Erimiyaasi 16 - Kafa Linguistics Project

Naxee Aabo Shago

¹ Doono Yeeri taach ishichiye:

² “Hini xaaꞌooch mecheen shaaggaahine; anaami bushiisheenaꞌonaa maache bushiisheenaꞌonon shiyaahine.

³ Hini xaaꞌooch shiijjemmi anaami bushiisheenaꞌonaa maache bushiisheenaꞌonochon, hini xaaꞌoochaa boonoshin shiyiti indeenaꞌochonaa niheenaꞌochonon, Doono Yeeri ta ishichiyoye:

⁴ Gonde biiyoona qitemminaꞌone. Boonoshich eeppeyaachemmone; dukkeyaachemminaꞌone; showee toommooch guudoochoommon qixeyemminaꞌone; goraadoona, shaacoonoo aallemminaꞌone; boonoshi dubeno shimaajji gaceenaꞌonaa kubbi cooxinaꞌonoyich maayo tunemmone.

⁵ “Ebich Doono Yeeri ta ishichiyoye: Ta diggoon, ta shoodoonaa ta maaroonon hini asheenaꞌo waanee wokkiito ta tunetoyich, eeppi kexooch giyaahine; eefonaa cacheyoonoyich hammaahine.

⁶ Gaannechinaꞌonaa girechinaꞌona hini showoochaa qitemminaꞌone; duukkeyaachemminaꞌone; koniyoona boonoshich eefaachemmone; bi achoonoo garaachemmone; boonoshichoo qelloon cakkeyaachemmone.

⁷ Koniyoona ayiniton goggiyoyich aakkee koshon deebaachemmone; bi nihoo woyee bi indee qititoyich, goggiiya uyoon deebaachemmone.

⁸ “Gifiree kexooch giyiree mamonaa uyonoyich boonoshina tookki koteyaahine.

⁹ Israꞌeelee Nuggishoo Beshe Mawe Doono Yeeri ta ishichiyoye: Ittoshi aafooch, wottoo ittoshi yemeenooch, ililee qaaroonaa emiree qaaroonon, woꞌee kenoochi qaaroonaa woꞌeechi qaaroonon, hini xaaꞌoochee echiyemmo taane.

¹⁰ “Ebi asheenaꞌoyich ebi qaaro bullin ne gettemmona neech: ‘Ebi bulli ooge gonde mooyon Doono Yeeri amoyich no toommooch gettiye? No xuꞌo amoone? No Nuggishoo Doono Yeeri toommooch no shuuneti axaaxoo amoone?’ gettemminaꞌone.

¹¹ Newoo boonoshich ishichibe: ‘Ittoshi qaabbechinaꞌo taan boonoshi qajjitoyichiye, iye Doono Yeeri. Bare nuggisheenaꞌon dabbiyeete; boonoshich maddeheete; goyinneheete; taanoo qajjitinaꞌone; ta sheeroonoo quyeyaaneenaꞌone.

¹² Ittoshiyoo ittoshi qaabbechinaꞌoyee beshe gondoon tuniito ittoshine; ittoshi bulliyolla babbereꞌi ittoshi gonde gaboo waan wotteto ittoshine; taachonoo waayeyaano ittoshine.

¹³ Ebich hini showoochee ittoshinaa ittoshi qaabbechinaꞌona ariyaani showooch ittoshin yugemmo taane; ittoshich ariqqeyaachemmo ta tunetoyich, aroochaa bare nuggisheenaꞌoyich areddoonaa xumoonon maddemmo ittoshine’ gete” iye.

¹⁴ Doono Yeeri ishichiye: “Asheenaꞌo ebiyee bekk: ‘Israꞌeeleenaꞌon Gibitsee kichiti beeyechi Doono Yeeri beege’ boonoshi getaachemmi yemeeno woyemmone.

¹⁵ Tunebaani ‘Israꞌeeleenaꞌon dambi-waaninaa bi yookkiti showoo bullinoochee wochii deebiti beeyechi Doono Yeeri beege’ getteyemmone; tawoo boonoshi qaabbechinaꞌoyich ta immeti boonoshi showooch boonoshin wochemmo taane” iye.

¹⁶ Doono Yeeri ishichiye: “Meeti haashe yesheenaꞌon deejjemmo taane; boonoshiyoo boonoshin yechemminaꞌone; aroyee gubboo meeti aaddeenaꞌon deejjemmo taane; boonoshiyoo guudo bulliichee, geppoo bulliichee, xaqqee gaaho bulliichee boonoshin dabbe yechemminaꞌone.

¹⁷ Boonoshi tuniibeeto bullin beeggaabeeto taane; tayee aashetinaꞌo tooneenaꞌone; boonoshi axaaxolla ta aafoochee aacheeto toonoone.

¹⁸ Ta showoon ciigiiti, dubenoommi boonoshi nuggisheenaꞌona boonoshi eeꞌitoyich, ta iristoon eeꞌeti mooyona boonoshi ceechitoyich, boonoshi xuꞌoonaa boonoshi axaaxoonochi gutte kishoon boonoshich qoccemmo taane” iye.

¹⁹ Ta hakkoo, ta giidoo, iritee aabooboo ta deebo tuneti Doono Yeero, showee tuggoochee aageteenaꞌo ne waan waaree, “No qaabbechinaꞌo kootoon, duube mooyon, boonoshich gaacaani mooyon woraashitinaꞌone” gettemminaꞌone.

²⁰ Asho bi qellich nuggisheenaꞌon shuuno hakkehe? Eboshi nuggisheenaꞌo tooneenaꞌone.

²¹ Ebich Doono Yeeri ishichiye: “Ta boonoshich dojjemmo taane; ebiyooba ta mochoonaa ta hakkoonon boonoshich arichiyemmo taane; boonoshiyoo ta shigo Doono Yeeri tunoon ariyemminaꞌone” iye.