Erimiyaasi 3 - Kafa Linguistics Project

Israꞌeeleenaꞌo Gibeneyaaneenaꞌo Tuno

¹ “Ikke asho bi mecheen bi gawukkaa, areyoo bi waanee hammaa bare kenoon bi shaagigaata, biin wochi deebi shaaggehe? Showoo ciroona eeꞌeyaachehe? Ne, meetinaꞌona tookkii shunoon maabee echaꞌa, and ta waan wottoon qaawii beetine?” iye Doono Yeeri.

² “Eke kaameree hulloo tuneti geppeenaꞌon ciine; ne qeyaani xaaꞌoo aaye? Arabee asho shuuꞌi showooch bi kotoommon, newoo gommooch kotaachaa shunimaayeenaꞌon quyehine; shunee mamonaa ne gonde shuunoona showoon eeꞌiiti neene.

³ Ebich amichi kucho bachehe; naawee amiyoo dihemmon qajjiye; shunimaayeen shaahaꞌa yeellemmon qajjehine.

⁴ “Andoo ‘Ta nihoocho, bushittinee ta xiboocho!’ iyaa taan ceeggehine.

⁵ ‘Bulli aabooch kaarenne? Ciirooch beddaahaa ippenne?’ iibee axaaxoon shuunoochee wotteyaache iyine” iye.

Israꞌeelinaa Yihudina Yeerich Gibeneyee Qayo

⁶ Taatoo Yosiyaasichi taatee yemeenooch Doono Yeeri taach ishichiye: “Gibeneyaani Israꞌeeli tuniiton beeggetine? Ooge geppoo bullinaa waajjechi michi baatoo bullinooch hammaꞌa aroochaa shunoo maahane.

⁷ ‘Ebi bullin bi tuniitoyee gubb, ta waan wottemmine’ iyaꞌa gabiyoye; tunebaani wotteyaaneene; kootechi bi manee Yihudiyoo ebin beeggahane.

⁸ Ebi bi shunee mamo bullich biichi koorichoon immaꞌa, gibeneyaani Israꞌeelin ta biishon kootechi Yihudi beeggetine; ebi bi manee Yihudi shataaneene; areyoo hammaꞌa shunoo maahane.

⁹ Shunee mamo biich oogeti kette mooyo bi tunetaa, xaqqoonaa mixona tookkii shunoon mamona showoon eeꞌiihane.

¹⁰ Ebi bulli tunetaanoona koote bi manee Yihudi, kootoonalli bi ceeni mulloona ta waan wotteyaaneene” iye Doono Yeeri.

¹¹ Doono Yeeri taach ishichiye: “Dachechi Yihudi gibeneyaani Israꞌeeliyee beshi gonde tunehane.

¹² Dambi-waan hamiree ebi qaaroon ishichi awaajjibe: ‘Gibeneyaani Israꞌeele, ta waan wottebe’ iye Doono Yeeri. ‘Ariqqecho ta tunetoyich kaaroona neen ciinaachemmo taane; bulli aabooch kaareyaachemmo taane’ iye Doono Yeeri.

¹³ ‘Ne Nuggishoo Doono Yeeri toommooch hukkoon tiijjoona ne gondeti gondoon, waajjechi michi baatoo bulliichaa dallaawe nuggisheenaꞌoyich goyinnoona shunee ne mamon, ta qaaroonoo waayee ne qayon, ebi ne gondoon baach ariibe’ iye Doono Yeeri.

¹⁴ “ ‘Hini gibeneyaani bushiisheenaꞌote, ta ittoshi Doono ta tunetoyich ta waan wottebote; ikke katemoochee ikkoon, ikke yaroochee guttoon Tsiyooni guudooch deebemmo taane’ iye Doono Yeeri.

¹⁵ “ ‘Ta gaboo bullin ceechemmi qiddeenaꞌon ittoshich immemmo taane; boonoshiyoo ariyoona, shalligoonoo ittoshin qiddemminaꞌone.

¹⁶ Showee toommooch haddoona ittoshi meetiyooba, ebiyooba, Doono Yeerichi wogee taabootee mooyon tiijjii yibbaato qaawiyaachemmone; biyoo batteeto tunemmone; gabeyaachemmone; ciroonoo shalligeyaachemmone; ebi taabootoo wochinnoon shuuneyaachemmone.

¹⁷ Ebiyooba Yerusaalemi Doono Yeerichi Taatee Qeeni, getaa ceekkemmine; aageteenaꞌo bulla arooch Doono Yeeri ta shigoon oogiyoyich Yerusaalem kiceyemminaꞌone; ebiyee bekk babbereree gonde boonoshi gaboo waan wotteyaachemminaꞌone.

¹⁸ Ebiyooba Yihudee asheenaꞌo Israꞌeeleenaꞌona ikkotte yeshemminaꞌone; boonoshi qaabbechinaꞌo woraashemmoyich ta immeti showooch dambi-waanee ikkotteree woyemminaꞌone.

¹⁹ Israꞌeele, ta neen ta busha haddiya, gaawe showoon neech imma, showoo bulliyee beshe qeemi showoon neech woraashiya, qaawiyoye. Wotta “Ta Nihoocho, geti ceeggemmi neene; taan dabboocheenoo wotteyaachemmi neene” iyaꞌanoo, gabiyoye.

²⁰ Israꞌeeleenaꞌote, mechee bi kenoyich gibeneyee qayoommon, ittoshiyoo taach gibeneyoon qajjito ittoshine’ iye Doono Yeeri.”

²¹ Boonoshi Nuggishoo Doono Yeerin boonoshi battetoyich, boonoshi gommon boonoshi xummiitoyich, Israꞌeeleenaꞌochi eefonaa qollee qaaroona, hulloo tuneti geppeenaꞌoochaa waayeehe.

²² “Gibeneyaani bushiisheenaꞌote, ta waan wottebote; gibeneyaano tunoochee ittoshin shiwemmo taane” iye. Ebiyoche ne, no Nuggishoo Doono Yeeri ne tunetoyich, ne waan waato noone.

²³ Guudinaꞌonaa geppeenaꞌonoochaa shahalloyich goyinneebee no dulloona dacheeto noone. Israꞌeeleenaꞌoyich wodoo danemmo no Nuggishoo Doono Yeer waanee baachiye.

²⁴ Tunebaani wonnee tiijjiꞌi yeelliiti shahalloyich goyinno, no qaabbechinaꞌo aajjiti aayo bullin, bageenaꞌonaa miiminaꞌonon, anaami bushiisheenaꞌonaa maache bushiisheenaꞌonon hidii maatone.

²⁵ Wonnee tiijjaꞌa hanaach beddaahaa, noonnaa no qaabbechinaꞌona no Nuggishoo Doono Yeeri toommooch axaaxoon no shuunetoyich, no Nuggishoo Doono Yeerichi qaaroonoo waayo no qajjetoyich, no yeelloon beeroochoommon heci, no cooneyoonoo qoreddoochoommon ukeree, qebone.