Erimiyaasi 21 - Kafa Linguistics Project

Yerusaalemi Yecheyeechi Keemo

^1-2 Taatoo Sedeqiyaasi, “Baabloonee taatoo Nabukadinatsori noon kocha ii bi beetoyich, Doono Yeerin nooch qollabe; diqqich Doono Yeeri worganikkiti bi shuunoo bulliyoommona noonna tookki tunaree Nabukadinatsori no waanee bi wottemmoyich tuniyemmone” iꞌi Malikiyichi bushoo Fashuurinaa Maseyaahichi bushoo, qeeshoo Sofoniyaasinon Erimiyaas waan bi daachiihooba, Doono Yeeri bi qaaroon Erimiyaasich deejjitone.

³ Aroochee Erimiyaasi boonoshich ishichiye:

⁴ “Sedeqiyaasich ishichi getote: Israꞌeelee Nuggishoo Doono Yeeri ishichiye: ‘Baabloonee taatoonaa uxeroyee maachaa ittoshin giichiti Baabloonee asheenaꞌonon ittoshi kochiibeeti, ittoshi kisheexi ginee qiicoon ittoshi toommooch wochi ballemmo taane; boonoshin kiciree hini katemee daggooch deebemmo taane.

⁵ Kaaroona, neboona, ooge naxoona, yaggeeti ta kishoona, kupphe ta mochoonoo ittoshin kochemmo taane.

⁶ Hini katemooch beeti asheenaꞌonaa gijjeenaꞌonon bulla yexxemmo taane; kupphe biiyoona qitemminaꞌone.

⁷ Ebiyee gubb, iye Doono Yeeri, Yihudee taatoo Sedeqiyaasinaa bi iraashiiti iraasheenaꞌonon, naxoochee, goraadoonaa shaacoonoochee muricciti asheenaꞌon, Baabloonee taatoo Nabukadinatsorinaa boonoshi kashoon aalliyooch qaawiibeeti boonoshi etteenaꞌonoyich, beshiiree immemmo taane; biyoo boonoshin goraadoona qeccemmone; boonoshich ayinaachemmone; ariqqeyaachemmone; boonoshinoo maaraachemmone’ itone” iye.

⁸ Andoo asheenaꞌoyich ishichi ta gettemmoyich gettiye: “Doono Yeeri ta, ittoshi aafooch kashee gommonaa qitee gommonon qanniito taane.

⁹ Hini katemooch yagimmo goraadoona, shaacoona, biiyoonoo qitemmone; tunebaani ittoshin giichiti Baabloonee asheenaꞌo waan hammiꞌi kishoon immimmo kashoona beeyemmone; bi kashoonoo wodiyemmone.

¹⁰ Deꞌoyich tuneyaanoon gondoyich hini katemoon ciinneto taane, iye Doono Yeeri. Ebi katemoo Baabloonee taatoo kishooch beshiitaa ichemmone; biyoo qaaqqoona michemmone.

Yihudee Taatee Yareenaꞌo Toommooch Nalleeti Nalloo

¹¹ “Yihudee taatee yareenaꞌoyich ishichi gete: ‘Doono Yeerichi qaaroon waayebote:

¹² Daawitichi yareenaꞌote, Doono Yeeri ishichiye: Ittoshi shuunee gondoyich ta kaaro qaaqqoochoommon bi hafaachemmoyich, koniyoona takkoon mawiimmi wottoon bi aaxxeyaachemmoyich, maaddoona nalloon tachibote; xukketi ashoon xuqqiibeeto kishoochee wodibote.

¹³ Bambee tookk koteti Yerusaaleme, gaddee toommeexi shiishe xaqqeene! Ne toommooch tiyeto taane, iye Doono Yeeri. Newoo “Koni waaree taan kindiiyehe? Koni ta gafooch giyehe?” ii beeti neene.

¹⁴ Ne shuuni shuunoommon neen sheeremmo taane; ne shaaroochoo qaaqqoon tuchemmo taane; ebi qaaqqoo bi guudoona beeto bullin maayemmone itone’ gete” iye.