Erimiyaasi 22 - Kafa Linguistics Project

Yihudee Taatee Yareenaꞌoyich Erimiyaasi Gettiti Qaaro

¹ Doono Yeeri ishichiye: “Yihudee taatoo kexooch desh hamiree ebi qaaroon aroochaa gete:

² ‘Daawitichi taatee qeenooch koteti Yihudee taatoocho, neennaa ne iraasheenaꞌona, hini kelloona giyiibeeti ne asheenaꞌoo Doono Yeerichi qaaroon waayebote;

³ Doono Yeeri ishichiye: Kaachi dayinnetoona nallibote; xukketon xuqqiibeeto kishoochee wodiibote; dallaawoon, nihaalloonaa xuumeenon xuqqaahote; wottoo duꞌiyaahote; hini xaaꞌoochoo xalle damoon ukkiyaahote.

⁴ Ebi qaaroyich deꞌa ittoshi getigaata, Daawitichi taatee qeenooch kotemmi taateenaꞌo, hareshoonaa gaarinon yebberee boonoshi iraasheenaꞌonaa boonoshi asheenaꞌona tookki hini kechi kelloona giyemminaꞌone.

⁵ Tunebaani ebi qaaroon waayo ittoshi qayigaata, hini kexo onemmo bi tunoon ta shigoona wogehoye itone’ gete” iye Doono Yeeri.

⁶ Yihudee taatee yareechon Doono Yeeri ishichiye: “Ne, taach Gilaadee showoommi, wottoo Libanoosi guudoommi gaaweto neene; tunebaani shuuꞌi showoommon, koniyoona koteyaani katemoommon neen tuniyemmo taane.

⁷ Ginee qiicoon yechiti bokkeenaꞌon ne toommooch deejjemmo taane; macecikkiti ne yigee mixinaꞌon kuxxemminaꞌone; qaaqqoochoo duppemminaꞌone.

⁸ “Meeti aageteenaꞌo ebi katemee gaꞌoona beshebee, boonoshinaa boonoshina ‘Doono Yeeri ebi ooge katemooch ebiyoommon amoyich tuniihe?’ gettemminaꞌone.

⁹ Boonoshiyoo ‘Boonoshi Nuggishoo Doono Yeerina tookkii boonoshi giyiti wogoon happiꞌi bare nuggisheenaꞌoyich boonoshi goyinnetonaa boonoshi maddetonoyichiye’ gettemminaꞌone” iye.

Shaluumichon Erimiyaasi Gettiti Mooyo

¹⁰ Yihudee asheenaꞌote! Wotteyaachemmo bi tunetoyich, bi shiijjeti showoonoo beegaachemmo bi tunetoyich, Yosiyaasichi bushoo Shaluumich caammeree eefotalli Yosiyaasich eeppaahote; bi qitoyichoo ayiniyaahote.

¹¹ Bi nihoochi xaaꞌooch kereeꞌi taateti, hini xaaꞌoocheenoo kecaa hammiti Yihudee taatoo Yosiyaasichi bushoo Shaluumichon Doono Yeeri ishichiye: “Illa hach wotteyaachemmone;

¹² kecaa bi hammiti showoochaa qitishalli bi gettemmo, hini showoon wochinnoon ciinaachemmone” iye.

Yoyaqiimichon Getteeti Qaaro

¹³ “Bi kexon xuꞌoona, kechi toommeexi bi kexonoo hukkoona, haggii beetoyich, biinoommi bi manoon duuboon shuunii beetoyich, bi aayi gatiyoonoo biich qocaanoyich,

¹⁴ ‘Ta qellich gamini kexon, kechi toommeexi ooge kexon, haggemmo taane’ ii beetoyich, mallee kelloon kichii beetoyich, yigee mixona macecikkii beetoyich, ceelle qalemoonoo huuttii beetoyich, woowo!

¹⁵ Yigee mixona kexon ne hagoyich taateya gabii beetine? Ne nihoo maataanoone? Uyaanoone? Dayinnetechonaa cadiqoona bi tunetoyich bulli mooyo biich gaawetone.

¹⁶ Girechonaa iriteetonochi nalloon nallii beehe; ebich biich gaawee beehe; ebi taan ariyoo toone?” iye Doono Yeeri.

¹⁷ “Tunebaani ne mulloonaa ne aafoona tooqqito, tateyaani gommona gaacoon danoyich, xalle damoon ukkoyich, hukkoonaa xuꞌee shuunoonooch baachiye” iye.

¹⁸ Ebich Doono Yeeri Yihudee taatoo Yosiyaasichi bushoo Yoyaqiimichon ishichii beetone: “ ‘Ye ta manoocho, ye ta maneene!’ getibee, biich shoosheyaachemminaꞌone; woyee ‘Ye ta doonocho, ye ta oogoocho!’ getibee biich shoosheyaachemminaꞌone;

¹⁹ Yerusaalemi katemee uxeree kelloyee maach kichaa duppeyemmone; kuro duukkoommon duukkemmone” iye.

Yerusaalemi Toommooch Iritoo Shaggemmo Tuno

²⁰ Yerusaalemi katemee asheenaꞌote! Ittoshina tookkii shunoon maa beetinaꞌo aalletoyich Libanoos keyiichi cookibote; Bashaanee showooch keyiichishoo ittoshi qaaroon oogichiree uukkibote; Abariimi guudoochaa cookibote.

²¹ Ittoshi deꞌe beemooba Doono Yeeri ittoshich gettiye; tunebaani waayemmon qajjiyote; bushittinoochee tiijjiꞌi ebin tuniihote; bi qaaroon waayeyaano ittoshine.

²² Ittoshi qiddeenaꞌo bullin yongo daammemmone; ittoshina tookkii shunoon maa beetinaꞌo kecaa hammemminaꞌone; ebiyooba ittoshi gondo bullich yeellemmo ittoshine; cooneyemmo ittoshine.

²³ Libanoos kotetinaꞌote! Yigee mixona hakketi kexooch beetinaꞌote! Maaxoo manjeti maachechoommon xuuxo ittoshin yeshiyooba am shaahoon dordollehote.

Yoyakiini Toommooch Yeeri Nallemmi Nalloo

²⁴ “Ta, beeyecho ta tunetoyich, Yihudee taatoo Yoyaqiimichi bushoo Yoyakiino, ne ta qanne kisheexi axxaamittee malletoo ne tunetaanoona aroochee neen kichi duppemmo taane” iye Doono Yeeri.

²⁵ “Ne kashoon qaawii beetinaꞌo kishooch, ne shattaa beetinaꞌo kishooch, Baabloonee taatoo Nabukadinatsori kishoonaa Baabloonee asheenaꞌo kishoonooch beshiiree immemmo taane.

²⁶ Neennaa neen shiyeti ne indeenon ittoshi shiijjeyaani bare showooch curulliyemmo taane; aroochaanoo qitemmo ittoshine.

²⁷ Wottoyich ittoshi qaatiibeeti ebi showooch wotteyaachemmo ittoshine” iye.

²⁸ Tawoo ishichiyo “Hini uro Yoyakiini, hoxeeti tiishe qondoone? Yoyakiini qaaweyaani nuuqqee qiicoone? Biinnaa bi bushiisheenaꞌona boonoshi ariyaani showooch amoyich kecaa daammeeheete?” iyo.

²⁹ Showoocho, showoocho, showoocho! Doono Yeerichi qaaroon waayebe!

³⁰ Doono Yeeri ishichiye: “Hini uroochi yaroochee biich kaamemmi asho, Daawitichi taatee qeenoochoo kotemmo, Yihudee showoochoo taatemmo illa daneyaachemmo bi tunetoyich, ‘Bushaallo, bi yemeenoochoo biich kaameyaani asho’ getiree kooribe” iye.