Erimiyaasi 25 - Kafa Linguistics Project

Shabe Nati Keccee Yemeeno

¹ Yihudee taatoo Yosiyaasichi bushoo Yoyaqiimi taateti awuddinnee natooch, Baabloone taatoo Nabukadinatsori taateti ikkinnee natooch, Yihudee asheenaꞌochon Doono Yeeri taach gettiye.

² Ebich tawoo Yihudee showeexi asho bullinaa Yerusaalem beeti asho bullinoyich ishichiyo:

³ “Yihudee taatoo Amooni bushoo Yosiyaasi taateti aaraa keejjinnee natoochee tiijjiꞌi hanaach beddaahaa beeti hiyaa keejje nati wottoon Doono Yeeri bi qaaroon taach gettii beehe; tawoo kuxaanoon ittoshich gettaa beehoye; tunebaani ittoshi waayeyaano ittoshine.

⁴ Doono Yeerichi keemechi bi guuninaꞌo bullin wochii wochii deejjii beehe; tunebaani ittoshi elleyaano ittoshine; ebinoo mooch gedaano ittoshine.

⁵ Ebi keemechinaꞌo ‘Ittoshi bulliyona ittoshi gonde gommonaa ittoshi gonde shuunoonoochee wottebote; Doono Yeeri ittoshinaa ittoshi qaabbechinaꞌonoyich wonnee tiijjiꞌi bulli aaboyich bi immiti showooch kotemmo ittoshine;

⁶ boonoshich goyinnoonaa maddoonoyich, bare nuggisheenaꞌon dabbiyaahote; ittoshi toommooch gonde mooyon bi tuniyaachemmoyich, ittoshi kishee shuunoo tuneti shahalloona bi kaaroon booddaahote’ iyeete. Ebi tunegaata ittoshin naxeyaachemmone.

⁷ Doono Yeeri ishichiye: ‘Taan ellee waayeyaano ittoshine; ittoshi toommoochoo gonde mooyon deeboyich, ittoshi kishee shuunoo tuneti shahalloona taan ippiihote’ iye.

⁸ “Ebich Beshe Mawe Doono Yeeri ishichiye: ‘Ta qaaroyich deꞌa geto ittoshi qajjitoyich,

⁹ dambi-waan beeti yoodo bullinaa ta guuno biyoo Baabloonee taatoo Nabukadinatsorinon deejjemmo taane; hini showoonaa arooch beetinaꞌonon, bi guudoona beeti asho bullin boonoshi kochemmoyich deebemmo taane; ciroona boonoshin aalliyemmo taane; wuche boonoshi getteyemmoyich, boonoshi toommooch bi shokkeyemmoyich, bulli aaboochoo boonoshi aallemmonoyich tuniyemmo taane.

¹⁰ Ebiyee wotta boonoshi waanee emiree qaaroonaa ililee qaaroonon, woꞌee kenoochi qaaroonaa woꞌee qaaroonon, maayi yiikkee qaaroonaa ceechee bekkoonon aalliyemmo taane.

¹¹ Ebi showoo bulli aallemmone; duubemmone; asheenaꞌo Baabloonee taatoyich shabe naton hajjeyemminaꞌone.

¹² “ ‘Shabe nato ciiretoyee gubb, Baabloonee taatoonaa are aagetoonon, boonoshi axaaxoyich sheeremmo taane; Baabloonee showoonoo bulli aabooch shokkoon echiyemmo taane’ iye Doono Yeeri.

¹³ ‘Are showee toommooch ta getteti qaaro bullin, hini macaafooch kooreeti, Erimiyaasi aageteenaꞌo bulli toommooch keemmiti mooyo bullin deebemmo taane.

¹⁴ Meeti aageteenaꞌonaa ogooge taateenaꞌona boonoshin hajjemminaꞌone; tawoo boonoshi tuniitoommonaa boonoshi kishee shuunoommonon boonoshich qoccemmo taane’ itone” iyo.

Aageteenaꞌo Toommooch Nalleyemmi Nalloo

¹⁵ Israꞌeelee Nuggishoo Doono Yeeri taach ishichiye: “Hini kaareechi woyinee uyee xoofoon ta kishoochee deꞌe; neen ta wochaabeeti aageteenaꞌo bulli uchemmoyich tuniibe.

¹⁶ Boonoshi uyihooba daddeddemminaꞌone; boonoshi daggooch ta deejjiibeeti goraadee naboona geyemminaꞌone” iye.

¹⁷ Ebich tawoo Doono Yeeri kishoochee xoofoon deqqaꞌa, taan bi daachiiti aageteenaꞌo bullich uchiyo.

¹⁸ Hanaach tunetoommon, shokkaachoonaa amolla aalloona, cooneyoonaa ufonon boonoshi tunemmoyich, Yerusaalemi katemoyich, Yihudee katemeenaꞌoyich, bi taateenaꞌonaa bi iraasheenaꞌonoyich uchiyo;

¹⁹ Gibitsee taatoo Faroonich, bi maddechinaꞌoyich, bi ukkireenaꞌonaa bi asho bullinoyich,

²⁰ boonoshi daggooch beeti dallaawe asho bullich, Uutsi showee taateenaꞌo bullich, Filsixeemee showeexi katemeenaꞌo tuneti, Ashiqeloonichi, Gaazichi, Eqiroonichi, Ashidoodi maccee cureenaꞌochi taateenaꞌo bullich,

²¹ Edoomich, Moꞌabich, Amooni yareenaꞌoyich,

²² Xiroosee taateenaꞌonaa Sidoonee taateenaꞌona bullich, baharoyee bekk beeti showee daareexi taateenaꞌo bullich,

²³ Dedaanich, Teemich, Buuzich, boonoshi qelloon qebbeeti asheenaꞌo bullich,

²⁴ Arabee taateenaꞌo bullinaa barahooch beeti baribare yoodeenaꞌochi taateenaꞌo bullich,

²⁵ Zimirich, Elaaminaa Meedinochi taateenaꞌo bullich,

²⁶ dambi-waan beeti taateenaꞌo bullich, katinoonaa wohonooch, ikkoochi hillooch baroyich, showee toommooch beeti taatittino bullich uchiyo; boonoshi hillooch wotta Sheshaakee taatoo uchemmone.

²⁷ “Aroochee boonoshich ishichibe: ‘Israꞌeelee Nuggishoo Beshe Mawe Doono Yeeri ishichiye: Ittoshi daggooch ta deejjemmi goraadee naboona, uyote; mashebote; cooyote; ebiyee bekk tiyaachemmon tuneree dihibote’ gete.

²⁸ Uyoyich ne kishoochee deꞌon boonoshi qayigaata, boonoshich ishichibe: ‘Beshe Mawe Doono Yeeri ishichiye: Giidoona yeshaa uchemmo ittoshine!

²⁹ Gonde mooyon shiichi ta shigoona ceekketi katemooch tuniyemmo taane; ishigaata naxoochee echehote? Showee toommooch beetinaꞌo bulli toommooch goraadoon deebemmo ta tunetoyich, naxeyaanoon echeyaachemmo ittoshine’ iye Beshe Mawe Doono Yeeri.

³⁰ “Ebich ne hini qaaro bullin boonoshi toommooch keembe; boonoshich ishichibe: ‘Doono Yeeri dambaa cookii beetone; yaafe bi beeyi xaaꞌoochaa bi qaaroon waayii beetone; bi bageenaꞌo toommooch oogichii cookii beetone; woyinoon hiiccii beetinaꞌochoommon, showooch beetinaꞌo bulli toommooch cookii beetone.

³¹ Doono Yeeri aageteenaꞌona tookki taggemmi taggoo bi beetoyich, bi qaaro showee tuggooch beddaahaa shaggemmone; meeno taheto bullin nallooch giddiyemmone; gondeenaꞌonoo goraadoyich tuniyemmone’ gete” iye Doono Yeeri.

³² Beshe Mawe Doono Yeeri ishichiye: “Ebiyoche gonde mooyo aagetoochee aagetooch beshee beetone; giidechi yuboo showee daaroochee tiyii beetone” iye.

³³ Ebiyooba Doono Yeeri wuxitinaꞌo showee tuggoochee showee tuggooch beddaahaa yacheyemminaꞌone. Boonoshich eeppeyaachemmone; ikkooch kiceyaachemminaꞌone; dukkeyaachemminaꞌone; showee toommooch guudoochoommon qixeyemminaꞌone.

³⁴ Qiddeenaꞌote, eefote; cookishoo getote; hini bageenaꞌochi dooninaꞌote, tullooch gederebote; ebiyoo ittoshi guureyemmi aabo bi shaggitoyich, macecikkiti nuuqqee qiico buricoommon dihi buricemmo ittoshi tunetoyichiye.

³⁵ Qiddeenaꞌo woci wodemmi, bagee dooninaꞌo muriccemmi xaaꞌoo aalloone.

³⁶ Boonoshi bageenaꞌochi gaddeenaꞌon Doono Yeeri aalliitoyich, qiddeenaꞌochi cookoon, bagee dooninaꞌochi uukkoon waayebote.

³⁷ Doono Yeerichi manje kaaroochee tiyitona diggee mago happeetone.

³⁸ Daaheroo bi gofoon qayoommon Doono Yeeri bi beeyi xaaꞌoon qajjemmone; xuuxiyechochi goraadoonaa Doono Yeerichi kupphe kaaroonoochee tiyitona boonoshi showoo shokko echemmone.