Erimiyaasi 20 - Kafa Linguistics Project

Fashuuri Erimiyaasin Cuchiyoo

¹ Doono Yeerichi yaafee kechi ukkiroo tuneti, Imeerichi bushoo, qeeshoo Fashuuri, ebi mooyon Erimiyaasi keemmii beetaa waayehe.

² Aroochee Fashuuri keemechi Erimiyaasin yexxiye; Doono Yeerichi yaafee kechi dambee Biiniyaamee Kellooch beeti baatee qoqqaannee giindooch qoqqaanniye.

³ Bi decharooba, Fashuuri Erimiyaasin qoqqaanoochee kichiye; ebiyooba Erimiyaasi biich ishichiye: “Doono Yeeri ne shigoon Bulli Xaaꞌooch Keqqoo getishalli Fashuuri geti ceegaachemmone.

⁴ Doono Yeeri ishichiye: ‘Neen, neennaa ne shunechinaꞌonoyich hukkoon tuniyemmo taane; boonoshiyoo ne aafoona beegi ne beetaa boonoshi etteenaꞌochi goraadoona dihemminaꞌone; Yihudee asho bullin Baabloonee taatoo kishooch beshiiree immemmo taane; biyoo qatinaꞌon Baabloonee showooch keci daammemmone; qatinaꞌonoo goraadoona wuxemmone.

⁵ Ebiyoommon wotta katemeechi yaapho bullin, bi hajjoo bullin, gaacechi bi qiico bullinaa Yihudee taateenaꞌochi ginjabeeto bullinon boonoshi etteenaꞌo kishooch beshiiree immemmo taane; boonoshiyoo ebin bogiree Baabloonee showooch daammemminaꞌone.

⁶ Fashuuro! Ne, ne kexooch beetinaꞌo bulliyoo kecaa hammemmo ittoshine; neennaa koote keemoon ne keemmeti ne shunechinaꞌo bullina kecooch hammemmo ittoshine; Baabloonee showooch giyemmo ittoshine; aroochaa qitemmo ittoshine; arooch duukkemmo ittoshine’ ” iye.

Erimiyaasi Doono Yeerin Ittibato

⁷ Doono Yeero, taan dawushihine; tawoo dawusheeto taane; ne tayee kuppho neene; ta toommoochoo giidehine; heeyo bullin cooneehoye; bulliyona taan coonehe.

⁸ Ta gettemmi haddoona cookiyoye; “Hukkoonaa aalloona!” iyaꞌa cookiyoye; Doono Yeerichi qaaro heeyo bulliich ta naaggeyemmonaa ta cooneyemmonoyich tunetone.

⁹ Tawoo “Doono Yeerichi shigoon tiijjaache; bi shigoona yibbaateyaache” ta itaa, bi qaaro ta mulloochaa qaaqqoochoommon, ta shaawushee dagg giyiti qaaqqee gechoommon, taan michiye; ta maacooch ebin oppee yeshona taahito taane, halla mawiihoye.

¹⁰ Meetinaꞌo shaashikkoona “Bulli xaaꞌooch hukkoo beetone; biin taggebote; biin taggebone” ii boonoshi shaashikkee beetaa waayehoye; ta xiboo tunetinaꞌo bulliyoo ta dihoon quyoona “Dawusheyoo qayaachemmone; aroocheenoo biin xoobiyoon hakkemmo noone; nichoon kichemmo noone” iyeete.

¹¹ Tunebaani Doono Yeeri hakkechi ginee naayochoommon taanna tookkiiniye; ebich taan yookkii beetinaꞌo tepheeshalli boonoshi gettemmo, taan xoobiyaachemminaꞌone; boonoshich kaameyaachemmo bi tunetoyich, oogichi yeellemminaꞌone; bulli aabooch batteyaani cooneyoon cooneyemminaꞌone.

¹² Cadiqe ashoon phiree beeggaabeeti, mulloonaa gaboonon ciinnaabeeti, Beshe Mawe Doono Yeero! Ta taggoon neech ta waayiitoyich boonoshi toommooch nichoon ne kichoon beegone.

¹³ Iriteetinaꞌochi kashoon gondeenaꞌo kishoochee bi shiwetoyich, Doono Yeerich shoddebote; Doono Yeerin galletebote.

¹⁴ Ta shiijjeti aabo uppeton tunebe; ta indee taan shiyeti aabo diireyaaye.

¹⁵ “Anaami bushoo neech shiijjetone” ii, ta nihooch mishiraachoon gettiꞌi biin emirikkiti asho uppeton tunebe.

¹⁶ Are asho Doono Yeeri ariqqeyaanoon guuppiti katemoommon tunebe; maaddi eefon, womikka cookoon waayebe.

¹⁷ Ebiyoo ta indee taach maashoon bi tunemmonaa, bi maaco bulli aabooch oogeree bi beeyemmonoyich, maacoochaa taan wuxoo bi qajjitoyichiye.

¹⁸ Xuuxoonaa ayinoonon beegoyich ta yemeeno yeelloona bi ciiremmoyich, amoyich shiijjetote?