Erimiyaasi 1 - Kafa Linguistics Project

¹ Biiniyaamee showeexi Anaatooti katemooch beeti qeesheenaꞌoochee ikkoo tuneti Hiliqiyichi bushoo Erimiyaasi gettiti qaaro:

² Yihudee taatoo Amooni bushoo Yosiyaasi taateti aaraa keejjinnee natooch Doono Yeerichi qaaro Erimiyaasich waahe.

³ Ebiyoommon wotta Yihudee taatoo Yosiyaasichi bushoo Yoyaqiimi yemeenooch, Yihudee taatoo Yosiyaasichi bushoo Sedeqiyaasi taateti aaraa ikkinnee natooch, ebiyoo Yerusaalemee asheenaꞌo kecceti uuchinnee agenooch beddaahaa Doono Yeerichi qaaro biich waa beehe.

Erimiyaasi Ceekko

⁴ Doono Yeeri taach ishichiye:

⁵ “Ne indee maacooch neen ta halloyee shiichaa neen ariito taane; ne shiijjoyee shiichaa neen yaafito taane; aageteenaꞌoyich keemecho neen tuniito taane” iye.

⁶ Tawoo “Ta Nuggishoo Doono Yeero, batt bushoo ta tunetoyich aabichi ta yibbaatemmo gaata ariyaano taane” iyo.

⁷ Tunebaani Doono Yeeri taach ishichiye: “Ta wochemmo bulliich hammemmo ne tunetoyich, ta gettemmo bullin gettemmo ne tunetoyich, ‘Batt bushoo taane’ gettaahine.

⁸ Neen wodiyoyich neenna tookki tunemmo ta tunetoyich, asheenaꞌon shattaahine” iye Doono Yeeri.

⁹ Doono Yeeri bi kishoon yaggiꞌi ta noonoon shafehe; aroochee Doono Yeeri taach ishichiye: “Ebiyoche ta qaaroon ne noonooch kotiito taane.

¹⁰ Ne waaxxemmonaa ne happemmonoyich, ne aalliyemmonaa ne guuppemmonoyich, ne haggemmonaa ne bechemmonoyich, aageteenaꞌonaa taatittineenaꞌonochi toommooch, hanaach neen ukkiriito taane” iye.

Keemechoyich Bekketi Gutte Yaaꞌeenaꞌo

¹¹ Doono Yeeri, “Erimiyaaso, amooniye ne ciinnaabeeto?” iye. Tawoo “Luuzee gumbooniye ta ciinnaabeeto” iyo.

¹² Aroochee Doono Yeeri taach ishichiye: “Manjii ciinneto neene; tawoo ta qaaroon ceechiya kupphiyaa ciinnaabeeto taane” iye.

¹³ Doono Yeeri wochinnoon taach, “Amooniye ne ciinnaabeeto?” iye. Tawoo “Qondooch gufiibeeti mooyoniye ta ciinnaabeeto; ebiyoo dambi-waanee hach wottee gaꞌetone” iyo.

¹⁴ Doono Yeeri taach ishichiye: “Dambi-waanee gonde mooyo hini showee toommooch koteto bulli toommooch woyemmone.

¹⁵ Ebiyoche ta, dambi-waan beeti taatee gumbeenaꞌo bullin ceeggemmo taane; bulliyona waaree Yerusaalem giyeebeeti kellooch, uxeree guudo bulliich, Yihudee katemoo bulliich boonoshi taatee qeenon kotiyemminaꞌone.

¹⁶ Ta asheenaꞌo toommooch ta nalloon awaajjemmo taane. Ebiyoo boonoshi shuuneti gondo bullichiye; boonoshiyoo taan qajjiyeete; bare nuggisheenaꞌoyich ixaanoon shookkiyeete; shahalloonoo shuuneꞌi biich goyinneheete.

¹⁷ Tunebaani ne, ne shimetoon cuyebe; tiyi hamiree, neech ta getteto bullin boonoshich gete; boonoshin shattaahine; ne shatigaata, beshoon boonoshich ne shattemmoyich tuniyemmo taane.

¹⁸ Hini showooch beeti asheenaꞌo bulli toommooch, eboshiyoo Yihudee taateenaꞌo, ukkireenaꞌo, qeesheenaꞌonaa macceenaꞌona toommooch, ta hanaach neen manje katemoommon, xuuree giimboommon, gooshee uxeroommonoo tuniito taane.

¹⁹ Neenna koyemminaꞌone; tunebaani neen wodiyoyich neenna tookkii ta tunetoyich ne toommooch wudoo daneyaachemminaꞌone” iye Doono Yeeri.