Erimiyaasi 27 - Kafa Linguistics Project

Erimiyaasi Waanjoon Bi Qettooch Xandoo

¹ Yihudee taatoo Yosiyaasichi bushoo Sedeqiyaasichi batti batti taatee yemeenooch Doono Yeeri taach ishichiye:

² “Waanjoon qannii shachoon gedi ne qettooch xandibe.

³ Yihudee taatoo Sedeqiyaas waan Yerusaalem waati wocheyechinaꞌo kishoona, Edoomee taatoyich, Moꞌabee taatoyich, Amooni yareenaꞌochi taatoyich, Xiroosee taatoyich, Sidoonee taatoyich, wochoon daachiibe.

⁴ Boonoshi dooninaꞌoyich boonoshi gettemmi hini wochoon boonoshich waayiibe. Israꞌeelee Nuggishoo Beshe Mawe Doono Yeeri ishichiye: Ittoshi dooninaꞌoyich ebin getote:

⁵ ‘Showoon, showee toommooch beeti asheenaꞌonaa cooxinaꞌonon ooge ta hakkoona wottoo yaggeeti ta mochoona hallito taane; ta ciinaa gaawetoyich ebin immemmo taane.

⁶ Andoo ebi showoo bullin ta maddecho tuneti Baabloonee taatoo Nabukadinatsorich immeto taane; biich boonoshi hajjeyemmoyich, kubbi cooxinaꞌonoo immeto taane.

⁷ Bi showoo baroyich tunemmi aabo waammi wottoon aagetoo bulli biich, bi bushoonaa bi bushaa bushiisheenaꞌonoyich hajjeyemmone; aroyee gubb meeti aageteenaꞌonaa ogooge taateenaꞌona biin hajjemminaꞌone.

⁸ “ ‘Tunebaani amee aagetoo woyee taatittinolla Baabloonee taatoo Nabukadinatsorich maddoon, bi waanjoyich qettoo imon bi qayigaata, Nabukadinatsorichi kishoona ta aalliimmi wottoon goraadoona, shaacoona, biiyoonoo naxemmo taane, iye Doono Yeeri.

⁹ Ebich “Baabloonee taatoyich hajjeyaachemmo ittoshine” ii beeti ittoshi keemechinaꞌon, kaayechinaꞌon, gumon maaccechinaꞌon, qaaxechinaꞌonaa mareccee maaccechinaꞌonon waayeyaahote.

¹⁰ Ebiyoo ittoshi showoochee kecaa wohi showooch ittoshi hammemmoyich, tawoo ittoshin ta yookkemmonaa ittoshi aallemmonoyich koote keemoon boonoshi keemmii beetoyichiye.

¹¹ Tunebaani Baabloonee taatoochi waanjoyich bi qettoon immii, wottoo biich maddeebeeti asheenaꞌon boonoshi showooch echiyemmo taane; boonoshiyoo gochemminaꞌone; aroochoo kotemminaꞌone, iye Doono Yeeri’ getote gete” iye.

¹² Yihudee taatoo Sedeqiyaasich ebi mooyon ishichaꞌa getteho: “Baabloonee taatoochi waanjoyich qettoon imbote; biinnaa bi asheenaꞌonoyich maddebote; kashoona beeyemmo ittoshine.

¹³ Baabloonee taatoyich maddaani ashichon Doono Yeeri gettitoommon, neennaa ne ashoona, goraadoona, shaacoona, biiyoonoo ittoshi qitemmo amoyichiye?

¹⁴ Koote keemoon boonoshi keemmii beetoyich, ‘Baabloonee taatoyich maddaachemmo ittoshine’ ii beeti keemechinaꞌon waayeyaahote.

¹⁵ Doono Yeeri ‘Ta boonoshin deejjaano taane; tunebaani ittoshin ta yookkemmoyich, ittoshiyoo aallemmoyich tuniiya ta shigoona kootoon keemmii beetinaꞌone; ittoshiyoo ebi ittoshich kootoon keemmii beetinaꞌoo aallemmo ittoshine’ itone” iyo.

¹⁶ Aroochee qeesheenaꞌonaa asho bullinoyich ishichaꞌa getteho: “Doono Yeeri ishichiye: ‘ “Doono Yeerichi yaafee kechi qiico Baabloonee showoochee katinoon wottemmone” iꞌi ittoshich keemmiibeeti ittoshi keemechinaꞌon waayeyaahote; ebi boonoshi keemmiibeeto kootoone.

¹⁷ Boonoshichon waayeyaahote; Baabloonee taatoyich maddiree kashoona beebote; hini katemoo aallemmo amoyichiye?

¹⁸ Boonoshi ibere keemechinaꞌo boonoshi tunegaata, Doono Yeeri ta qaaro boonoshi waan bi beegaata, Doono Yeeri ta yaafee kexooch, Yihudee taatee kexooch, Yerusaalem echeti qiico Baabloonee showooch bi hamaachemmoyich, Beshe Mawe Doono Yeeri taan qollebeete.

^19-20 Baabloonee taatoo Nabukadinatsori Yihudee taatoo Yoyaqiimichi bushoo Yoyakiinin, Yihudee showoonaa Yerusaaleminoochee ogoogeenaꞌo bullin keccii Yerusaalemi katemoochee Baabloonee showooch bi daamiyooba hini katemooch echeti giimbeenaꞌochon, goonoochon, qiicee koteenaꞌochonaa baribare qiiceenaꞌochonon Beshe Mawe Doono Yeeri ta getteto taane.

²¹ Doono Yeerichi yaafee kexooch, Yihudee taatee kexooch, Yerusaalemi katemooch echeti qiiceechon Israꞌeelee Nuggishoo Beshe Mawe Doono Yeeri ta getteto taane:

²² Ta gaboon boonoshi waan ta wochimmi wottoon Baabloonee showooch daammeyemminaꞌone; arooch kotemminaꞌone. Aroochee boonoshin wochi deebemmo taane; hini showoochoo woyemminaꞌone’ itone” iyoye.