Erimiyaasi 11 - Kafa Linguistics Project

Yihudee Asheenaꞌo Wogee Biisho

¹ Doono Yeeri taach gettiti qaaro ebine:

² “Ebi wogee qaaroon waayebe; Yihudee asheenaꞌonaa Yerusaalem beetinaꞌonoyich gete!

³ Boonoshichoo Israꞌeelee Nuggishoo Doono Yeeri ishichiye, gete: ‘Ebi wogee qaaroyich deꞌa getaani asho uppeton tunebe;

⁴ ebiyoo boonoshi qaabbechinaꞌon Gibitsee, xuuroo wocciibeeti gemmoochee ta kichiyooba, “Ta qaaroon waayebote; ittoshich ta getteto bullin tuniibote; ebi tunegaata, ittoshi ta ashoon tunemmo ittoshine; tawoo ittoshi Nuggishoo tunemmo taane” iyaꞌa ta gettetone.

⁵ Ebi tunegaata, ejjoonaa eeyonon xuupphiibeeti showoon, ebiyoo and boonoshi beeti showoon, imoyich boonoshi qaabbechinaꞌoyich ta wogeti wogoon quyemmo taane’ itone gete” iye. Tawoo, “Doono Yeero, ameena” iyo.

⁶ Doono Yeeriyoo taach ishichiye: “Ebi qaaro bullin Yihudee katemeenaꞌonaa Yerusaalemi addibaaboonoochaa ishichi gete: ‘Ebi wogee qaaroon waayebote; ceechishoo getote;

⁷ ittoshi qaabbechinaꞌon Gibitsee ta kichitoochee tiijjii hanaach beddaahaa “Taach deꞌa getote” iyaꞌa wochii wochii kupphii gettehoye;

⁸ tunebaani babberee, boonoshi gonde gaboona hammiyeetani taach deꞌa getaaneenaꞌone; boonoshi waamon ta waan gaꞌiyaaneenaꞌone; wogoon boonoshi quyemmoyich ta getteti getoon waayoon boonoshi qajjitoyich, ebi wogeexi naxoon boonoshi toommooch deebehoye’ itone gete” iye.

⁹ Doono Yeeri taach ishichiye: “Yihudee asheenaꞌonaa Yerusaalem beetinaꞌona waan hukkoo beetone.

¹⁰ Ta qaaroon waayo qajjiti boonoshi qaabbechinaꞌochi axaaxooch wotteheete; boonoshich goyinnoyich bare nuggisheenaꞌon dabbiyeete; Israꞌeelee kechi asheenaꞌonaa Yihudee kechi asheenaꞌona, boonoshi qaabbechinaꞌona tookkii ta giyeti wogoon happiyeete.

¹¹ Ebich Doono Yeeri ta ishichiyoye: ‘Ebiyoche muricon boonoshi hakkaani gonde mooyon boonoshi toommooch deebemmo taane; ta waan cookemminaꞌone; tunebaani ta waayeyaachemmo taane.

¹² Yihudee katemeenaꞌonaa Yerusaalem beetinaꞌona ixaanoon boonoshi shookkiti nuggisheenaꞌo waan hamiree cookemminaꞌone; tunebaani boonoshi iritee aabooba boonoshin ciroona wodiyaachemminaꞌone.

¹³ Yihudee asheenaꞌote, ittoshi nuggisheenaꞌo ittoshi katemeenaꞌoommi meetinaꞌone; ciigiiti mooyoyich, Baꞌaaloyich ixaanoon shookka ittoshi shuuneti deejjee gudeenaꞌo Yerusaalemi gommi haddoommon meetinaꞌone’ iyoye.

¹⁴ “Newoo ebi asheenaꞌoyich corootiyaahine; boonoshi iritooba ta waan boonoshi corootigaata, waayeyaachemmo ta tunetoyich, boonoshi naboyich cookiyaahine, corootishoo gettaahine.

¹⁵ “Ta shuni asheenaꞌo ittoshi gonde mooyon ittoshi tuniitoyee gubb, ta yaafee kexooch danoyich amee aalloo (gooroo) ittoshich beete? Tiikkeshoo woyee deejjee meeno ittoshi gondoon ittoshi waanee aalliyoon hakkehe? Eboshin tuniyoona emiroon hakkehote?

¹⁶ Doono Yeeri ta, ittoshin ‘Gaawe aafoon yuunjiti zayitee mixinaꞌote’ iyaꞌa ceeggehoye; tunebaani and giidechi yubee yongee qaaroommi qaaroon deejjiree bi waamon michemmo taane; bi qaakkoonoo tiichemmo taane.

¹⁷ Israꞌeelee asheenaꞌonaa Yihudee asheenaꞌona ixaanoon Baꞌaaloyich shoohona taan ippiyoyich boonoshi tuniiti gondoyich, ebi zayitee mixon bechiti Beshe Mawe Doono Yeeri ta, aalloon bi toommooch awaajjito taane” iye.

Erimiyaasin Wuxoyich Koceeti Koceyoo

¹⁸ Doono Yeeri ebin ta ariyemmoyich tuniihe; tawoo ariiho; boonoshi gonde mooyonoo taach bekkiihe.

¹⁹ Tunebaani guureyooch hammiibeeti bagee baaddoon shaahiyo; boonoshiyoo “Mixon bi aafoona tookki dichibone; ebiyee bekk bi shigo shalligeyaachemmoyich, kashechinaꞌo beeti showoochee aalliibone” iꞌi ta toommooch boonoshi koceeton ta ariyaano taane.

²⁰ Mulloonaa eengoonon haattiibeeti, kaachiinoo nalliibeeti Beshe Mawe Doono Yeero, ta mooyon neech arichiiho; boonoshi toommooch ne gaaccemmi nichoon beegone.

²¹ “ ‘No kishoona ne qitaachemmoyich, Doono Yeerichi shigoona keemoon nooch keemmaahine’ iꞌi ne kasheen qaawiibeeti, Anaatooti katemee asheenaꞌochon Doono Yeeri ishichiye:

²² Boonoshin naxemmo taane; boonoshi gurimaasheenaꞌo goraadoona qitemminaꞌone; boonoshi anaami bushiisheenaꞌonaa maache bushiisheenaꞌona shaacoona qitemminaꞌone;

²³ boonoshi naxeyemmi natooba, Anaatooti katemee asheenaꞌo toommooch gonde mooyon deebemmo ta tunetoyich, boonoshiichee koniyoona echeyaachemmone” iye.