Erimiyaasi 14 - Kafa Linguistics Project

Showoo Shuuꞌo

¹ Showee shuuꞌichon Doono Yeeri taach ishichiye:

² “Yihudee showoo eeppiye; bi katemeenaꞌoo shooddeheete; bi macceenaꞌoo showooch kotaachii muusheneheete; Yerusaalemi katemoo oogichii bunnehe.

³ Aricheti bi asheenaꞌo boonoshi maddechinaꞌon aacooch wocheheete; boonoshiyoo aacooch hammiyeete; tunebaani aacon mucceheete; boonoshi qiicoon shokkoon yechiꞌi wotteheete; yeelleheete; cooneeheete; boonoshi aafoon qoreddoona qeriyeete.

⁴ Showooch amiyo dihoo bi qajjitoyich, showoo gaahetoyich, goyechinaꞌo yeelleheete; boonoshi aafoon qoreddoona qeriyeete.

⁵ Ame mocolla bi aalletoyich, doollee bushoon shiyaa, bekkech gaddooch duppaachaa hammahane.

⁶ Gaddi kureenaꞌoo hulloo tuneti geppooch neexetinaꞌone; boqqelloochoommon kashitoon daneya kafeheete; gare mocoon boonoshi muccetoyich, boonoshi aafo tahiye” iye.

⁷ Doono Yeero, gubb wottoon no woddiyoona, axaaxoon ne toommooch shuuneto noone; no axaaxoo no toommooch bi miixetaanona, ne shigoyich noon gaachebe.

⁸ Israꞌeeleenaꞌochi Gibenoocho! Iritee aabooboo boonoshi Wodiyechocho! Showooch dallaawoochoommon; xum qeyi hammemmi gomma beshechoommon ne tunaabeeto amoyichiye?

⁹ Biich yoocheti ashoommon, wodiyoon hakkaani ginee anaamoommon ne tunaabeeto amoyichiye? Tunebaani Doono Yeero, ne andoo no daggooch neene; nowoo ne shigoona ceekketo noone; noon qajjaahine.

¹⁰ Doono Yeeri ebi asheenaꞌoyich ishichii beetone: “Yallyallimoon shunnitinaꞌone; boonoshi baatoon yeshaaneenaꞌone; ebich Doono Yeeri ta boonoshina emiraachemmo taane; boonoshi xuꞌoonoo and gabemmo taane; boonoshi axaaxoonoo naxemmo taane” iye.

¹¹ Doono Yeeri taach ishichiye: “Hini asheenaꞌochi diggittinoyich qolleyaahine;

¹² coomii boonoshi corootitaanona waayeyaachemmo taane; micciibeeti deejjoonaa maayi buuroonon boonoshi giddiiteenolla boonoshi waanee deꞌaachemmo taane; tunebaani goraadoona, shaacoona, biiyoonoo boonoshin aalliyemmo taane” iye.

¹³ Aroochee tawoo ishichiyo “Nuggishoo Doono Yeero, keemechinaꞌo ‘Iberoochaa hini xaaꞌoochaa ittoshich ta immemmo diggoonalli goraadoon beegaachemmo ittoshine; shaacoo ittoshin yeshaachemmone’ itinaꞌone” iyo.

¹⁴ Aroochee Doono Yeeri taach ishichiye: “Keemechinaꞌo kootoon ta shigoona keemmiyeete; boonoshin wocheyaano taane; boonoshich getaano taane; boonoshich yibbaateyaano taane; koote yaaꞌoon, duube qaaxoon, boonoshi mullee dawushoon ittoshich keemmii beetinaꞌone.

¹⁵ Ebich Doono Yeeri ta, ‘Hini showooch goraadoonaa shaacoona waataachemmone’ iꞌi, ta wocheyaanoon ta shigoona keemoon keemiibeeti keemechinaꞌochon ishichiyoye: Ebi keemechinaꞌo goraadoonaa shaacoona qitemminaꞌone.

¹⁶ Keemoon boonoshi keemmiti asheenaꞌoo shaacoonaa goraadoonoochee tiyitona Yerusaalemi gomminaꞌooch yacheyemminaꞌone; boonoshi gondoon boonoshi toommooch woniyemmo ta tunetoyich, boonoshinaa boonoshi mecheenaꞌonon, boonoshi anaami bushiisheenaꞌonaa maache bushiisheenaꞌonon, duukkemmo daneyaachemmone.

¹⁷ “Ebi qaaroon boonoshich ishichi gete: ‘Ta asheenaꞌo, oogichii boonoshi tiishetoyich, qaaꞌi mayona boonoshi yexxetoyich, ta aafo kuxaanoon xumoonaa areddoonon acimoon ukkii beetone.

¹⁸ Gaddooch ta hammemmona, ebiyoche goraadoona qititinaꞌo beeteete; katemooch ta giyemmona, qitooch beddaahaa shaacetinaꞌo beeteete; keemechinaꞌonaa qeesheenaꞌona boonoshi ariyaanee showooch hammitinaꞌone’ itone gete” iye.

Asheenaꞌo Doono Yeerin Manjii Qollo

¹⁹ Doono Yeero, Yihudin ciroona qajjeto neene? Tsiyoonin ciroona shixxeto neene? Wodoon no muccemmooch beddaahaa, amoyich noon yexxenne? Diggoon gibenoona quyehone; tunebaani gaawe mooyo daneyaanoone; wodoon gibenoona quyehone; tunebaani ebiyoche keqqoo tunehe.

²⁰ Doono Yeero, axaaxoon shuunoona neen no xuqqetoyich, no gondoonaa no qaabbechinaꞌochi xuꞌoonon ariibeeto noone.

²¹ Ne shigoyicha geti noon hoxeyaahine; ne oogee qeenon cooniyaahine; noonna tookkii ne giyeti wogoon gabiballi happiyaahine.

²² Iberoochaa aagetee nuggisheenaꞌo daggooch, amiyon dichoon hakkemmo danehe? Woyee shimaayoo amiyon dichoon hakkehe? No Nuggishoo Doono Yeeri ne toono neene? Ebi bullin tuniibeeto ne tunetoyich, no gibenaabeeto neeniye.