Erimiyaasi 30 - Kafa Linguistics Project

Doono Yeeri Bi Asheenaꞌoyich Gibenikkiti Gibeno

¹ Doono Yeeri Erimiyaasich gettiti qaaro ebine:

² “Israꞌeelee Nuggishoo Doono Yeeri ishichiye: Neech ta getteti qaaroon macaafooch kooribe.

³ Ebiyoche ta asho tuneti Israꞌeeleenaꞌonaa Yihudee asheenaꞌonon ta wochemmi aabo woyemmone, iye Doono Yeeri. Boonoshi qaabbechinaꞌoyich ta immeti showooch boonoshin deebemmo taane; boonoshiyoo aroon wochinnoon hajjemminaꞌone, iye Doono Yeeri” iye.

⁴ Israꞌeeleenaꞌochonaa Yihudee asheenaꞌochonon Doono Yeeri gettiti qaaro ebine:

⁵ “Doono Yeeri ishichiye: Shati qaaroon, geewee qaaroonoo waayeto noone; diggeecho toonoone.

⁶ Echebote; ciinishoo getote; anaamo bushoon shimon hakkehe? Shiyemmi maachechoommon anaamo bulli bi shimetoon kishoona yechiton ta beeggaabeeto amoyichiye? Ashi aafo amoyich tullehe?

⁷ Ebi aabo am shaahoon shattiihe! Ebiyoommi aabo aalloone; ebi Yaaqobichi iritee aaboone; tunebaani bi aroochee wodemmone.

⁸ “Ebiyooba, iye Beshe Mawe Doono Yeeri, boonoshi qetteexi waanjoon tiichemmo taane; boonoshi cuyoon kuxxemmo taane; ebiyee bekk dallaawoo boonoshin hajjaachemmone.

⁹ Tunebaani boonoshi Nuggishoo Doono Yeerinaa boonoshich ta tiijjiti boonoshi taatoo Daawitinoyich maddemminaꞌone.

¹⁰ “Ebich ta maddechi Yaaqobo, shattaahine; Israꞌeelo, keqqiyaahine, iye Doono Yeeri. Neen wohi showoochee, ne yareenaꞌonoo boonoshi kecceti showoochee, wodiyemmo taane; Yaaqobi wotteree diggoona tooꞌi kotemmone; koniyoona biin shatiyaachemmone.

¹¹ Neen wodiyoyich ta neenna tookkii taane, iye Doono Yeeri. Boonoshi daggooch neen ta yookketi aageteenaꞌo bullin aalliyemmo taane; tunebaani neen ciroona aalliyaachemmo taane; tatoona neen sheeremmo taane; neen sheeraanoon besheyaachemmo taane.

¹² “Doono Yeeri ishichiye: Ne tiisho dogaano, ne mayo wodaanoone.

¹³ Ne qoodooch taggemmo aalloone; ne mayoyichoo attoo aalloone; neech wodoo aalloone.

¹⁴ Ne shunechinaꞌo bulla neen battetinaꞌone; neech giddaaneenaꞌone; ettoon yexoommon neen yexxoye; maacmanjoochoommon neen sheeriyoye; ebiyoo ne xuꞌo oogeto, ne axaaxoo woddoo bi tunetoyichiye.

¹⁵ Ne biiyo wodaachemmo bi tunetoyich, ne tiishoyich ne cookiibeeto amoyichiye? Ne xuꞌo oogeto, ne axaaxoo woddoo bi tunetoyich, ebi mooyon ne toommooch tuniito taane.

¹⁶ “Ebich neen qooxxito bulli qoochemmone; ne etteenaꞌo bulla boonoshi ikkikkoona kecaa hammemminaꞌone; neen boshetinaꞌo bosheyemminaꞌone; neen boggitinaꞌo bokkemminaꞌone.

¹⁷ Iiwittinoon neech wochemmo taane; ne mayonoo wodiyemmo taane, iye Doono Yeeri. Ebiyoo ‘Koninolla qaaweyaani, koniyoona aaxxiyaani Tsiyoone’ boonoshi itoyichiye.

¹⁸ “Doono Yeeri ishichiye: Yaaqobichi duukkaanee kecoon wochemmo taane; bi beemi xaaꞌoyichoo ariqqemmo taane; katemoo wochinnoon bi xoobooch shuuneyemmone; taatee kexoo wonnee bi xaaꞌooch neexemmone.

¹⁹ Boonoshi waanee galletee shoddoonaa emiree ililoona waayeyemmone. Boonoshin meechemmo taane; boonoshiyoo shappaachemminaꞌone; ta boonoshin oogiyemmo taane; boonoshiyoo giisheyaachemminaꞌone.

²⁰ Boonoshi bushiisheenaꞌoo wonnee boonoshi goorooch wottemminaꞌone; wotte aagetoo tune, manjiree ta aafooch beeyemminaꞌone; boonoshin xuqqito bullin naxemmo taane.

²¹ Boonoshi iraashoo boonoshi asho tunemmone; boonoshin qeejjemmo boonoshi daggoochee kechemmone; ta waan biin katichemmo taane; biyoo katinnemmone; ebi tuno qayigaata, kuppheree ta waan katinon hakkemmo kone?

²² Ittoshi ta ashoon tunemmo ittoshine; ta ittoshi Nuggishoon tunemmo taane” iye.

²³ Ebiyoche Doono Yeerichi yubee yongo, ebiyoo bi kaaro, dimbilleebeeti yubee yongo kechitone; hukkechinaꞌo toommooch kindemmone.

²⁴ Doono Yeerichi kupphe kaaro, bi mullee gaboon bi ceechimmi wottoon wotteyaachemmone; woyemmi yemeenooch ebin shalligemmo ittoshine.