Erimiyaasi 26 - Kafa Linguistics Project

Nallee Gabberooch Erimiyaasi Giddo

¹ Yihudee taatoo Yosiyaasichi bushoo Yoyaqiimi taateti katinooch Doono Yeeri taach ishichiye:

² “Doono Yeerichi yaafee kechi addibaabooch neexebe; Doono Yeerichi yaafee kexooch goyinnoyich Yihudee katemeenaꞌoochee waabeeti asheenaꞌoyich ne gettemmoyich ta getteti qaaro bullin gete; ikke qaaroonolla shappiiyaahine.

³ Waayeree asheenaꞌo boonoshi ikkikkoona gonde gommoochee diqqich wottemminaꞌone; tawoo boonoshi gonde shuunoyich, boonoshi toommooch deeba ta gabiti gonde mooyon qajjemmo taane.

⁴ “Boonoshich Doono Yeeri ishichiye: ‘Ittoshich ta immeti sheeroona beemoyich taachon waayoon,

⁵ wochii wochii ittoshi waan ta deejjiti ta maddechinaꞌo tuneti keemechinaꞌochi qaaroonoo waayoon qajjito ittoshine; andoo waayo ittoshi qayigaata,

⁶ Shiloohi toommooch ta tuniitoommon, hini yaafee kechi toommooch tuniyemmo taane; hini katemoonoo showee toommeexi aagetoo bulliich ufon tuniyemmo taane’ itone gete” iye.

⁷ Doono Yeerichi yaafee kexoochaa Erimiyaasi ebi qaaroon bi gettii beetaa qeesheenaꞌo, keemechinaꞌonaa asho bullina waayehe.

⁸ Erimiyaasiyoo asho bullich bi gettemmoyich Doono Yeeri biich gettiton bi ciichiyee, qeesheenaꞌo, keemechinaꞌonaa asho bullina biin yechiꞌi, “Qitemmo neene.

⁹ ‘Shiloohi katemee toommooch tunetoommo hini Yeerichi yaafee kexooch tunemmone; hini katemoo shokkoonaa onoonon tunemmone’ iyaꞌa Doono Yeerichi shigoona amoyich keemoon keemmenne?” iyeete. Asho bulliyoo Doono Yeerichi yaafee kexoochaa kiceeꞌi Erimiyaasi toommooch tiyiye.

¹⁰ Yihudee ukkireenaꞌo ebin waayeꞌi, taatee kexoochee Doono Yeerichi yaafee kexooch hammiyeete. Hammiꞌi Doono Yeerichi yaafee kechi Andire Kellooch koteheete.

¹¹ Qeesheenaꞌonaa keemechinaꞌona, ukkireenaꞌonaa asho bullinoyich “Ittoshi hajjee waamona ittoshi waayetoommon, hini katemee toommooch keemoon bi keemmitoyich hini uro qita bedoone” iyeete.

¹² Erimiyaasiyoo ukkireenaꞌonaa asho bullinoyich “Ebi ittoshi waayeti qaaro bullin, hini Yeerichi yaafee kexonaa hini katemoonooch ta keemmemmoyich Doono Yeeri taan wochetone.

¹³ Andoo ittoshi gommonaa ittoshi shuunoonon gaawichibote; ittoshi Nuggishoo Doono Yeerichi qaaroon waayebote; Doono Yeeri ittoshi toommooch tuniiya bi iti gonde mooyon qajjemmone.

¹⁴ And ta, ittoshi kishooch ta tunetoyich, ittoshich gaawetonaa kaamoona shaahiton ta toommooch tuniibote.

¹⁵ Tunebaani ebi bulli qaaroon ittoshich ta gettemmoyich iberoochaa taan wocheto Doono Yeeri bi tunetoyich, taan ittoshi wuxigaata, xalle damee hiishoo ittoshi toommooch, hini katemee toommooch, arooch beetinaꞌo toommooch bi tunoon ariibote” iye.

¹⁶ Aroochee ukkireenaꞌonaa asho bullina, qeesheenaꞌonaa keemechinaꞌonoyich “Hini uro no Nuggishoo Doono Yeeri shigoona keemoon nooch bi keemmitoyich, qita bedaache” iyeete.

¹⁷ Showee geeneenaꞌoochee ikkikkeenaꞌo tiyiꞌi kiceeti asho bullich ishichiyeete:

¹⁸ “Moreshetee asho Mikiyaasi Yihudee taatoo Hiziqiyaasichi taatee yemeenooch, Yihudee asho bullich ishichiꞌi keemoon keemmitone: ‘Beshe Mawe Doono Yeeri ishichiye: Tsiyooni, budochoommon gocheyemmine; Yerusaalemi, buricee gutoon tunemmine; Yeerichi yaafee kexo shuuneeti geppoochoo eho collemmone’ itone.

¹⁹ “Yihudee taatoo Hiziqiyaasinaa Yihudee asho bullina biin wuxiteete? Hiziqiyaasi Doono Yeerin shattiꞌi Doono Yeerichi ariqqoon qolleyaanoone? Doono Yeeriyoo boonoshi toommooch deeba bi iti gonde mooyon qayaanoone? Tunebaani no, no toommooch gonde mooyon deebaaniye no beeto” iyeete.

²⁰ Doono Yeerichi shigoona keemoon keemmiti bare asho arooch beetone; biyoo Qiriyaat Yeꞌariimi asho Shemayaahichi bushoo Uuriyine; ebi katemoonaa ebi showoonochi toommooch Erimiyaasi keemmitoommon keemmiye.

²¹ Yoyaqiimi, bi ginee iraasheenaꞌonaa bi ukkireenaꞌona ebi bi keemoon waayeheete; taatoo biin wuxiya qaawiye; tunebaani Uuriyi ebin waayeꞌi, shattiye; Gibitsoo goojjii hammiꞌi muricciye.

²² Taatoo Yoyaqiimi Akiboori bushoo Elinaataanin bare asheenaꞌona tookkii Gibits daachiihe.

²³ Gibitsee Uuriyin kichiꞌi taatoo Yoyaqiim waan yechii waaheete; Yoyaqiimiyoo Uuriyin goraadoona wuxiye; bi dubenoonoo asheenaꞌochi maashooch duppiye.

²⁴ Tunebaani Shafaanichi bushoo Ahiqaami Erimiyaasin gaachee bi beetoyich asheenaꞌo biin wuxemmoyich icheyaanoone.