Erimiyaasi 23 - Kafa Linguistics Project

Gubbich Gibenikkeeti Gibeno

¹ “Ta gaddooch beeti ta bageenaꞌon aallii beetinaꞌonaa shaccii beetinaꞌonoyich woowo!” iye Doono Yeeri.

² Ebich Israꞌeelee Nuggishoo Doono Yeeri bi asheenaꞌon qiddeebeeti qiddeenaꞌoyich ishichiye: “Ta bageenaꞌon gaawichii quyoon qajjiichii shaccito ittoshine; yookkiinoo aalliito ittoshine; tawoo ebi ittoshi gondoyich ittoshin sheeremmo taane” iye Doono Yeeri.

³ “Ta bagee cureenaꞌon boonoshin ta yookketi showoo bulliichee kicemmo taane; wochiree boonoshi showooch boonoshin deebemmo taane; boonoshiyoo aafemminaꞌone; meettemminaꞌone.

⁴ Boonoshin shiimeree qiddemmi qiddeenaꞌon boonoshich ukkiriyemmo taane; wochinnoon shataachemminaꞌone; keqqaachemminaꞌone; boonoshiichee ikkolla aalleyaachemmone” iye Doono Yeeri.

⁵ Doono Yeeri ishichiye: “Daawitichi gumboochee cadiqo tuneton taatoo bi tunemmoyich, ta kaaccemmi yemeeno woyemmone; ebi taatoo ariyoona qeejjemmone; showee toommooch dayinnetoonaa cadiqoona tuneti mooyon tuniyemmone.

⁶ Bi taatee yemeenooch Yihudee asheenaꞌo wodemminaꞌone; Israꞌeeleenaꞌo keqqaalloon beeyemminaꞌone. Bi ceeggeyemmoo ‘No Cadiqoo Doono Yeeri’ getenane.

⁷ “Ebich ‘Israꞌeeleenaꞌon Gibitsee kichiti beeyechi Doono Yeeri beege’ bi getteyaachemmi yemeeno woyemmone” iye Doono Yeeri.

⁸ “Tunebaani ‘Israꞌeeleenaꞌon dambi-waaninaa bi shacciti showoo bullinoochee kichii deebiti, beeyechi Doono Yeeri beege’ getteyemmone; boonoshi hajjee showoochoo kotemminaꞌone” iye.

Koote Keemechinaꞌochon Erimiyaasi Gettiti Qaaro

⁹ Keemechinaꞌochi naboona ta mullo ta maacaa tiishetone; ta shaawusho wotwotiitone; Doono Yeerichi naboona, yaafoo tuneti bi qaaree naboona woyinee uyo yexxiti, masheti uroommon tuneto taane.

¹⁰ Showooch shunimaayeenaꞌo ceennitinaꞌone; ufi naboona showoo baggitone; baraheexi moceenaꞌo shuuqqitinaꞌone; keemechinaꞌo gonde mooyon dabbiyeete; boonoshi hakkoonoo tateyaani boochoona gaachetinaꞌone.

¹¹ “Keemechinaꞌonaa qeesheenaꞌona taach qeyaaneenaꞌo tunetinaꞌone; boonoshi gondoon ta kechi maacooch beddaahaa daneto taane” iye Doono Yeeri.

¹² “Ebich boonoshi gommo boonoshich manderee giine xaaꞌoon tunemmone; boonoshiyoo tepheeree arooch dihemminaꞌone; boonoshi naxeehooba gonde mooyon boonoshi toommooch deebemmo taane” iye Doono Yeeri.

¹³ “Shamaari katemeexi keemechinaꞌo waanee, gonde mooyon beeggeto taane: Baꞌaaloochi shigoona keemoon keemmitinaꞌone; ta asheenaꞌo tuneti Israꞌeeleenaꞌonoo muricooch yaabiyeete.

¹⁴ Yerusaalemi katemeexi keemechinaꞌo waaneenoo ciigiiti mooyon beeggeto taane: Shunoon maaheete; kootoon yibbaateheete; koniyoona bi gondoochee wotteyaachemmoyich, gondoon shuunee beetinaꞌon kupphiiheete; boonoshi bulliyona taach Sodoomiyoomminaꞌone; Yerusaalemi asheenaꞌoo Gomooriyoomminaꞌone.

¹⁵ “Ebich Beshe Mawe Doono Yeeri ta, ebi keemechinaꞌochon ta gettaabeeto ishichiiniye: ‘Eeꞌe mooyo, Yerusaalemi katemeexi keemechinaꞌo waanee kechiꞌi showoo bulliich bi taatetoyich, caame maayoon boonoshich maanjemmo taane; xuppattee aacon boonoshich uchemmo taane’ ” iye.

¹⁶ Beshe Mawe Doono Yeeri ishichiye: “Ebi keemechinaꞌo keemmiibeeti qaaroon waayeyaahote; boonoshiyoo duube gibenoon ittoshich gibenikkii beetinaꞌone; boonoshi gettiibeeto Doono Yeeri ta noonoochee kechiton tuneyaanoon boonoshi mulloochee kechiti yaaꞌooniye.

¹⁷ Doono Yeeri ta qaaroon hoxee beetinaꞌoyich wochii wochiꞌi ‘Ittoshich diggoo tunemmone’ iyeete; babbereꞌi boonoshi hajjee gaboo waan wottee beetinaꞌo bullich ‘Gonde mooyo ittoshi toommooch shagaachemmone’ iyeete” iye.

¹⁸ Boonoshi daggoochee bi qaaroon beegonaa waayoonoyich, Doono Yeerichi iitooch neexeto konine? Bi qaaroon aaxxiitonaa elletona konine?

¹⁹ Doono Yeeri kaaro gondeenaꞌochi shimbooch, buugiibeeti yuppuppe amiyochoommon, giidechi yubee yongoochoommonoo kindii beeton beege!

²⁰ Doono Yeeri kaaro bi mullee gaboon shuunee bi ciichimmi wottoon wotteyaachemmone; ebin gubbi yemeenooch ceenoona ariyemmo ittoshine.

²¹ “Ta wocheyaanoon ebi keemechinaꞌo wocciyeete; boonoshich ta getaanoon keemoon keemmiyeete.

²² Tunebaani ta iitooch boonoshi neexeto gaata, ta asheenaꞌoyich ta qaaroon awaajjeshinaꞌone; boonoshi gonde gommonaa boonoshi gonde shuunoonoochee boonoshin wocheshinaꞌone” iye.

²³ Doono Yeeri ishichiye: “Ta, katineexi Nuggishoo baach taane? Woheexi Nuggishoo toono taane?

²⁴ Asho bi qelloon aashe xaaꞌooch bi aachigaata, ta biin beegaachehote?” iye Doono Yeeri. “Showoonaa shimaayoonooch ceenneto toono taane?” iye Doono Yeeri.

²⁵ “ ‘Gummeto taane; gummeto taane’ iibee ta shigoona koote keemoon keemmiibeeti keemechinaꞌo mooyon waayeto taane.

²⁶ Boonoshi hajjee mullee maroonaa kootoonon keemmiibeeti koote keemechinaꞌo mullooch, kooto beeyemmo aati wottooniye?

²⁷ Boonoshi qaabbechinaꞌo Baꞌaaloyich goyinnoona ta shigoon battetoommon, boonoshiyoo ikkoo baroyich maacciibeeti gumona ta asheenaꞌo ta shigoon battemminaꞌo boonoshich shaahii beetone.

²⁸ Gumon gummiti keemecho bi gumon maace; tunebaani ta qaaro bi waan beeto gibeneeton tunoona ta qaaroon gete; tulloonaa teepphoonon amo daniihe?” iye Doono Yeeri.

²⁹ “Ta qaaro qaaqqoommo, xaqqoonoo buricciibeeti modooshoommo toonoone?” iye Doono Yeeri.

³⁰ “Ebich ta qaaroon shaahiiꞌi, baroochi noonoochee bi waayeton keemmiibeeti keemecho toommooch tiyeto taane” iye Doono Yeeri.

³¹ “Boonoshi mullee gaboon taachon tuniiꞌi ‘Doono Yeeri ishichiye’ ii beeti keemechinaꞌo toommooch tiyeto taane” iye Doono Yeeri.

³² “Koote gumon gummii maacciibee keemmiibeeti, aafee kupphoona kootoon keemmiibee ta asheenaꞌon muricooch yaabiibeeti keemechinaꞌo toommooch tiyeto taane” iye Doono Yeeri. “Boonoshin wocheyaano taane; boonoshin ukkiriyaano taane; ebi asheenaꞌoyich boonoshi gaaccemmo amolla aalloone” iye Doono Yeeri.

Koote Keemechinaꞌochi Keemo

³³ Doono Yeeri taach ishichiye: “Hini asheenaꞌoochee woyee keemechinaꞌoochee woyee qeesheenaꞌoochee ikkoo ‘Doono Yeerichi shaago amoone?’ iꞌi neen bi echegaata, newoo biich ‘Doono Yeerichi shaago ittoshine; ittoshin duppemmo taane itone Doono Yeeri’ gete.

³⁴ Keemecho woyee qeeshoo woyee asheenaꞌoochee ikkoo ‘Doono Yeerichi shaago’ bi getigaata biinnaa bi kechi asheenaꞌonon naxemmo taane.

³⁵ Asho bi ikkikkoona bi giyoyich woyee bi manoyich ‘Doono Yeeri ama ii wochiye? Woyee Doono Yeeri ama iye?’ gete.

³⁶ Tunebaani asho bullich shaago tuneto bi hajjee qaaro bi tunetoyich ‘Doono Yeerichi shaago’ gettaahote; Beshe Mawe Doono Yeerichi, beeyechi Nuggishoo no Nuggishoochi qaaroon wuuqqiyote.

³⁷ Keemechon ‘Doono Yeeri ama ii neech wochiye? Amoon neech gettiye?’ getiree echebe.

³⁸ Tunebaani ‘Doono Yeerichi shaago’ ittoshi getigaata, ta, ‘Doono Yeerichi shaago gettaahote’ iyaꞌa ta gettaachee ittoshi ‘Doono Yeerichi shaago’ ittoshi itoyich,

³⁹ ittoshin tiijjiree ta aafoochee yugemmo taane; ittoshinaa ittoshi qaabbechinaꞌonoyich ta immeti katemoonoo duppeto tuniyemmo taane.

⁴⁰ Bulli aabooch batteyaani yeelloon, bulli aabee cooneyoon ittoshi toommooch deebemmo taane” iye.