Erimiyaasi 17 - Kafa Linguistics Project

Yihudee Asheenaꞌochi Axaaxoonaa Boonoshi Naxeyoona

¹ Doono Yeeri ishichiye: “Yihudee asheenaꞌochi axaaxoo almaazo bi cillooch beeti xuuree feennoona madooch kooroommon boonoshi mulloonaa boonoshi deejjee gudee qaroonochi toommooch kooreetone.

² Boonoshiyoo waajjechi michi baatoonaa genje geppeenaꞌochi toommonooch beeti boonoshi deejjee gudeenaꞌonaa Asheeri misiloona beetoochaa goyinnemminaꞌone.

³ Gaddooch beeti ta guudoocho! Ne gaannoon, ne hajjoo bullin, geppeenaꞌooch beeti ne goyinnee xaaꞌeenaꞌon ne axaaxee naboona ne etteenaꞌo boggemmoyich tuniyemmo taane.

⁴ Newoo neech ta immeti showoon muccemmo neene; ne ariyaani showoochaa ne etteenaꞌoyich ne maddemmoyich tuniyemmo taane; ebiyoo ta kaaro qaaqqoommon bulli aabooch aaxxemmo bi tunetoyichiye” iye.

Yeerin Gibeno

⁵ Doono Yeeri ishichiye: “Ashoon gibeneebeeti, meeno taheton deebo tuniibeeti, bi mulloo Doono Yeer waanee bara wotteti asho, uppeton tunebe.

⁶ Aroo barahooch beeti kuchoommone; gaawe mooyo waataa beegaachemmone. Shuuꞌi xaaꞌooch, ashaalli shokkaache kiikki showooch kotemmone.

⁷ “Doono Yeerin gibeneto, bi gibeno Doono Yeeri tuneto, diireetone.

⁸ Aroo aachi gocooch becheeti, bi cammon aacooch awureebeeti, gaamoo waataa shataani, showoo shuuꞌiyooba keqqaani, bi waamoo waarwaariibeeti, kuxaanoon aafaabeeti mixoommone.

⁹ “Ashi mullo, bulliyee beshe marecho, wottoo oogeti gondoone; ebin koni shalligoo hakkehe?

¹⁰ Asho bullich bi gommi gommoommona, bi shuuni shuunee aafoommona imoyich, Doono Yeeri ta, gaboon huushii, mulloonoo boshaabeeto taane” iye.

¹¹ Tateyaani gommona gaannoon kiciibeeti asho, bi gabexeyaanoon guuppaabeeti akkeyoommone; bi eeni gutte daggaa, ebi gaannoon muccemmone; tuushoo bi tuno ciiroochaa xalla bekkemmone.

¹² No yaafee kexo beeti xaaꞌoo; wonnee tiijjiꞌi hashekkimiti guudi toommooch beeti oogee taatee qeenoommone.

¹³ Israꞌeeleenaꞌochi gibeno Doono Yeero, neen qajjiibeeto bulli yeellemmone; neyee barii beetinaꞌo, kashee xuupho Doono Yeeri neen boonoshi qajjitoyich, buttooch kooreeti shigoochoommon aallemminaꞌone.

Yeeri Biin Gaachemmoyich Erimiyaasi Qollo

¹⁴ Doono Yeero, ta galleto ne tunetoyich taan wodiibe; tawoo wodemmo taane; taan shiwebe; tawoo shiweyemmo taane.

¹⁵ Boonoshiyoo taach “Doono Yeerichi qaaro aaye? Eke and ceene” iyeete.

¹⁶ Qiddoo tuneꞌi neech maddoochee gubb ikaano taane; xuuxee yemeeno boonoshi toommooch woyemmoyich qaataano taane; ebin ne ariyaabeeto neene; ta noonoochee kechito ne aafooch arichetone.

¹⁷ Iritee aabooba ta deebo neene; keqqichechon taach tuneyaahine.

¹⁸ Taan yookkii beetinaꞌo yeellebeete; tunebaani ta yeellayone; boonoshi keqqibeete; tunebaani ta keqqaayone; gonde aaboon boonoshi toommooch deebe; wochi wochishoo boonoshin aalliibe.

Shambetoon Oogiyeecho

¹⁹ Doono Yeeri taach ishichiye: “Hamiree Yihudee taateenaꞌo kechii giyiibeeti kellooch, echeti Yerusaalemi katemee kelleenaꞌoochoo neexebe.

²⁰ Ishichishoo gete: ‘Hini kelloona giyiibeeti Yihudee taateenaꞌo, Yihudee showooch beetinaꞌonaa Yerusaalem beetinaꞌonote, Doono Yeerichi qaaroon waayebote.

²¹ Doono Yeeri ta ishichiyoye: “Shambetooba shaagoon shaagiree Yerusaalemi uxeree kelloona giyaahote; ittoshi qelloon ariibote!

²² Ittoshi qaabbechinaꞌoyich ta gettetoommon shambetoon yaafeeton tuniiree quyebotalli shambetooba shaagoon shaagiree ittoshi kexoochee kechaahote; amoonolla shuuneyaahote.

²³ Tunebaani ittoshi qaabbechinaꞌo ta qaaroon waayeyaaneenaꞌone; boonoshi waamonoo ta waan gaꞌiyaaneenaꞌone; waayeree doyoon ta waanee boonoshi deꞌaachemmoyich boonoshi gajjoon manjiiheete.

²⁴ Taachon ittoshi waayegaata, iye Doono Yeeri, shambetooba hini katemee kelloona shaagoon deebo ittoshi qayigaata, shambetee aaboon yaafeeto tuniiꞌi ittoshi quyegaata, shambetooba shuunoo bullin shuuno ittoshi qayigaata,

²⁵ Daawitichi taatee qeenooch kotemmi taateenaꞌo haresheenaꞌonaa gaarinaꞌonon yebberee hini katemee kelloona giyemminaꞌone; boonoshi, boonoshi iraasheenaꞌo, Yihudee showee asheenaꞌonaa Yerusaalem beetinaꞌona giyemminaꞌone; hini katemoo bulli aabooch ashi beeyi xaaꞌoo tunemmone.

²⁶ Asheenaꞌo, Yihudee katemeenaꞌoochee, Yerusaalemi katemee guudoona beeti gafeenaꞌoochee, Biiniyaamee showoochee, geppee gaadoochee, geppe showoochee, deshi-waani Yihudee showoochee, micciibeeti deejjoon, bare deejjoon, maayi buuroon, ixaanoon, galletee deejjoon, yeshiree, Doono Yeeri ta yaafee kexooch woyemminaꞌone.

²⁷ Tunebaani shambetee aabo yaafeeto tuniitaa bi quyeyemmoyich, shambetee aabooba shaagoon shaagiree ittoshi giyaachemmoyich ta getteton waayo ittoshi qayigaata, Yerusaalemi katemee kelleenaꞌooch qaaqqoon tuchemmo taane; qaaqqoo Yerusaalemi taatee kexinaꞌon maayemmone; tahishoo getaachemmone” itone’ gete” iye.