Erimiyaasi 24 - Kafa Linguistics Project

Gutte Mokkee Balaasee Aafeenaꞌochi Shaahiyoo

¹ Baabloonee taatoo Nabukadinatsori Yihudee taatoo Yoyaqiimichi bushoo Yoyakiinin, Yihudee iraasheenaꞌon, qoppechinaꞌonaa qemminaꞌonon Yerusaalemee keccii Baabloonee showooch bi daammitoyee gubb, Doono Yeeri taach hini yaaꞌoon bekkiihe; Doono Yeerichi yaafee kechi ciinooch gutte mokkee balaasee aafo koteꞌi beehe.

² Batti batti mokkeexo qaabbii aafetoommi phixxaashe balaasoone; guttinnee mokkeexo bi gondoochee tiyitona mamoyich hakkeyaani gonde balaasoone.

³ Doono Yeeriyoo “Erimiyaaso, amooniye ne ciinnaabeeto?” iye. Tawoo “Ta ciinnaabeeto gaawe phixxaashe balaasoonaa gondee goriqqiti, mamoyichoo hakkeyaani balaasoononiye” iyo.

⁴ Aroochee Doono Yeeri taach ishichiye:

⁵ “Israꞌeelee Nuggishoo Doono Yeeri ishichiye: Ebi gaawe balaasechoommon hini boonoshi hajjee showoochee Baabloonee showooch ta yookketi Yihudee kecoon deꞌoona gabemmo taane.

⁶ Deꞌe mooyoyich ta aafoon boonoshi waan wochemmo taane; hini showooch boonoshin wochi deebemmo taane; boonoshin hagishalli ta gettemmo happaachemmo taane; boonoshin bechishalli ta gettemmo waaxaachemmo taane.

⁷ Ta, Doono Yeeri ta tunoon ariyemmi mulloon boonoshich immemmo taane; boonoshi ceeni mulloona ta waan wottemminaꞌo boonoshi tunetoyich, ta asheenaꞌon tunemminaꞌone; tawoo boonoshich Nuggishoo tunemmo taane.

⁸ “Doono Yeeri ta ishichiyoye: Yihudee taatoo Sedeqiyaasin, bi iraasheenaꞌon, hini showooch echeti Yerusaalemi beeti cureenaꞌon, Gibits beetinaꞌonoo, bi gondoochee tiyitona mamoyich hakkeyaani gonde balaasoommon tuniyemmo taane.

⁹ Showee taatittino bulliichaa, wuche getteetinaꞌo tuniyemmo taane; boonoshin ta yookketi xaaꞌoo bulliichaa tocheyoyich, shixxeyoonaa ufonoyich tuniyemmo taane.

¹⁰ Boonoshinaa boonoshi qaabbechinaꞌonoyich ta immeti showoochee boonoshi aallemmi wottoon boonoshi daggooch goraadoon, shaacoonaa biiyoonon deejjemmo taane” iye.