Erimiyaasi 12 - Kafa Linguistics Project

Doono Yeerin Erimiyaasi Echo

¹ Doono Yeero, neenna ta taggeti aabo bullin, ne cadiqo neene; tunebaani ne dayinnetee mooyon eke echebona; axaaxechinaꞌochi gommo kaameebeeto amoyichiye? Dawushechinaꞌo bullich beemo gaaweebeeto amoyichiye?

² Boonoshin bechihine; boonoshiyoo careteheete; dicciꞌinoo aafeheete; ne shigoon wochi wochi ceegeetani, boonoshi mullo ne waanee wohone.

³ Tunebaani Doono Yeero, taan ariibeeto neene; taan beeggaabeeto neene; neech ta gabii beeton boshaabeeto neene; basheyemmi bageenaꞌochoommon boonoshin geechi daambe; bashee aaboobich boonoshin bariree kotiibe.

⁴ Showoo shuuqqemmo, gaddeexi mocoo miccemmo, aati wottooniye? Arooch koteti asheenaꞌochi gondoochee tiyitona, gijjeenaꞌonaa yoobbereenaꞌona aalletinaꞌone; ebiyoo asheenaꞌo “Yeeri, no tunii beeton ciinaanoone” boonoshi itoyichiye.

Doono Yeeri Wochiti Wochoo

⁵ Doono Yeeri ishichiye: “Baatoona woccii beetinaꞌona tookkii ne wocaa, neen niriitinaꞌo boonoshi tunegaata, haresheenaꞌona tookki wocon aabichi hakkenne? Xalle gaddoochaa tepheyaꞌa ne dihigaata, Yoordaanoosi kubboochaa amoon tunenne?

⁶ Ne maneenaꞌonaa ne yareenaꞌona neen dawushitinaꞌone; ne aalloochaa ne toommooch tiyii cookee beetinaꞌone; neenna tookkii gaawe noonoona boonoshi yibbaatetaanona, boonoshin gibeneyaahine” iye.

Bi Asheenaꞌochi Xuꞌo Doono Yeerin Ayinikkoo

⁷ Doono Yeeri ishichiye: “Ta kexon qajjeto taane; ta iristoonoo duppeto taane; ta kashoona ta shunnaabeeti maccoon, bi etteenaꞌo kishooch beshiyaꞌa immeto taane.

⁸ Ta hajjee asheenaꞌo kubbooch beeti daaheroommon taach tunetinaꞌone; ta toommooch tiyiꞌi ciddiyeete; ebich boonoshin shixxeto taane.

⁹ Ta hajjee asheenaꞌo, gaceenaꞌo yecha giichiti, kafoon taach shaahiteete. Waaree boonoshi maayemmoyich, hami showee toommeexi cooxinaꞌo bullin kicibote.

¹⁰ Meeti qiddeenaꞌo ta woyinee goyoon aalliitinaꞌone; ta iristoon neexxitinaꞌone; gaawe ta maayi budon shuuꞌi showoon tuniitinaꞌone.

¹¹ Showoon shokko echiitinaꞌone; showoo shuuqqiꞌi shokko echetone; showoo bulli shokkoon echetone; tunebaani ebin mooyooch haddiibeeto koniyoona aalloone.

¹² Baraheexi shokkaache geppeenaꞌo bulliich bokkeenaꞌo waatinaꞌone; Doono Yeerichi goraado, ikke daaroochee tiijjii bare daarooch beddaahaa maabeeto bi tunetoyich, meeno taheto bullich diggoo aalloone.

¹³ Teepphoon shookkiyeete; guccinon qecciyeete; aajjiyeete; tunebaani amoonolla boonoshich gaacaanoone; Doono Yeerichi kupphe kaaroochee tiyitona boonoshi marehooba yeellemminaꞌone” iye.

Israꞌeelee Giyeenaꞌoyich Yeeri Gibenikkiti Gibeno

¹⁴ Doono Yeeri ishichiye: “Ta maccoo tuneti Israꞌeeleenaꞌoyich ta immeti showoon yechiibeeti boonoshi gonde giyeenaꞌo bullin boonoshi showoochee waaxxemmo taane; Yihudee kechi asheenaꞌonoo boonoshi daggoochee shiwemmo taane.

¹⁵ Boonoshin ta waaxxetoyee gubb, wochiree maaremmo taane; boonoshi ikkikkoon boonoshi showoonaa boonoshi hajjoonooch wochiree deebemmo taane.

¹⁶ Baꞌaaloonaa boonoshi wogemmoyich ta asheenaꞌon boonoshi dojjoommon ‘Beeyechi Doono Yeeri beege!’ iꞌi ta shigoona wogoyich, ta macceenaꞌochi gommon boonoshi doyigaata, ebiyooba ta asheenaꞌo daggooch becheeree aaremminaꞌone.

¹⁷ Tunebaani ta getoon waayeyaache boonoshi getigaata are aageteenaꞌon waaxi aalliyemmo taane” iye Doono Yeeri.