Erimiyaasi 15 - Kafa Linguistics Project

Yihudee Asheenaꞌo Toommooch Shaggemmi Naxo

¹ Aroochee Doono Yeeri taach ishichiye: “Muusinaa Saameelina ta aafooch neexetaanona ta mullo hini asheenaꞌo waan wotteyaachemmone. Ta aafoochee daachiibe; hambeete.

² Boonoshiyoo ‘Amooch hambona?’ iꞌi neen boonoshi echegaata, newoo boonoshich, ‘Doono Yeeri ishichiye: Naxoona qitooch nalleeto naxoona, goraadoona qitooch nalleeto goraadoona, shaacoona qitooch nalleeto shaacoona, qitemmone; kecooch nalleetoo kecceyemmone, itone’ gete.

³ “Aalliyechi awudde mooyinaꞌon boonoshi toommooch deejjemmo taane, iye Doono Yeeri. Eboshiyoo wuxoyich goraadoon, geechoyich kunaaneenaꞌon, mamonaa aalliyoonoyich, shimaajji kafeenaꞌonaa kubbi cooxinaꞌononiye.

⁴ Yihudee taatoo Hiziqiyaasichi bushoo Minaasi, Yerusaalemi daggooch bi tuniiti mooyoyich, showee toommeexi taatittino bulliichaa boonoshi xuuxemmoyich tuniyemmo taane.

⁵ “Yerusaalemi asheenaꞌote, ittoshich ariqqemmo konine? Woyee ittoshich ayinemmo konine? Woyee ittoshi diggittinoon echoyich ittoshi waan wottemmo konine?

⁶ Taan qajjito ittoshine, iye Doono Yeeri. Gubb wottee hammito ittoshine; ebich ta mochoon ittoshi toommooch tiijjiree ittoshin aalliyemmo taane; maariibee taahito taane.

⁷ Ittoshi gonde gommoochee wotto ittoshi qajjitoyich, katemee kello bulliich yooppoona ittoshin shaccehoye; ittoshi bushiishoon wuxaꞌa kishoon tiqqiihoye; ta asho ittoshin aalliihoye.

⁸ Ittoshi xuumeenaꞌochi haddoon, bahareexi qacoyee bi beshemmoyich tuniihoye; gurimaasheenaꞌochi indeenaꞌo waan aalliyechon aabe tukkehaa deeboye; ayinoonaa keqqoonon diqqoona boonoshi toommooch deeboye.

⁹ Shabaattoo shiyeti niretine; bi kasho guutitone; batt areddoo bi beetaa, aabo biich giyitone; yeelletine; cooneenoo itine; boonoshi cureenaꞌonoo goraadooch, boonoshi etteenaꞌo aafooch beshiiree immemmo taane” iye Doono Yeeri.

Bi Ayinoon Erimiyaasi Doono Yeerich Geto

¹⁰ Ta indeene, aakkiya taan shiyetine? Taach woowo! Showoo bullich cagoonaa hayoonoyich tuneto taane; koni waaneenolla eretteyaano taane; konichona erettiyaano taane; tunebaani asho bulli taan uppiye.

¹¹ Doono Yeeri ishichiye: “Iberoochaa deꞌe gaboyich neen shiwemmo taane. Iritee aaboobinaa duꞌee aaboobina ne etteenaꞌo neen yiti qollemmoyich tuniyemmo taane.

¹² “Asho xuuroon tiishon hakkehe? Halla dambi-waanee waati xuuroonaa gooshoonon tiishon hakkehe?

¹³ “Ittoshi showoo bulli toommooch ittoshi shuuneti axaaxoo bullich ittoshi gaannoonaa ittoshi hajjoonon gatiyaalloon ettoyich beshiiree immemmo taane.

¹⁴ Qaaqqoommi ta kaaro ittoshi toommooch kindemmone; ittoshi ariyaanee showoochaa ittoshi etteenaꞌoyich ittoshi maddemmoyich tuniyemmo taane” iye.

¹⁵ Tawoo ishichiyo: “Doono Yeero, ne ariibeeto neene; taan gabibe; gaacheshoo gete! Taan yookkii beetinaꞌo toommooch nichoon kichibe; ne haaꞌiyoon meechoona ta etteenaꞌo taan aalliyemmoyich tuniyaahine; neecha iyaꞌa naagoon ta haaꞌiyoon ariibe.

¹⁶ Beshe Mawe Nuggishoo Doono Yeero, ne shigoona ceekketo taane; ne qaaro danetone; tawoo maato taane; ne qaaroo taach emiroonaa mulleechi ooge emiroonon tunehe.

¹⁷ Emiroona kuufaareebeeti asheenaꞌona tookkii koteyaano taane; wottoo emiraano taane; ta ikkeeto kotehoye; ebiyoo ne kishoo ta toommooch bi tunetonaa ne kaaroona taan ne ceechitonoyichiye.

¹⁸ Amoyich ta biiyo kupphehe? Amoyich ta mayo shokko qajjiꞌi wodaache iye? Qaawooba tahiibeeti woce aacoommon amoyich taach tunenne?” iyo.

¹⁹ Ebich Doono Yeeri ishichiye: “Ne wottegaata, neen wochemmo taane; ta aafoochoo neexemmo neene; qocechi yibbaatoon qocaalloyee bariyaꞌa ne yibbaategaata, ta noonoommon tunemmo neene. Boonoshi ne waan wottebeetani, ne boonoshi waan wotteyaahine.

²⁰ Hini maccoyich neen manje gooshee uxeroon tuniyemmo taane; neen kochemminaꞌone; tunebaani neen wodiyoonaa biishonoyich neenna tookkii ta tunetoyich neen koyi wochaachemminaꞌone, iye Doono Yeeri.

²¹ Gondeenaꞌo kishoochee neen wodiyemmo taane; maacmanjeenaꞌo kishoochee neen biishemmo taane” iye.