Erimiyaasi 18 - Kafa Linguistics Project

Nuuqqee Hachecho Kexooch Erimiyaasi Hamo

¹ Doono Yeeri taach ishichiye:

² “Tiyiree nuuqqee hachecho kexooch hambe; tawoo aroochaa ta qaaroon neech gettemmo taane” iye.

³ Ebich tawoo deshi nuuqqee hachecho kexooch hammeho; biyoo gengee toommoochaa bi shuunoon shuunee beehe;

⁴ nuuqqoochee bi shuuneebeeti qiico, nuuqqee hachecho kishoochaa duubehe. Nuuqqee hachecho bi shunnito qanna wochiꞌi wochinnoon bare qiico tuniiꞌi shuunehe.

⁵ Aroochee Doono Yeeri taach ishichiye:

⁶ “Israꞌeelee asheenaꞌote, ebi nuuqqee hachecho shuunee beetoommon iberoochaa ittoshin shuuno taan womehe? Nuuqqoo nuuqqee hachecho kishooch beemoommon ittoshi beeto ta kishoochiye.

⁷ Ikke aagetee showoon woyee taatittinoon waaxxemmo, happi aalliyemmo ta tunoon ta awaajjiichaa,

⁸ biichon ta getteti ebi aagetee showoo bi gondoochee bi wottegaata, bi toommooch tuniiya ta gabiti gonde mooyon tuniyaachemmo taane.

⁹ Ebiyoommon wotta ikke aagetee showoon woyee taatittinoon manjiyemmo, wottoo bechemmo ta tunoon ta gettaachaa

¹⁰ ta qaaroonoo waayo qajjiꞌi, gonde mooyon bi tuniigaata, tuniyoyich ta getteti gaawe mooyon tuniyaachemmo taane.

¹¹ Andoo Yihudee asheenaꞌonaa Yerusaalem beeti asheenaꞌonoyich ishichibe: ‘Doono Yeeri ishichiye: Gonde mooyon ittoshi toommooch qanniibeeto taane; gondoonoo ittoshi toommooch gabiibeeto taane; andoo ittoshi bulli ittoshi gonde gommoochee wottebote; ittoshi shuunoonaa ittoshi gommonon kaachibote’ gete!

¹² Tunebaani boonoshi ‘Ebi duuboone; no gaboon dabbemmo noone; no bulli babbere gonde no gaboommona tuniyemmo noone’ gettemminaꞌone” iye.

Israꞌeeleenaꞌo Doono Yeerin Qayo

¹³ Ebich Doono Yeeri ishichiye: “ ‘Aageteenaꞌo daggoochee ebiyoommi mooyon waayeto konine?’ getiree echebote; gidiideyoommi Israꞌeeli oogichii ciigiiti mooyon tuniitine.

¹⁴ Libanoosee guudi toommeexi kecho aallee ariihe? Guudinaꞌoochee kindiibeeti qaaye aaco tahii ariihe?

¹⁵ Tunebaani ta asho taan battetone; duube mooyoyich ixaanoon shookkitone; gommoocheenoo tepheetone; wonnee gommoochee wokkiꞌi, shuuneyaani wuuqqe gommooch shokitone.

¹⁶ Boonoshi naboona boonoshi showoo shokko echeto, wuche getteetoo tunemmone; aroona besheebeeto bulli giireyemmone; bi qelloonoo qeeqqeriyemmone.

¹⁷ Boonoshi etteenaꞌo aafooch, aabi-keyo waanee yongoochoommon, boonoshin shaccemmo taane; aallo boonoshi toommooch shaggimmi aabooba ta gubboonalli ta aafoon boonoshich bekkiyaachemmo taane” iye.

Erimiyaasi Toommooch Asheenaꞌo Koceyoo

¹⁸ Boonoshiyoo “Sheeroo qeeshoo waan, ciico ariyechinaꞌo waan, qaaro keemechinaꞌo waan aalleyaachemmo bi tunetoyich, ittoshi waataa Erimiyaasi toommooch koceebone; ittoshi waataa heciyoona biin yexone; bi qaaroonoo waayaayone” itinaꞌone.

¹⁹ Doono Yeero, ta qolloon waayebe; ta etteenaꞌo yibbaatee beetonoo ellebe.

²⁰ Deꞌoyich gondo wochee beetone? Taach oppoon iijjitinaꞌone. Boonoshi qoodoyich deꞌoon yibbaatoyich, ne kaaroon boonoshi waanee wochoyich, ne aafooch neexeto ta tunoon gabibe.

²¹ Ebich boonoshi bushiisheenaꞌo shaacemmoyich tuniibe; ginooch beshiiree boonoshin imbe; boonoshi mecheenaꞌo bushaalleenaꞌonaa xuumeenaꞌonon tunebeete; boonoshi anaaminaꞌo qitoona aallebeete; boonoshi gurimaasheenaꞌo koyooba goraadoona aallebeete.

²² Taan yeshoyich oppoon boonoshi iijjitoyich, ta baateenaꞌoyichoo shaachoon boonoshi shaachitoyich, diqqoona boonoshi toommooch ginee naayinaꞌon ne deebaa, boonoshi kexoochee cangecho waayeebe.

²³ Tunebaani Doono Yeero, taan wuxoyich ta toommooch boonoshi koceeti koceyoon ariibeeto neene; boonoshi gondoon maariyaahine; boonoshi axaaxoonoo yibixiyaahine; ne aafooch kuuneete; ebi ne kaaroon boonoshi toommooch kindiibe.