Erimiyaasi 29 - Kafa Linguistics Project

Erimiyaasi Baabloon Daachiiti Koorichoo

¹ Yerusaalemee Baabloonee showooch Nabukadinatsori keccii daammiti geeneenaꞌoyich, qeesheenaꞌoyich, keemechinaꞌonaa asho bullinoyich, keemechi Erimiyaasi Yerusaalemee ebi koorichoon daachiihe.

² Ebi tuneto taatoo Yoyakiini, bi indee gennee abeeti, taatee kechi iraasheenaꞌo, Yihudee showeexi ukkireenaꞌonaa Yerusaalemi katemeexi ukkireenaꞌona, qoppechinaꞌonaa qemminaꞌona Yerusaalemee kecaa hammitoyee gubbiye.

³ Erimiyaasi ebi koorichoon bi daachiito, Yihudee taatoo Sedeqiyaasi Baabloonee taatoo Nabukadinatsor waan, Baabloonee showooch bi wocheti Shafaanichi bushoo Elasaahinaa Hiliqiyichi bushoo Gemaariyinochi kishoonane. Koorichoo ishichii beetone:

⁴ Israꞌeelee Nuggishoo Beshe Mawe Doono Yeeri Yerusaalemee Baabloonee showooch kecaa boonoshi hammemmoyich bi tuniiti keceenaꞌo bullich ishichii beetone:

⁵ “Kexon hagiree arooch beebote; bechoon bechiree bi aafoon mamote;

⁶ mecheen shaagote; anaami bushiisheenaꞌonaa maache bushiisheenaꞌonon shibote; ittoshi anaami bushiisheenaꞌonaa maache bushiisheenaꞌonon shaakkiibote; boonoshiyoo anaami bushiisheenaꞌonaa maache bushiisheenaꞌonon shibeete; aroochaa meetote; haddoona giisheyaahote.

⁷ Kecaa ittoshi hammemmoyich ta tuniiti katemoyich diggoon qaawibote; ebi katemoyichoo Doono Yeeri ta waan corootibote; ebiyoo bi diggegaata, ittoshiyoo diggemmo ittoshi tunetoyichiye” iye.

⁸ Ebich Israꞌeelee Nuggishoo Beshe Mawe Doono Yeeri ishichiye: “Ittoshi daggooch beeti keemechinaꞌonaa kaayechinaꞌona ittoshin dawushaayeete; boonoshi gummiibeeti gumonoo waayeyaahote;

⁹ ebi ta shigoona ittoshich boonoshi keemmiibeeto kootoone; ta boonoshin wochaa daachiyaano taane” iye Doono Yeeri.

¹⁰ Doono Yeeri ishichiye: “Baabloonee showooch ittoshi koteti shabe nato ceeniyooba ittoshin guudi beeggemmo taane; ta qaaroon ceechoona hini showooch ittoshin wochemmo taane.

¹¹ Ittoshich ta gabaa beeti gaboon ariibeeto taane” iye Doono Yeeri. “Ebi gaboo bi ciiro gaawoonaa gibeneetona tuneti diggeechoani gonde gaboo toonoone.

¹² Ittoshiyoo taan ceeggemmo ittoshine; waaree ta waan corootemmo ittoshine; tawoo ittoshin waayemmo taane.

¹³ Taan qaawemmo ittoshine; ittoshi ceeni mulloona taan qaawiree danemmo ittoshine.

¹⁴ Tawoo ittoshich danemmo taane” iye Doono Yeeri. “Ittoshi kecoon wochemmo taane; aagetoo bulliichee, ittoshin ta yookketi xaaꞌoo bulliichee wochemmo taane” iye Doono Yeeri. “Kecooch ittoshin ta daachiiti showoochee wochi deebemmo taane” iye.

¹⁵ Ittoshiyoo “Doono Yeeri Baabloonee showooch keemechon nooch tiijjitone” ito ittoshine.

¹⁶ Tunebaani Daawitichi taatee qeenooch koteti taatoochonaa ittoshina tookkii kecaa hamaani, wottoo hini katemooch koteti ittoshi xibeenaꞌo bullinochon Doono Yeeri gettii beeton waayebote.

¹⁷ Beshe Mawe Doono Yeeri ishichiye: “Boonoshi toommooch goraadoon, shaacoonaa biiyoonon deejjemmo taane; bi gondoochee tiyitona mamoyich hakkeyaani gonde balaasoommon boonoshin tuniyemmo taane.

¹⁸ Goraadoona, shaacoona, biiyoonoo boonoshin yookkemmo taane; boonoshin ta yookketi taatittino bulliichaa, wuche, getteetinaꞌo boonoshin tuniyemmo taane; boonoshin ta yookketi aagetoo bulli daggoochoo ufo, keqqoo, boonoshi toommooch shokkeyoonaa cooneyoonoyich tuniyemmo taane;

^19-20 ebiyoo ta qaaroon waayo boonoshi qajjitoyichiye” iye Doono Yeeri. “Keemechi ta guuninaꞌon wochii wochii boonoshi waan daachiihoye; tunebaani waayeyaaneenaꞌone. Yerusaalemee Baabloonee showooch ta yookketi bulli keceenaꞌote, Doono Yeeri ta qaaroon waayebote” iye Doono Yeeri.

²¹ Israꞌeelee Nuggishoo Beshe Mawe Doono Yeerichi shigoona koote keemoon ittoshich keemmiibeeti Qolaayichi bushoo Akaabinaa Maseyaahichi bushoo Sedeqiyaasinochon ishichiye: “Boonoshin Baabloonee taatoo Nabukadinatsorichi kishooch beshiiree immemmo taane; ittoshi aafoochaa boonoshin wuxemmone;

²² boonoshi naboona Baabloonee showooch beeti Yihudee keco bulli ‘Baabloonee taatoo qaaqqoona michiti Sedeqiyaasinaa Akaabinochoommon Doono Yeeri neen tuniibe’ geti maxxaaremminaꞌone.

²³ Ebiyoo Israꞌeeleenaꞌo daggooch yeexeree mooyon boonoshi tuniitoyich, boonoshi giyeenaꞌochi mecheenaꞌona tookkii boonoshi shadditoyich, boonoshich ta getaani qaaroon ta shigoona kootoon boonoshi gettitoyichiye; ebinoo ta ariibeeto taane; miixoo taane” iye Doono Yeeri.

Shemayaahi Daachiiti Wocho

^24-25 Israꞌeelee Nuggishoo Beshe Mawe Doono Yeeri Erimiyaasich ishichiye: “Nehelaamee asho Shemayaahich ishichibe: Yerusaalem beeti asho bullich, Maseyaahichi bushoo qeeshoo Sofoniyaasich, qeesheenaꞌo bullichoo, ne shigoona koorichoon daachiito neene. Sofoniyaasichoo ishichito neene:

²⁶ ‘Doono Yeerichi yaafee kexoochaa, geyeebee keemoon keemmiibeeti asho bullin baatee giindoona ne giindemmonaa bi qettooch sansalatoon ne geddemmonoyich, Yoyaadichi xaaꞌooch Doono Yeeri neen qeeshoo tuniiꞌi ukkiriitone.

²⁷ And neech keemoon keemmiibeeti, Anaatootee asho Erimiyaasin amoyich kaareyaachine?

²⁸ Biyoo “Keco wottemmo batt yagoo bi tunetoyich, kexon hagiree arooch kotebote; bechoon bechiree bi aafoon mamote” iꞌi no waan Baabloonee showooch wochetone,’ ito neene gete” iye.

²⁹ Qeeshoo Sofoniyaasi ebi koorichoon keemechi Erimiyaasich shemmehe.

³⁰ Aroochee Doono Yeeri Erimiyaasich gettiti qaaro ebine:

³¹ “Doono Yeeri, Nehelaamee asho Shemayaahichon ishichii beetone getiree keco bullich wochoon daachiibe: ‘Ta wocheyaanoon Shemayaahi keemoon bi keemmitoyich, koote mooyon ittoshi gibenemmoyich bi tuniitoyich,

³² Doono Yeeri ta, Nehelaamee asho Shemayaahinaa bi gumbeenaꞌonon naxemmo taane; ta asheenaꞌoyich ta tuniyemmi gaawe mooyon beeggemmi asho bi gumboochee hini asheenaꞌo daggooch ikkolla daneyaachemmone; ebiyoo Doono Yeeri ta toommooch hukkoon bi yibbaatetoyichiye’ itone gete” iye.