Efesooni 6 - Kafa Linguistics Project

Bushiisheenaꞌonaa Niheenaꞌonoyich Icheti Ciico

¹ Bushiisheenaꞌote, Doono Yesuusicho ittoshi tunetoyich, ittoshi niheenaꞌonaa ittoshi indeenaꞌonoyich deꞌa getote. Ebiyoo ittoshi tuniiya bede mooyone.

^2-3 “Gaaweto neech bi tunemmoyich, ne kashoo hini showee toommooch bi genjemmoyich, ne nihoonaa ne indeenon oogiibe” ii beeto gibenee qaaro beeti batti batti Yeerichi getoone.

⁴ Niheenaꞌote, Doono Yesuusina ciici dojjibee sheeriree dichibotalli, ittoshi bushiisheenaꞌo ippemmoyich tuniyaahote.

Guuninaꞌonaa Dooninaꞌonoyich Icheti Ciico

⁵ Guuninaꞌote, Kiristoosich ittoshi deꞌa ii beetoommon oogiyoonaa shatona mulloochee tiijjiree ittoshi dooninaꞌoyich deꞌa getote.

⁶ Mulloochee tiijjiꞌi Yeerichi daaggoon tuniibeeti Kiristoosichi guunochoommonalli, ashoon emirikkoyich ashi beꞌenoyich hajjee beeton tuneyaahote.

⁷ Ashich tuneyaanoon Doono Yesuusich ittoshi hajjee beetoommon gaawe ittoshi daaggoona hajjeebote.

⁸ Asho koniyoona guuno bi tunetaa, tuno bi qajjitaa, bi tuniibeeti gaawe mooyo bullich Doono Yesuus waanee gaacoon danemmo bi tunoon ariibeeto ittoshine.

⁹ Dooninaꞌote, miichoon qayiichi, ittoshi guuninaꞌoyich ebiyoommi mooyon tuniibote. Boonoshinaa ittoshinon hajjiibeeti Doono shimaajj bi beemon, ashoon heppaanoon nalliibeeto bi tunoonoo ariibeeto ittoshine.

Gondoochi Giidoon Kochii Wochoo

¹⁰ Illa and, Doono Yesuusinaa bi ooge giidoona kupphebote.

¹¹ Daabiloosichi dawushoon wochoo ittoshi hakkemmoyich, Yeeri ittoshich immiibeeti ginee qiico bullin cuyebote.

¹² No koyaabeeto, shimaajji xaaꞌooch beeti yinnee ginechinaꞌona tookkaa, ukkireenaꞌonaa iraasheenaꞌona tookkaa, hini manderee yemeenooch asheenaꞌon hajjiibeeti gonde ayaaneenaꞌona tookkaanalli, ashoona tookkaa toonoone.

¹³ Ebich gonde mooyo ittoshi toommooch bi shaggimmi aabooba, koyeree bullinoo wochiree, gubb kisheyaanoon neexoon ittoshi hakkemmoyich, Yeeri ittoshich immiibeeti ginee qiico bullin tiijji cuyebote.

¹⁴ Illa ittoshi shimetoon iberoona cuyeree, getee ginee tahoochoommon cadiqoon taheree,

¹⁵ diggee mishiraachee qaaroon getoyich qannoon caammoochoommon gediree neexebote.

¹⁶ Ebiyee beshoon wotta, cobbcobbimii aaxxeebeeti gondoochi nihoo shango bullin aalliyoon ittoshi hakkemmi mullee tooꞌiyoon gaachoochoommon yeshote.

¹⁷ Yeeri immiibeeti wodiyoon xuuree ukoochoommon ukebote. Yaafe Ayaano immiibeeti goraadoonoo yeshote; aroo Yeerichi qaaroone.

¹⁸ Yeerin qollebee bulli aaboon Yaafe Ayaano immiibeeti hakkoona corootibote. Ebi gaboonoo yaafeenaꞌo bullich Yeerin qollebee qaalliree corootoona kupphebote.

¹⁹ Wotta mishiraachee qaaree maacee mooyon aafee kupphoona getoyich ta noonoon ta qechaa qaaroon taach Yeeri immemmoyich qollebote.

²⁰ And cuyee kexooch cuchaꞌa beeto ta tunetaanoona, hini mishiraachee qaaroon getoyich Doono Yesuus Kiristoosina wocheeti yakkirecho taane; ebich biichon geto taach qaawii beetoommon aafee kupphoona ta gettemmoyich corootibote.

Ciireexi Diggiyoo

²¹ Ittoshi wotta aabichaꞌa ta beeto gaata ta beemichon ittoshi ariyemmoyich, shucheti no manoonaa Doono Yesuusichi shuunoyich gibeneeti maddechona tuneti Tikiqoosi bullin ittoshich gettemmone.

²² Ittoshi waan biin wochaa ta daachiibeeti naboo, no mooyon bi getaa ittoshi ariyemmoyich, ittoshi mulloonoo bi goggiyemmonoyichiye.

²³ Nihoo Yeerinaa Doono Yesuus Kiristoosina waanee daneebeeti diggoonaa shunoona, Yeeri toommooch mullee tooꞌiyoona tookki kittinnee maneenaꞌoyich tunebe;

²⁴ shaddeyaani shunoona no Doono Yesuus Kiristoosin shunnii beetinaꞌo bullina tookki Yeerichi wojjoo tunebe.