Erimiyaasi 31 - Kafa Linguistics Project

Israꞌeeleenaꞌo Wottemminaꞌo Tuno

¹ Doono Yeeri ishichiye: “Ebiyooba Israꞌeelee gumbo bullich Nuggishoon tunemmo taane; boonoshiyoo ta maccoon tunemminaꞌone” iye.

² Doono Yeeri ishichiye: “Israꞌeeleenaꞌo tooqqii kashoon boonoshi qaawiyooba, goraadoochee muricciti asho shuuꞌi showoochaa gidoon danemmone.

³ Doono Yeeri ta wonna boonoshich bekkaꞌa ishichiyo: Bulli aabee shunoona ittoshin shunneto taane; ta shoodoo bulli aabooch ittoshich manjemmone.

⁴ Gidiideyoommi Israꞌeele, neen wochi haggemmo taane; newoo wotte hakkemmi neene; ne kamboon yeshiree shoddechinaꞌona tookki emiroona duuttemmi neene.

⁵ Wochinnoon Shamaari guudinaꞌo toommooch woyinoon bechemmi neene; bechechinaꞌoo bechemminaꞌone; bi aafoonoo emiremminaꞌone.

⁶ Quyechinaꞌo Efreemi geppeenaꞌoochaa, ‘Ittoshi waataa, Tsiyoon, no Nuggishoo Doono Yeer waan keyone’ getiree boonoshi cookemmi aabo woyemmone” iye.

⁷ Ebich Doono Yeeri ishichiye: “Yaaqobich emiroona shoddebote; aageteenaꞌochi ukkiroyich ililibote; awaajjibote; galletebote; ‘Doono Yeeri bi asho tuneti Israꞌeelee curoon wodiitone’ getote.

⁸ Dambi-waani showoochee boonoshin deebemmo taane; showee daaroochee boonoshin kicemmo taane; boonoshi daggooch wolloonaa baata sheqqoona, yeqqefechinaa maaxoo manjaa beetina, beeyemminaꞌone; ooge maccoo tuneree hiniich wottemminaꞌone.

⁹ Eefona woyemminaꞌone; boonoshin goggiyoona yaabemmo taane; aachi gashoona, boonoshi tephaachemmi kaame gommona, boonoshi hammemmoyich tuniyemmo taane; ebiyoo Israꞌeelich nihoo ta tunetoyich, Efreemiyoo taach gutenee bushoo bi tunetonoyichiye.

¹⁰ “Aageteenaꞌote, Doono Yeerichi qaaroon waayebote; wohooch beeti baharee gashoonaa buure showeenaꞌonoyichoo ‘Israꞌeeleenaꞌon shaccito wochi kicemmone; qiddeenaꞌo boonoshi gijjoon boonoshi qiddoommon boonoshin qiddemmone’ getote.

¹¹ Doono Yeeri Yaaqobin biishetone; biyee beshe kuppheenaꞌo kishoochee wodiitone.

¹² Waaree Tsiyooni guudoochaa emiroona shoddemminaꞌone; Doono Yeerichi deꞌittinoona, maayoon, woyinee uyoonaa zayitoonon, emmishoonaa bagee baaddoonon, bariyoonaa gidereenon daneree emiremminaꞌone. Bedditi aacon daneti bechee budiyoommon tunemminaꞌone; ebiyee bekk ayinaachemminaꞌone.

¹³ Aroochee gidiideenaꞌo emiroona duuttemminaꞌone; gurimaasheenaꞌo, geeneenaꞌoo boonoshichoommon emiremminaꞌone; boonoshi eefon emirooch wochemmo taane; boonoshin goggiyemmo taane; boonoshi ayinoon emiroona shaddemmo taane.

¹⁴ Qeesheenaꞌon, beshaa beshoon michiyemmo taane; ta asheenaꞌoo ta deꞌittinoona michemminaꞌone” iye Doono Yeeri.

Israꞌeeleenaꞌoyich Doono Yeeri Ariqqo

¹⁵ Doono Yeeri ishichiye: “Eefonaa wodde bunnee qaaroona Raami katemoochee waayeehe; boonoshi aalletoyich, Raaheeli bi bushiishoyich eeppahane; goggemmonoo mawiihan” iye.

¹⁶ Doono Yeeri ishichiye: “Eefoochee ne qaaroon acimoochee ne aafoon quyebe; ne aayo duube echeyaachemmone” iye Doono Yeeri. “Ne bushiisheenaꞌo ettoochi showoochee wotteree woyemminaꞌone.

¹⁷ Gubbich gibeno neech beetone” iye Doono Yeeri. “Ne bushiisheenaꞌo boonoshi hajjee showooch wotte woyemminaꞌone.

¹⁸ “Efreemi ayinoona ishichoon waayehoye: ‘Yookkeyaani bariyoochoommon taan sheerihine; tawoo sheerehoye; Doono Yeeri ne, ta Nuggishoo ne tunetoyich taan wochibe; tawoo wottemmo taane.

¹⁹ Neyee wokkaa ta hammetoyee gubb, gondoochee wottehoye; ta ariitoyee guboo ta qelloon tappehoye; bushaa ta beehooba axaaxoon ta shuunetoyich yeellehoye; cooneehoye’ ii beetone.

²⁰ Efreemi aaxxe ta bushoo toone? Ta kashoommi gaggeroo toone? Biin ta kaaremmi aabo bullin, wochii biin gabiyoye; ta maacee meeno biich qewetoyich biin ariqqemmo taane” iye Doono Yeeri.

²¹ “Ne gommooch malletoon gede; malletemmi xaqqee giimboon neechibe; ne hammeti gommon, qaxxee kaattoon, gaawichi ciine. Gidiideyoommi Israꞌeele, wottebe; ebi ne katemeenaꞌooch wottebe.

²² Hini gibeneyaani asheenaꞌote, axiraache ittoshi beeyemmo aati wottooniye? Doono Yeeri ta, showee toommooch andire mooyon hallito taane; maachee anaamoyich deeboon tunemmine” iye.

Yeer Asheenaꞌo Gaannemmi Gaanno

²³ Israꞌeelee Nuggishoo Beshe Mawe Doono Yeeri ishichiye: “Boonoshi kecoon ta wochiyooba, Yihudee showoonaa bi katemoo bullinoochaa, ‘Cadiqee beemi xaaꞌoocho! Yaafee geppoocho! Doono Yeeri neen diiribe’ wochinnoon getteyemmone.

²⁴ Yihudee showoonaa bi katemoo bullina beeyi xaaꞌoo tunemminaꞌone; goyee gochechinaꞌonaa gijjee shiijjechinaꞌona arooch kotemminaꞌone.

²⁵ Ebiyoo nireti kasheen digaayiyemmo, shaacaa maraatetonoo michiyemmo ta tunetoyichiye” iye.

²⁶ Ebiyee gubb tokketoochee tiyaa ciinneho; ta tokketoo taach shaawiye.

²⁷ Doono Yeeri ishichiye: “Ebiyoche Israꞌeelee kexonaa Yihudee kexonon ashi yaaroonaa gijjee yaroona ta ceechemmi yemeeno woyemmone.

²⁸ Boonoshin waaxonaa happoonoyich, guufonaa aalliyoonoyich, iritoonoo boonoshi toommooch deeboyich ta kupphoommon, boonoshin manjiyoonaa bechoonoyich kupphemmo taane” iye Doono Yeeri.

²⁹ Ebiyoobee yemeenooch “Niheenaꞌo maati kiikkere woyinee naboona bushiisheenaꞌochi gasho qorixehe” immi woni yibbaatoo echemmone.

³⁰ Tunebaani asho bulli bi hajjee axaaxoyich qitemmone. Kiikkere woyinoon maammi asho bulli bi gasho qorixemmone.

³¹ Doono Yeeri ishichiye: “Ebiyoche Israꞌeelee macceenaꞌonaa Yihudee macceenaꞌona tookki andire wogoon ta giyemmi yemeeno woyemmone.

³² Ebi wogo, ittoshi qaabbechinaꞌon Gibitsee yaabii kichoyich boonoshi kishoon ta yeshiyooba, boonoshina tookkaa ta giyeti wogoommo toonoone; ebiyoo ta boonoshich kenoommon tunaꞌa ta beetaa, taanna tookkii boonoshi giyiti wogoon boonoshi happitoyichiye” iye Doono Yeeri.

³³ “Tunebaani ebi are yemeenoyee gubb Israꞌeelee macceenaꞌona tookki ta giyemmi wogo ebine” iye Doono Yeeri. “Ta sheeroon boonoshi mullooch kotiyemmo taane; boonoshi mullee cilloochoo kooremmo taane; tawoo boonoshi Nuggishoo tunemmo taane; boonoshiyoo ta macceenaꞌo tunemminaꞌone.

³⁴ Asho bi ikkikkoona bi giyoon, asho bi ikkikkoona bi manoon ‘Doono Yeerin ariibe’ geti dojjaachemmone; ebiyoo giishoochee oogooch beddaahaa, bulliyona taan ariyemmo bi tunetoyichiye. Boonoshi xuꞌoon maaremmo taane; boonoshi axaaxoonoo gabaachemmo taane” iye Doono Yeeri.

³⁵ Areddoyich aaboon tuniito, xumoyich ageneenaa xojjenoonon qociito, baharee aayinaꞌo buugemmoyich baharoon shuurikkiibeeto, bi shigo Beshe Mawe Doono Yeeri ishichii beetone:

³⁶ “Ebi halleenaꞌochi qociyoo bi echegaata baachiye, Israꞌeelee shiijjeroo aagetoo tuno ta aafoochaa ciroona bi echemmo” iye Doono Yeeri.

³⁷ Doono Yeeri ishichiye: “Israꞌeelee asheenaꞌon boonoshi tuniiti mooyo bullich ta duppemmo, damba beeti shimaayoo hireyoo bi hakkeegaata, deshi beeti showee koteenaꞌo bosheyoon boonoshi hakkee gaatane” iye Doono Yeeri.

³⁸ Doono Yeeri ishichiye: “Hanaaneeli xaqqee uxeroochee tiijji, Uxeree Daneexi Kellooch beddaahaa, katemoo Doono Yeeri taach bi shuuneyemmi yemeeno woyemmone.

³⁹ Qeellee woderoo aroochee tiyiree Gareebi geppooch beddaahaa, aroochee Goꞌaah beddaahaa, hammemmone.

⁴⁰ Dubenee bamboo bulli, tulloo duppeebeeti bamboo bulli, Qedirooni aacooch beddaahaa, aabi-keyo waan beeti Hareshee Kellee danooch beddaahaa beeto bulli Doono Yeeri taach yaafeeto tunemmone. Ebiyee bekk bulli aabooch Yerusaalemi waacheyaachemmine; happeyaachemmine” iye.