Erimiyaasi 13 - Kafa Linguistics Project

Muttee Tuppoochee Shippeti Buroo

¹ Doono Yeeri taach ishichiye: “Hamiree, muttee tuppoochee shippeti buroon keme ne shimetoon cuyebe; tunebaani aacooch haccaahine” iye.

² Ebich tawoo Doono Yeeri taach gettitoommon buroon kemeho; ta shimetoochoo cuyeho.

³ Doono Yeeri wochinnoon taach ishichiye:

⁴ “Ne kemeti, ne shimetooch beeti buroon yeshi tibe; Efiraaxisi aacooch daamiree xaqqee gogginooch aachibe” iye.

⁵ Tawoo Doono Yeeri taach gettitoommon Efiraaxisi aacooch daammaꞌa buroon aachiyo.

⁶ Meeti aaboyee gubb Doono Yeeri taach ishichiye: “Tiyiree Efiraaxisi aacooch hambe; ne aachemmoyich ta getteti buroon aroochee deebe” iye.

⁷ Aroochee tawoo Efiraaxisi aacooch hammaa oppooch ta aachitoochee iijjaꞌa buroon kichiyo; tunebaani buroo duubeꞌi amoyichona gaacaano tunetone.

⁸ Aroochee Doono Yeeri taach ishichiye:

^9-11 “Yihudee asheenaꞌochi geecoonaa Yerusaalemi asheenaꞌochi ooge geecoonon ebiyoommon duubiyemmo taane. Ta qaaroon waayo qajjiibeeti, babbereꞌi boonoshi hajjee gaboo waan wotteebeeti, boonoshich maddoonaa goyinnoonoyich bare nuggisheenaꞌon dabbiibeeti, ebi gonde macceenaꞌo, amoyichona gaacaani ebi buroommon tunemminaꞌone. Buroo ashi shimetooch xaaqqeyoommon, Israꞌeelee kechi asho bullinaa Yihudee kechi asho bullinon taanna xaaqqiyoye; ebiyoo ta ashoon boonoshi tunemmoyich, boonoshina ta shigo arichemmoyich, galleteyemmonaa oogemmonoyichiye; tunebaani boonoshi waayeyaaneenaꞌone, iye Doono Yeeri.

Woyinee Uyee Qondoo

¹² “Ebi qaaroon boonoshich gete: Israꞌeelee Nuggishoo Doono Yeeri ishichiye: ‘Woyinee qondoo bulli woyinee uyoona ceennemmone’ gete. Boonoshiyoo neech, ‘Woyinee qondoo bulli woyinee uyoona bi ceenon neene nooch gettemmo?’ gettemminaꞌone.

¹³ Newoo boonoshich, Doono Yeeri ishichiye: ‘Hini showooch beeto bullin, Daawitichi qeenooch koteton, qeesheenaꞌon, keemechinaꞌon, Yerusaalem koteto bullin, boonoshi mashemmi wottoon woyinee uyoon uchiree cipphayi ceechemmo taane.

¹⁴ Ikkoonaa ikkoonon, niheenaꞌonaa bushiisheenaꞌonon qiciyemmo taane; boonoshin aalliishalli ta gettemmo ariqqeyaachemmo taane; aayinaachemmo taane; maaraachemmo taane’ itone Doono Yeeri, gete” iye.

Erimiyaasi Asheenaꞌon Kupphii Meqqeqqoo

¹⁵ Doono Yeeri gettitoyich, waayebote; waamon tiijjiree ellebote; geeciyaahote.

¹⁶ Manderoon bi deebaan beetaa, mandereti guudinaꞌo toommoochaa ittoshi baateenaꞌo tepheyaan beetaa, gibenoona ittoshi quyeebeeti bekkoon, manderooch, dunne manderoochoo shaddaani bi beetaa, ittoshi Nuggishoo Doono Yeerin oogiibote.

¹⁷ Tunebaani elloon ittoshi qayigaata, ittoshi geecoyich aashoona eeppemmo taane; Doono Yeerichi bageenaꞌo keccetoyich, ta aafoo caame eeppemmone; acimoonoo qapphillemmone.

¹⁸ Doono Yeeri ishichiye: “Taatoonaa taatoochi indee gennee abeetinoyich ishichibe: Ittoshi oogee gubbichoo ittoshi qelloochee kindemmo bi tunetoyich, ittoshi qeenoochee kindibote.

¹⁹ Negeebi katemeenaꞌo hichemminaꞌone; boonoshin qechemmo koniyoona aalloone; Yihudee asheenaꞌo bulla kecceyemminaꞌone; ikkot kecceyemminaꞌone” iye.

²⁰ Yerusaaleme, qaalliree dambi-waanee waa beetinaꞌon ciine; neech icheti bageenaꞌo, mallet gaawe bageenaꞌo aayeete?

²¹ Ne xibeenaꞌo boonoshi tunemmoyich xephona ne yechetinaꞌo guuddii wotteꞌi neen boonoshi hajjigaata, ama getishiye ne gettemmo? Shiyemmi maachechoommon maaxoo neen maataachehe?

²² “Ebi mooyo ta toommooch amoyich shaggiye?” iyaꞌa ne mulloona ne echegaata, ne taho galleeto, giidoona ne yecheeto, ne axaaxee woddoochee tiyitonane.

²³ Iberoochaa Topphiyee asho bi malletoon, maahoo bi shashoon shaddoon hakkehe? Ebi tuno hakkeegaata, gondoon shuuno doyiti ittoshi, gaawe mooyon tuniyoon hakkemmo ittoshine.

^24-25 Doono Yeeri ishichiye: “Ebich barahee yongoona hideebeeti xeeboochoommon ittoshin shaccemmo taane. Taan ne battetoyich, koote mooyon ne gibenetoyich, ne ixoo, neech ta qeelleti qoodoo ebine.

²⁶ Ta qelloona ta, ne tahoon gallemmo taane; ne achoo bekkemmone.

²⁷ Geppeenaꞌonaa gaddeenaꞌonoochaa ne shuuneti ciigiiti shuunoon, shunee ne mamon, ne kaahonaa ne yahoonon beeggeto taane. Yerusaaleme, neech woowo! Ne xalleyaachemmo aati wottooniye?” iye.