Erimiyaasi 32 - Kafa Linguistics Project

Erimiyaasi Hanameelichi Showoon Kemo

¹ Yihudee taatoo Sedeqiyaasi taateti aashirinnee natooch, Nabukadinatsori taateti aaraa shimittinnee natooch, Doono Yeeri Erimiyaasich gettiye.

² Ebiyooba Baabloonee taatoochi ginee naayinaꞌo Yerusaalemin giichii beeheete; keemechi Erimiyaasiyoo taatee kexooch beeti kellechinaꞌochi addibaabooch cucheꞌi beehe.

³ Yihudee taatoo Sedeqiyaasi ishichiꞌi biin cuchiihe: “ ‘Doono Yeeri ishichiye: Hini katemoon Baabloonee taatoo kishooch beshiiree immemmo taane; biyoo yechemmone’, iyaꞌa keemoon ne keemmeto amoyichiye?

⁴ Wotta, ‘Yihudee taatoo Sedeqiyaasi Baabloonee asheenaꞌo kishoochee muricaachemmone; Baabloonee taatoo kishooch beshiitaa ichemmone; biinna tookki baroona dane yibbaatemmone; bi aafoonoo ciinnemmone.

⁵ Biyoo Sedeqiyaasin Baabloonee showooch daammemmone; bi waan ta waammi wottoon arooch beeyemmone, iye Doono Yeeri. Baabloonee asheenaꞌona tookkii ittoshi koyetaanona ittoshich kaameyaachemmone, itone’ iyine” iye.

⁶ Erimiyaasi ishichiye: “Doono Yeeri taach ishichitone:

⁷ ‘Ne niheeshoo Shaluumichi bushoo Hanameeli ne waan waaree “Biishee kemee hakkoo neecho bi tunetoyich, Anaatoot beeti ta budon kemebe” gettemmone’ itone” iye.

⁸ Doono Yeeri bi qaaroona bi gettitoommon, ta niheeshoochi bushoo Hanameeli ta beeti kellechinaꞌochi addibaabooch waaꞌi taan “Biiniyaamee showooch, Anaatoot beeti ta budon ne kemebe; ebiyoo biishi bedo, wottoo hajja bedo ne tunetoyich neech kemebe” iye. Ebiyooba ta waayeto Doono Yeerichi qaaro bi tunoon ariiho.

⁹ Anaatoot beeti budon ta niheeshoochi bushoo Hanameel waanee kemeho; aaraa shabaatte sheqeelee birewoon biich machoona qoccaꞌa immeho.

¹⁰ No qaaro kooreetooch dukkaachaa nashiyo; miixoo beetoochaanoo gijjoon machoona qoccaꞌa immeho.

¹¹ Aroochee no qaaro kooreeti nasheetonaa nasheyaanoona tuneti woraqatoon daammeho.

¹² Ta niheeshoochi bushoo Hanameeli aafoochaa, no qaaro kooreeti woraqatooch dukketi miixeenaꞌonaa kellechinaꞌochi addibaabooch koteti Ayihudeenaꞌonochi aafoochaa no qaaro kooreeti woraqatoon, Mahisiyichi bushoo, Neraayichi bushoo Baaruukich immeho.

¹³ Boonoshi aafoochaa Baaruukichi ishichaꞌa getteho:

¹⁴ “Israꞌeelee Nuggishoo Beshe Mawe Doono Yeeri ishichiye: ‘Meeti yemeenoon boonoshi quyeyemmoyich nasheetonaa nasheyaanoona tuneti, no qaaro kooreeti gutte woraqatoon daamiree nuuqqee qiicooch kotiibe.

¹⁵ Ebich Israꞌeelee Nuggishoo Beshe Mawe Doono Yeeri, asheenaꞌo hini showoochee kexonaa goyoonon, woyinee budonoo wochinnoon kememminaꞌone’ itone” iyo.

Erimiyaasi Corootiti Corooto

¹⁶ Neraayichi bushoo Baaruukich no qaaro kooreeti woraqatoon ta immetoyee gubb, ishichaꞌa Doono Yeer waan corootiyo:

¹⁷ “Nuggishoo Doono Yeero, shimaayoonaa showoonon ooge ne hakkoona wottoo yaggeeti ne mochoona hallito neene; neen mawemmi mooyo amolla aalloone;

¹⁸ humeenaꞌoyich ne shoodoon bekkiihine; tunebaani niheenaꞌochi xuꞌoyich boonoshiyee gubbi boonoshi bushiisheenaꞌon sheerihine; oogechi, hakkechi Nuggishoocho, ne shigo Beshe Mawe Doono Yeerine.

¹⁹ Gaboona oogoo, shuunoonoo hakkecho neene; asho bullich bi gommoommonaa bi shuunee aafoommonon qocoyich, ne aafo asho bullichi gommon ciinnii beetone.

²⁰ Gibitsee showoochaa worganikkiti malletoonaa gaakkechi shuunoonon shuuneto neene; hanaach beddaahaa Israꞌeeleenaꞌonaa asho bullina daggooch eboshin tuniyoona, hanaachichoommon ne shigoon oogiito neene.

²¹ Worganikkiti malletoonaa gaakkechi shuunoona, kupphe ne kishoonaa yaggeeti ne mochoona, shattiiti ne yiiroonoo ne asheenaꞌo tuneti Israꞌeeleenaꞌon Gibitsee kichito neene;

²² boonoshich imoyich boonoshi qaabbechinaꞌoyich wogoon ne giyeti, ejjoonaa eeyonon xuupphiibeeti hini showoon boonoshich immehine;

²³ boonoshiyoo giyiꞌi woraashiyeete. Tunebaani ne qaaroon waayeyaaneenaꞌone; ne sheeroona hamaaneenaꞌone; boonoshi tuniyemmoyich ne getteto bulliichee amoonolla tuniyaaneenaꞌone. Ebich ebi shaahe gonde mooyon boonoshi toommooch deebehine.

²⁴ “Ebiyoche showoo guteetone; katemoon yeshoyich katemooch katinnitinaꞌone; goraado, shaacoonaa biiyoonoochee tiyitona katemoo biin kochiibeeti Baabloonee asheenaꞌo kishooch ichetone; ne beeggaa beetoommon ne getteto ceennitone.

²⁵ Nuggishoo Doono Yeero, katemoo Baabloonee asheenaꞌo kishooch immeyooch bi beetaa, ‘Showoon gijjoona kemebe; miixeenaꞌonoo yeshe’ iyine” iyo.

²⁶ Aroochee Doono Yeeri taach ishichiye:

²⁷ “Ta, meeno taheto bullichi Nuggishoo Doono Yeeri taane; iberoochaa taan mawemmi mooyo beete?

²⁸ Ebich Doono Yeeri ta, ishichiyoye: Hini katemoon Baabloonee asheenaꞌo kishoonaa Baabloonee taatoo Nabukadinatsorichi kishoonooch beshiiree immemmo taane; biyoo koyi yechemmone.

²⁹ Hini katemoon kochiibeeti Baabloonee asheenaꞌo arooch qaaqqoon tucheree michemminaꞌone; taan ippiyoyich kechi toommeexi kexoochaa Baꞌaaloyich ixaanoon boonoshi shookkiti, bare nuggisheenaꞌoyich uyee buuroon boonoshi ukkiti kexinaꞌona tookki michemminaꞌone.

³⁰ “Ebiyoo Yihudee asheenaꞌonaa Israꞌeeleenaꞌona, boonoshi bushittinoochee tiijjiꞌi ta aafooch gonde mooyon baach boonoshi tuniitonaa Israꞌeeleenaꞌo boonoshi kishee shuunoona taan ippiyoyee besh, bare mooyon tuniyoo boonoshi qajjitonoyichiye.

³¹ Hini katemoo bi shuuneeti aaboochee tiijjiꞌi, hanaach beddaahaa, ta aafoochee biin ta aalliyemmoyich, ta ippoonaa ta kaaroonon boodditone; ebich ta aafoochee biin aalliyemmo taane.

³² Ebiyoo Israꞌeelee asheenaꞌonaa Yihudee asheenaꞌona, boonoshi taateenaꞌonaa boonoshi ukkireenaꞌona, boonoshi qeesheenaꞌonaa boonoshi keemechinaꞌona, Yihudee asheenaꞌonaa Yerusaalem beetinaꞌona, boonoshi tuniiti gonde mooyo bullina taan boonoshi ippiitoyichiye.

³³ Boonoshi aafoon tuneyaanoon boonoshi gubboon ta waan wochiyeete; wochii wochii boonoshin ta dojjaa, ta sheeroon deꞌoyich waayemmon qajjiyeete.

³⁴ Ta shigo ceekketi ta yaafee kexon eeꞌiyoyich, ciigiiti boonoshi nuggisheenaꞌochi shahalloon kotiiheete.

³⁵ Yihudee asheenaꞌo axaaxoon shuunemmoyich, ebi eeꞌe mooyon tuniyoyich, ta getaanoon, wottoo ta mulloona ta gabaanoon, boonoshi anaami bushiisheenaꞌonaa maache bushiisheenaꞌonon qaaqqooch goggii Molookich deejjoyich, Hinoomi bushoo bambooch beeti geppeexi goyinnee xaaꞌoon Baꞌaaloyich shuunetinaꞌone” iye.

Kecoochee Wotto Gibenikkeyoo

³⁶ Israꞌeelee Nuggishoo Doono Yeeri taach ishichiye: “ ‘Shaacoona, goraadoonaa biiyoona Baabloonee taatoyich immeetone’ ne ii beeti katemoon ciinnii beetona Israꞌeelee Nuggishoo Doono Yeeri ta ishichiyoye:

³⁷ Ta kaaroonaa ta ippoona, ooge ta naxoonoo boonoshin ta yookketi showoo bulliichee boonoshin kicemmo taane; hini xaaꞌoochoo wochi deebemmo taane; keqqaalloon boonoshi beeyemmoyich tuniyemmo taane.

³⁸ Boonoshiyoo ta asheenaꞌon tunemminaꞌone; tawoo boonoshich Nuggishoon tunemmo taane.

³⁹ Boonoshichoo boonoshiyee gubbi boonoshi bushiisheenaꞌoyichoo bi gaawemmoyich, bulli aaboochoo taan boonoshi shattemmoyich, ikke mulloonaa ikke gommonon immemmo taane.

⁴⁰ Gaawe mooyon boonoshich tuniyoochee gubb wottee qayoyich, boonoshina tookki bulli yemeenee wogoon giyemmo taane; ta waanee bara boonoshi wotteyaachemmoyich, taan shaton boonoshi mullooch kotiyemmo taane.

⁴¹ Boonoshich gaawe mooyon tuniyoona emiremmo taane; ta ceeni mulloona, ta ceeni kashoona iberoochaa hini xaaꞌooch boonoshin bechemmo taane.

⁴² “Ebich Doono Yeeri ishichiye: Ebi ooge gonde mooyon hini ashi toommooch ta deeboommon, boonoshich ta gibenikkiti gaawe mooyo bullin deebemmo taane.

⁴³ Ittoshiyoo ‘Ashaalli, gijjaalli shokkoone; Baabloonee asheenaꞌo kishooch ichetone’ ittoshi ii beeti hini showoochee goyee budo kechemmone.

⁴⁴ Boonoshi keceenaꞌon wochemmo ta tunetoyich, Biiniyaamee showooch, Yerusaalemi guudooch beeti xaaꞌeenaꞌooch, Yihudee katemeenaꞌooch, geppe showeexi katemeenaꞌooch, geppee gaadeexi katemeenaꞌooch, Negeebi katemeenaꞌooch, asheenaꞌo goyee budon birewoona kememminaꞌone; qaaroo kooreeti woraqatooch dukkeetaa miixoo beetoochaa nasheyemmone” iye Doono Yeeri.