoommon, ne oogoyich ixaanoon shookkemminaꞌone; “Ye no doonocho” getibee neech shooshemminaꞌone; ebi qaaroon getteto ta, ta qelloona Doono Yeeri taane, itone’ gete” iye.

⁶ Aroochee keemechi Erimiyaasi ebi qaaro bullin Yihudee taatoo Sedeqiyaasich Yerusaalemi katemoochaa gettiye.

⁷ Ebiyooba Baabloonee taatoochi ginee naayinaꞌo Yerusaalemi katemoonaa echeti Yihudee katemeenaꞌo Lakishinaa Azeqinon kochii beetinaꞌone; ebiyoo Yihudee katemeenaꞌoochee echeti manje katemeenaꞌo eboshi baach bi tunetoyichiye.

Guuno Guuchittinoochee Keyo

⁸ Taatoo Sedeqiyaasi guuninaꞌon guuchittinoochee kichoyich Yerusaalemi katemee asho bullina tookkii wogoon bi giyitoyee gubb, Doono Yeeri bi qaaroona Erimiyaasich gettiye;

⁹ ebiyoo asho bulli Hibiroo tuneti bi guunon woyee bi gonneen, guuchittinoochee bi kichemmoyichiye; wottoo koniyoona Ayihudo tuneti bi manoon bi hajjaachemmoyichiye.

¹⁰ Asho bulli bi guunonaa bi gonneenon guuchittinoochee bi kichemmoyich, ebiyee bekk koniyoona boonoshin bi hajjaachemmoyich, wogoon giyiti ukkireenaꞌo bullinaa asho bullina deꞌa iyeete; guuchittinoocheenoo boonoshin kichiyeete.

¹¹ Tunebaani aroyee gubb guuchittinoochee boonoshi gawukkiti boonoshi guuninaꞌonaa gonneenaꞌonon, guuchittinooch wochiyeete; guunonaa gonneenon tuniiꞌi hajjiyeete.

¹² Aroochee Doono Yeeri bi qaaroona Erimiyaasich ishichiye:

¹³ “Israꞌeelee Nuggishoo Doono Yeeri ishichiye: Ittoshi qaabbechinaꞌon guuchittinoochee, Gibitsee showoochee ta kichiyooba, boonoshina tookkii ishichaꞌa wogoon giyeto taane:

¹⁴ ‘Ittoshich kecheti, shiritte natonoo ittoshich maddeti, Hibiroo tuneti ittoshi manoon shabattinnee natooch gawukkoo ittoshich qaawiihe’ iyoye. Tunebaani ittoshi qaabbechinaꞌo taachon waayeyaaneenaꞌone; boonoshi waamonoo ta waan gaꞌiyaaneenaꞌone.

¹⁵ Ittoshiyoo gondoochee wotteꞌi asho bulli bi manoon bi gawukkemmoyich, awaajjoon getona ta aafooch tate mooyon tuniihote; taach goyinneebeeti yaafee kexoochaa, ta aafoochaa wogoon giyiyote.

¹⁶ Tunebaani ittoshi gubb wotteꞌi, ta shigoon hoxiihote; ittoshi ikkikkoona boonoshi daaggoona boonoshi hammemmoyich ittoshi gawukkiti, ittoshi guuninaꞌonaa ittoshi gonneenaꞌonon wochii deebiꞌi, guuninaꞌonaa gonneenaꞌonon tuniihote.

¹⁷ “Ebich Doono Yeeri ta ishichiyoye: Asho bi ikkikkoona bi manoonaa bi xiboonon, gawukkoyich awaajjoo bi qajjitoyich, taach deꞌa getaano ittoshine; ebichoo ta, goraadoon, biiyoonaa shaacoonon ittoshi toommooch awaajjemmo taane. Ittoshi toommooch shaggiti mooyona showee toommeexi taatittino bulli keqqemmoyich tuniyemmo taane.

¹⁸ Ta wogoon happiti, ta aafooch boonoshi giyiti wogoon quyeyaani asheenaꞌon, bi meenon gutta qoodiichii bi gutte daggoona boonoshi besheti maamo toommooch boonoshi tuniitoommon, boonoshi toommooch tuniyemmo taane.

¹⁹ Yihudee ukkireenaꞌonaa Yerusaalemi katemee ukkireenaꞌonon, taatee kechi iraasheenaꞌonoo, qeesheenaꞌonaa maamochi meechi gutte daggoona besheti asho bullin,

²⁰ boonoshi etteenaꞌo kishoonaa boonoshi kashoon qaawii beetinaꞌo kishoonooch beshiiree immemmo taane. Boonoshi dubeno shimaajji gaceenaꞌonaa kubbi cooxinaꞌonoyich maayoon tunemmone.

²¹ “Yihudee taatoo Sedeqiyaasinaa bi iraasheenaꞌonon, boonoshi etteenaꞌo kishoonaa boonoshi kashoon qaawii beetinaꞌo kishoonooch, ittoshin koyoochee wotteti Baabloonee taatoochi ginee naayinaꞌo kishoochoo beshiiree immemmo taane.

²² Andoo boonoshich gettemmo taane; hini katemoochoo wochi boonoshin deebemmo taane; ebi katemoon kocheminaꞌone; yechemminaꞌone; qaaqqoonoo michemminaꞌone; Yihudee katemeenaꞌon ashaalli shokkoon tuniyemmo taane” iye Doono Yeeri.