Erimiyaasi 19 - Kafa Linguistics Project

Erimiyaasi Qondoon Tiisho

¹ Doono Yeeri taach ishichiye: “Hamiree nuuqqee hachecho waanee qondoon kemebe; asheenaꞌo daggoochee qaabbeenaꞌonaa qeesheenaꞌo daggoochee geenetinaꞌonon neenna tookki daambe.

² Aroochee Gochee Kellee gaꞌooch beeti Hinoomi bushoo bambooch hambe; aroochaa neech ta gettemmi qaaroon gete;

³ ishichishoo gete: ‘Yihudee taateenaꞌonaa Yerusaalem beeti asheenaꞌonote, Doono Yeerichi qaaroon waayebote: Israꞌeelee Nuggishoo Beshe Mawe Doono Yeeri ishichiye: Waayemmon giiremmi gonde mooyon hini xaaꞌooch deebemmo taane.

⁴ Taan qajjiꞌi boonoshinaa boonoshi qaabbechinaꞌona, wottoo Yihudee taateenaꞌo ariyaani bare nuggisheenaꞌoyich ixaanoon shoohona hini xaaꞌoon boonoshi eeꞌitoyich, hini xaaꞌoon xalle ashi damoona boonoshi ceechitoyich,

⁵ boonoshich ta getaanoon, ta yibbaateyaanoon, ta mulloonoo ta gabaanoon, micciibeeti deejjoon tuniiꞌi Baꞌaaloyich boonoshi bushiisheenaꞌon michoyich, geppeexi goyinnee xaaꞌeenaꞌon boonoshi shuunetoyich,

⁶ hini xaaꞌoo Guuree bamboani bi getteyemmo Tofeeti woyee Hinoomi bushoo bamboo wochinnoon bi getteyaachemmi yemeeno woyemmone, iye Doono Yeeri.

⁷ “ ‘Hini xaaꞌoochaa Yihudee asheenaꞌonaa Yerusaalemi katemee asheenaꞌonochi koceyoon happemmo taane; boonoshi asheenaꞌo, goraadoona boonoshi etteenaꞌo aafooch, wottoo boonoshi kashoon qaawii beetinaꞌo kishooch boonoshi dihemmoyich tuniyemmo taane; boonoshi dubenoon shimaajji gaceenaꞌonaa kubbi cooxinaꞌonoyich maayoon tuniiree immemmo taane.

⁸ Hini katemoo wuche, bi getteyemmonaa bi toommooch shenneyemmonoyich tuniyemmo taane; aroona besheebeeto bulli bi toommooch kinditi naxoyich wuche, getibee shennemmone.

⁹ Boonoshi anaami bushiisheenaꞌonaa maache bushiisheenaꞌonochi meenon boonoshi maayemmoyich tuniyemmo taane; boonoshi bulliyona boonoshi etteenaꞌonaa boonoshi kashoon qaawii beetinaꞌonochi xuuxiyoochee tiyitona asho bi giyoochi meenon maayemmone’ itone gete.

¹⁰ “Qondoon neenna tookkii hammiibeeti asheenaꞌo aafoochaa tiishe;

¹¹ boonoshichoo ishichi gete: ‘Beshe Mawe Doono Yeeri ishichiye: Nuuqqee hachechochi qondoo tiisheechi wochinnoon shuunoyich hakkeyaano bi tunoommon, hini asheenaꞌonaa hini katemoonon tiichemmo taane; boonoshi duukkeyemmi bare xaaꞌoo dano bi qajjitoyich, Tofeet duukkeyemminaꞌone.

¹² Ebiyoommon hini xaaꞌoonaa arooch beetinaꞌonochi toommooch tuniyemmo taane, iye Doono Yeeri. Hini katemoonoo Tofeetiyoommon tuniyemmo taane.

¹³ Yerusaalemi katemeexi kexinaꞌonaa Yihudee taateenaꞌo kexinaꞌona, boonoshi kechi toommeexi kexinaꞌoochaa shimaajji xojjeneenaꞌo bullich boonoshi deejjiti, bare nuggisheenaꞌoyich uyee buuroon boonoshi ukkiti kexinaꞌo bulliyoo Tofeeti xaaꞌoochoommon eeꞌeenaꞌo tunemminaꞌone’ itone gete” iye.

¹⁴ Aroochee Erimiyaasi keemoon bi keemmemmoyich Doono Yeeri biin daachiiti Tofeetee waahe; Doono Yeerichi yaafee kechi addibaabooch neexeechi asho bullich ishichiye:

¹⁵ “Israꞌeelee Nuggishoo Beshe Mawe Doono Yeeri ishichiye: ‘Ta qaaroon boonoshi waayee qayoyich mulloon boonoshi babberiitoyich, hini katemoonaa bi gafeenaꞌo bullinochi toommooch ta getteti gonde mooyon deebemmo taane’ itone” iye.