Erimiyaasi 10 - Kafa Linguistics Project

Shahalloyich Goyinnoonaa Yeerich Goyinnoona

¹ Israꞌeelee kechi asheenaꞌote! Doono Yeeri ittoshich gettiibeeti qaaroon waayebote!

² Doono Yeeri ishichiye: “Aageteenaꞌochi gommon doyiyaahote; aageteenaꞌo shimaajji malleteenaꞌon boonoshi beegigaata, oogichii shattii beetinaꞌone; tunebaani ittoshi shattaahote.

³ Aageteenaꞌochi doyoo duuboone; mixo kubboochee kuchehe; shuunechinaꞌo kishoona qofiyona xareehe.

⁴ Birewoonaa aachoona macecikkiyeete; bi shuuraachemmoyich modooshoonaa misimaaroona xaaqqiyeete.

⁵ Boonoshi shahalleenaꞌo buqqee budooch beeti, kafoon keqqichiibeeti mooyoomminaꞌone; yibbaatoon hakkaaneenaꞌone; shaꞌoon hakkaaneenaꞌo boonoshi tunetoyich shaaggeeheete; gondoon tuneba deꞌoon tuniyoon hakkaaneenaꞌo boonoshi tunetoyich, boonoshin shattaahote” iye.

⁶ Doono Yeero, neen shaahiibeeto koniyoona aalloone; ne oogoo neene; ne shigoo hakkechi oogoone.

⁷ Aageteenaꞌochi Taatoocho, neen shataachemmo konine? Showee toommeexi ariyechinaꞌo bullich, boonoshi taatittino bullichi daggooch, neen shaahemmo aallo bi tunetoyich, oogo neech tunebe.

⁸ Mullaalleenaꞌonaa dookkeenaꞌona tuneꞌinalli, shahalloochee amo doyoo hakkeyehe?

⁹ Qicceti birewoo Tarisheshee, aachoo Ufaazee waahe. Eboshiyoo shuunee ariyechonaa aachee ukkechonochi shuuneenaꞌone; boonoshi taho shimaayitoonaa dameroonane; bulliyona ariyechochi shuuneenaꞌone.

¹⁰ Tunebaani Doono Yeeri ibere Nuggishoone; aroo beeyechi Nuggishoonaa bulli aabee Taatoonane; bi kaaroochee tiyitona showoo qewehe; aageteenaꞌoo bi kaaroon haaꞌiyoon hakkaacheete.

¹¹ Ittoshiyoo boonoshich: “Shimaayoonaa showoonon hallaani ebi nuggisheenaꞌo showoonaa shimaayoyee deshinoochee aallemminaꞌone” gettemmo ittoshine.

Doono Yeerich Giddeti Galleto

¹² Showoon bi hakkoona hallito, bi ariyoona showee tuggeenaꞌon manjiito, bi shalligoona shimaayoon yaggito, biine.

¹³ Bi qaaroon bi waayiimmona aacinaꞌo gumoyee dambaa gugiyeete; biyoo showee tuggoochee qubo qubemmoyich tuniihe; amiyo dihiyooboo xeeyoon xeejjiihe; yongoonoo bi kicee xaaꞌoochee kichiye.

¹⁴ Asho bulli mullaalloonaa tuushoonane; aachee ukkecho bulli bi shuuneti misilee naboona yeelletone; bi shuuneeti misilo kootoone; kasho biich aalloone.

¹⁵ Boonoshiyoo gaacaalleenaꞌonaa cooqqiree shuuneenaꞌonane; nalloo boonoshi toommooch kindimmi aabooba aallemminaꞌone.

¹⁶ Tunebaani Yaaqobichi Nuggishoo boonoshiyoommo toonoone; aroo bulli mooyon hallitone; Israꞌeeliyoo biich bariti maccoone; bi shigoo Beshe Mawe Doono Yeerine.

Yoohaa Aallo Katino

¹⁷ Hini giicheꞌi beetinaꞌote! Ittoshi qiicoon maci kiciree qannibote;

¹⁸ Doono Yeeri ishichiye: “Hini showee toommooch kotetinaꞌon and kichi yugemmo taane; boonoshin bi qaaqqimmi wottoon boonoshin xuuxiyemmo taane” iye.

¹⁹ Ta tiishetoyich taach woowo! Ta mayo wodemmo toonoone; tunebaani ta “Ebi iberoochaa ta mayone; ebin haaꞌiyoo taach qaawiihe” iyo.

²⁰ Ta duukkaanoo happeetone; ta woderoo bulliyoo kuxetone; ta bushiisheenaꞌo ta waanee hammitinaꞌone; illa wotteyaachemminaꞌone; wochinnoon ta duukkaanoon yaggemmo, maccillaateenaꞌonoo xogemmo koniyoona aalloone.

²¹ Qiddeenaꞌo miimeenaꞌo boonoshi tunetoyich, Doono Yeerin echeyaaneenaꞌone; ebich boonoshich kaameyaanoone; boonoshi gijjeenaꞌo bulla shacetinaꞌone.

²² Ebiyoche, gonde woroo waayee beetone! Yihudee katemeenaꞌon shokkoonaa boqqello qeyi xaaꞌoonon tuniyoyich, dambi-waanee giidechi gino waa beetone.

²³ Doono Yeero, ashi beemo bi gabitoommon tunee bi qayon, bi shaaddoon bi daagga yeepho hakkee bi qayonoo, ariibeeto taane.

²⁴ Doono Yeero, taan sheeribe; tunebaani tatoona tunebe; ciroona taan ne aalliyaachemmoyich, kaaroona tunaaye.

²⁵ Yaaqobin boonoshi maatoyich, maaꞌi ciroona boonoshi aalliitoyich, bi xaaꞌoonoo boonoshi happitoyich, neen ariyaani aageteenaꞌo toommooch, ne shigoonoo ceegaaneenaꞌo toommooch, ne kaaroon woniibe.