Erimiyaasi 28 - Kafa Linguistics Project

Hanaaniyi Keemmiti Koote Keemo

¹ Aroobee natooch, Yihudee taatoo Sedeqiyaasichi batti batti taatee yemeenooch, awuddinnee natoobee uuchinnee agenooch, Gibeꞌooni katemeexi keemecho, Azuuri bushoo Hanaaniyi Doono Yeerichi yaafee kexoochaa, asho bullinaa qeesheenaꞌona beetoochaa taach ishichiye:

² “Israꞌeelee Nuggishoo Beshe Mawe Doono Yeeri ishichiye: Baabloonee taatoochi waanjoon tiichemmo taane.

³ Baabloonee taatoo Nabukadinatsori hini xaaꞌoochee Baabloonee showooch daammiti Doono Yeerichi yaafee kechi qiicoon gutte nati daggooch hini xaaꞌooch wochemmo taane.

⁴ Baabloonee showooch hammiti Yihudee taatoo Yoyaqiimichi bushoo Yoyakiininaa Yihudee keco bullinon, hini xaaꞌooch wochemmo taane, iye Doono Yeeri. Ebiyoo Baabloonee taatoochi waanjoon tiichemmo ta tunetoyichiye” iye.

⁵ Tawoo qeesheenaꞌonaa Doono Yeerichi yaafee kexooch neexeti asho bullinochi aafoochaa keemechi Hanaaniyich ishichiyo:

⁶ “Ameena, Doono Yeeri ebin tuniibe; Doono Yeerichi yaafee kechi qiicoonaa keco bullinon Baabloonee showoochee hini xaaꞌooch wochoona, Doono Yeeri ne keemmeti keemoon ceechibe.

⁷ Tunebaani neennaa hini asho bullinoyich ta gettaabeeti qaaroon and waayebe:

⁸ Wonnee tiijjiꞌi, neennaa taannoyee shiichiꞌi tiyiti keemechinaꞌo, meeti showeenaꞌonaa ogooge taatittineenaꞌonochi toommooch, gineechon, aalleechonaa naxeechonon keemmitinaꞌone.

⁹ Tunebaani diggeechon keemmiti keemecho, Doono Yeeri iberoo biin deejjito tuno bi arichemmo, bi keemmiti qaaro bi ceeniyoobaniye” iyo.

¹⁰ Keemechi Hanaaniyi ta qettoochee waanjoon kindiiꞌi tiichiye.

¹¹ Aroochee Hanaaniyi asho bulli aafoochaa, “Doono Yeeri ishichiye: Ebiyoommon gutte nati daggooch Baabloonee taatoo Nabukadinatsorichi waanjoon, aagetoo bullichi qettoochee tiichemmo taane itone” iye. Ebina tawoo ta gommon yechaa hammeho.

¹² Keemechi Hanaaniyi ta qettoochee waanjoon bi tiichiti giisheche aaboyee gubb, Doono Yeeri taach gettiti qaaro ebine:

¹³ “Hamiree Hanaaniyich ishichi gete: ‘Doono Yeeri ishichiye: Ne, michi waanjoon tiicheto neene; tunebaani ta, bi keroon xuuree waanjoon shuunemmo taane.

¹⁴ Baabloonee taatoo Nabukadinatsorich boonoshi hajjeyemmoyich ebi aageteenaꞌo bullichi qettooch xuuree waanjoon haxxemmo taane; boonoshiyoo biich hajjeyemminaꞌone; kubbi cooxinaꞌolla biich hajjeyemmoyich tuniyemmo taane; Israꞌeelee Nuggishoo Beshe Mawe Doono Yeeri ta ebin getteto taane itone’ gete” iye.

¹⁵ Tawoo ebin Hanaaniyich ishichaꞌa getteho: “Hanaaniyo, waayebe: Neen Doono Yeeri wocheyaanoone; ne hini asho bulli koote mooyon bi gibenemmoyich tuniito neene.

¹⁶ Ebich Doono Yeeri ishichiye: ‘Showee toommoochee neen aalliyemmo taane; Doono Yeeri ta toommooch hukkoon ne yibbaatetoyich, hini natooch qitemmo neene’ itone” iyo.

¹⁷ Hanaaniyi ebi are natooch, shabaattinnee agenooch qitiye.