Erimiyaasi 2 - Kafa Linguistics Project

Israꞌeeleenaꞌon Doono Yeeri Heeto

¹ Doono Yeeri taach ishichiye:

² “Hamiree Yerusaalemi asheenaꞌochi waamooch awaajjibe; Doono Yeeri ishichiye gete: ‘Bushaa ne beehooba gibeneeti ne tunoon, woꞌee shunoommi ne shunoon, barahoochaa, amoonolla shakkiyaani showoochaa, taan ne dabboon shalligiyoye.

³ Israꞌeeli, Doono Yeeri taach baritine; qaabbe maayi cilloommine; aroon maato bulli xuꞌechon tunee beehe; ebich gonde mooyo bi toommooch waa beehe’ iye Doono Yeeri.”

⁴ Yaaqobichi kechi asheenaꞌonaa Israꞌeelee gumbeenaꞌo bullinote, Doono Yeerichi qaaroon waayebote.

⁵ Doono Yeeri ishichiye: “Ittoshi qaabbechinaꞌo ta waanee boonoshi wokkito, duube mooyon boonoshi dabbito, duubee boonoshi ito, ta waanee amee dayinnetaalli mooyon daneꞌiniye?

⁶ ‘Gibitsee showoochee noon deebiti, shuuꞌi showoona, barahoonaa oppechi showoona, wotta amichaalli showoonaa dunne manderoona, koniyoona aroona besheyaani showoona, arooch asho koteyaani showoonoo, noon yaabiti Doono Yeeri aaye?’ getaaneenaꞌone.

⁷ Arooch beeti maayoonaa gaawe mooyonon ittoshi maayemmoyich, qeemi showooch ittoshin deebehoye. Tunebaani ittoshi giyiꞌi ta showoon eeꞌiihote; ta showoonoo ciigiihote.

⁸ Qeesheenaꞌoo ‘Doono Yeeri aaye?’ getaaneenaꞌone; sheeree dojjechinaꞌoo taan ariyaaneenaꞌone; qeejjechinaꞌoo ta toommooch hukkeheete; keemechinaꞌoo, gaacaalli mooyon dabbiꞌi Baꞌaaloochi shigoona keemoon keemmiyeete.

Bi Ashoon Doono Yeeri Ittibato

⁹ “Ebich ittoshin ittibatemmo taane; ittoshi bushaa bushiisheenaꞌona tookkishoo gajjiteyemmo taane” iye Doono Yeeri.

¹⁰ “Buure showoo Qoophiroos hamiree ciinote; Qedaari wochoon daachiiree gaawichi boshebote; ebiyoommi mooyo tunee ariibeeto gaata beegote!

¹¹ Nuggishoon tuno boonoshi qajjitaanona, boonoshi nuggisheenaꞌon shadditi asheenaꞌo beeteete? Tunebaani ta asheenaꞌo, boonoshich oogoon immeti boonoshi Nuggishoo taan, gaacaalli mooyona shadditinaꞌone.

¹² Shimaayeenaꞌote, ebi mooyon wuche getote; oogichishoo keqqiree qewebote” iye Doono Yeeri.

¹³ “Ta asheenaꞌo gutte gonde mooyon tuniitinaꞌone; ebiyoo, kashee aachi tunoo tuneti taan qajjitinaꞌone; aacon yesho hakkaani, hote oppeenaꞌonoo boonoshi qellich iijjitinaꞌone.

Gibeneeto Tunee Qayichi Gatiyoo

¹⁴ “Israꞌeeli guunona? Woyee kexooch shiijjeti maddechona? Ishigaata amoyich yoohaa yechehe?

¹⁵ Daahereenaꞌo bi toommooch gigeheete; qaaroon oogichiꞌi gigeheete; bi showoonoo shokko echiiheete; bi katemeenaꞌoo micciꞌi ashaalli onoo tuneheete.

¹⁶ Memifisi asheenaꞌonaa Xafinaasi asheenaꞌona ne shimboon caggemminaꞌone.

¹⁷ Ebin ne toommooch ne deebeto, gommona neen yaabiibeeti, ne Nuggishoo Doono Yeerin qayona toone?

¹⁸ Sihoori aacon uyoyich Gibitsee showooch ne hammeto amoon daneyane? Efiraaxisi aacon uyoyich Asooree showooch ne hammeto amoon daneyane?

¹⁹ Ne gondo wochi neen sheeremmone; taan ne qayo wochi neen qallayemmone; ne Nuggishoo Doono Yeeri taan ne qayo, taachoo shaton ne qayo, neech gondoonaa caamoona bi tunoon ariibe” iye Beshe Mawe Nuggishoo Doono Yeeri.

Israꞌeeleenaꞌo Yeerich Goyinneyaache Geto

²⁰ Beshe Mawe Doono Yeeri ishichiye: “Meeti yemeenoyee aafi ne waanjoon tiichehoye; ne cuyoonoo kuxxehoye; tunebaani ne, taach maddoon qajjehine. Yahechichoommon, geppe xaaꞌoo bulliich, waajjechi michi baatoo bulliich qeyehine.

²¹ Ta neen, kaacheti woyine, ibere xalle yaree tuniiꞌa bechiyoye; aabichii duubaꞌa kubbi woyinoon tunenne?

²² Yingaamona ne machetaanona, ne qellich saamunoon ne woddiitaanona, ne axaaxee kiino and beddaahaa ta aafoochiye” iye Doono Yeeri.

²³ “Aabichiree ‘Eeꞌeyaane taane; Baꞌaaloonoo dabbaanee taane’ geton hakkenne? Bambeexi ne gommon ciine; amoon ne tuniito gaatoo shalligibe! Shaafitteti baraheexi gaaleen shaahiti neene.

²⁴ Barahoon doyiti kubbi kureen, bi shaafittehooboo yongoon shungii beetin, shaahiti neene! Bi qaatoochee koni biin wochoon hakkehe? Biin qaawii beetinaꞌo bi goorooba aayaanoon biin daneheete.

²⁵ Gonde gommooch wocoochee ne baatoon kashiibe; ne killoon shachewoona shuukkiyaaye. Tunebaani ne ‘Qajje, wottoon hakkaache; dallaaweenaꞌon ta shunnetoyich, boonoshin dabbi hammemmi taane’ iyine” iye.

Israꞌeeleenaꞌo Sheereyoo

²⁶ Doono Yeeri ishichiye: “Gaayo bi yechehooba bi yeelloommon, Israꞌeelee kechi asheenaꞌo yeellemminaꞌone; boonoshi, boonoshi taateenaꞌo, boonoshi iraasheenaꞌo, boonoshi qeesheenaꞌonaa boonoshi keemechinaꞌona yeellemminaꞌone.

²⁷ Mixon ‘Ne, ta nihoo neene’ xaqqoonoo ‘Taan shiyeto neene’ iyeete. Boonoshi aafoon tuneyaanoon boonoshi gubboon ta waan wochiyeete. Tunebaani boonoshi iritee aabooba ‘Tiyiree noon wodiibe’ iyeete.

²⁸ “Yihudo, ne nuggisheenaꞌo ne katemeenaꞌoommi meetinaꞌone; ne qellich ne shuuneti ebi ne nuggisheenaꞌo and aayeete? Eke boonoshi hakkigaata tiyiree ne iritee aabooba neen wodiibeete.

²⁹ Taanna ittoshi gajjiteebeeto amoyichiye? Ittoshi bulliyona ta toommooch tiyito ittoshine” iye Doono Yeeri.

³⁰ “Ittoshin ta sheerito duubooniye; ta sheeroon deꞌaano ittoshine. Ittoshi goraado shaaceti daaheroochoommon, ittoshi keemechinaꞌon maatone.

³¹ Hini shiijjereenaꞌote, Doono Yeeri ta qaaroon waayebote. Iberoochaa Israꞌeelich shuuꞌi showoo woyee mandere showoo tunetote? Ta asho amoyich ‘No, gawukkoo noone; illa ne waan wotteyaachemmo noone’ iye?

³² Gidiidee bi shashoon, woꞌee bi tahoon battehane? Tunebaani meeti aaboon ta asho taan battetone.

³³ Shunimaayeenaꞌon danoyich oogeti accechi neene. Ebina gonde shuunechi maacheenaꞌoyichona ne gommon dojjiti neene.

³⁴ Gaajjii boonoshi beetaa ne daneyaani, xalleenaꞌo tuneti girechinaꞌochi damoo ne tahoochee danetone. “Ebi bullin tuniichaa,

³⁵ ‘Ta, xallee taane; iberoochaa bi kaaro ta waanee wottetone’ iti neene; ‘Axaaxoon shuuneyaane taane’ ne itoyich, ne toommooch nallemmo taane.

³⁶ Ne gommon shaddoyich ne woccaabeeto amoyichiye? Asoori neen yeelliyoommon Gibitsiyoo neen yeelliyemmone.

³⁷ Ne gibenetinaꞌon Doono Yeeri giishiitoyich, boonoshina neech kaameyaachemmone; ebich ne kishoon ne shimbooch gediree, aroochee kechemmi neene” iye.