Efesooni 5 - Kafa Linguistics Project

Bekkoona Beemo

¹ Illa shucheti bushiishoochoommon Yeerin shaahiibeeto tunebote.

² Kiristoosiyoo wotta noon bi shunnitoommon, Yeerin emirikkiibeeti cinnechi buuroommonaa deejjoommonon tuniiꞌi noocha ii bi qelloon beshiiꞌi bi immitoommon, shunoona beebote.

³ Yaafoo tuneti ittoshich tato tuno bi qajjitoyich, yahoonaa eeꞌe mooyo bullina woyee hiriggoo ittoshi daggooch bi beemo ciroona waayeyaaye.

⁴ Ittoshich bi tuniiti mooyo bullich Yeerin galletebotalli, ittoshich tate shuunoo tuneyaani, yeelliibeeti mooyon, bache yibbaatoon woyee gonde naacoon tuniyaahote.

⁵ Ebin ariibote: Shunimaayo woyee eeꞌe shuunecho woyee hiriggecho Kiristoosinaa Yeerinochi taatittinee daggooch iristoon daneyaachemmone; hiriggoo shahalloyich goyinnoommone.

⁶ Eboshi naboona Yeerichi kaaree shiixxoo biich deꞌa getaaneenaꞌo toommooch kindemmone; ebich koniyoona duube yibbaatoona ittoshin dachaaye.

⁷ Illa ebiyoommi asheenaꞌona tookki ikkotteyaahote.

^8-10 Ebiyee aaf manderoo ittoshine; tunebaani and Doono Yesuusina, bekko ittoshine; bekko aafeebeeti aafo deꞌittino, cadiqittinoonaa iberittino bullinane; ebich Doono Yeerin emirikkemmo aabi gaata bariiree, bekkee bushiisheenaꞌochoommon beebote.

¹¹ Aafaalli manderee shuunoona tookki ikkotteyaahote; beshoonoo ebi shuunoon bekkooch kichibote.

¹² Yeerich deꞌa getaani asheenaꞌo aashoona boonoshi tuniibeeti mooyon yibbaatolla yeellii beetone.

^13-14 Bekkiibeeto bulli bekko bi tunetoyich, bulli mooyo bekkooch bi keyigaata, amo bi tuno bekkee beetone. Ebich ikkikkeenaꞌo gettii beetoommon, “Hini tokketaa beetocho, qaallibe; qitoocheenoo tibe! Kiristoosiyoo bi bekkoon neech ceechi bekkiyemmone.”

¹⁵ Illa aabichiree ittoshi beeyemmo gaata ariyoona ittoshi qelloon quyebote. Shalligechinaꞌoommonalli tuusheenaꞌoommon tuneree beeyaahote.

¹⁶ Hini yemeeno gondo bi tunetoyich, shuunoyich kelloon ittoshi danemmi aabo bullin gaaweton shuunebote.

¹⁷ Ebich Doono Yesuusichi daaggoo amo gaata shalligibotalli, mullaalloon tuneyaahote.

¹⁸ Yaafe Ayaano ittoshi kashooch ceenalli, woyinee uyoona masheyaahote; masho bechiibeeto cooneyoochiye.

¹⁹ Shoddoonaa naadoona, Ayaanee shoddoonoo ittoshinaa ittoshina yibbaatebote; Doono Yeerich ittoshi mulloona shoddebote.

²⁰ Tuneti mooyo bullich bulli aaboon no Doono Yesuus Kiristoosi shigoona Nihoo Yeerin galletebote.

Kenoonaa Mecheenoyich Icheti Ciico

²¹ Kiristoosin oogoyicha getiree, ittoshinaa ittoshina ikkoo baroyich hajjeebe.

^22-23 Mecheenaꞌote, Kiristoosi kittinnee guuphochi shimbo bi tunetoommon, biyoo bi ashittinee quumo tuneti kittinnee guuphochi Wodiyecho bi tunetoommon, keno mecheechi shimboone. Ebich Doono Yesuusich ittoshi hajjee beetoommon, ebiyoommon ittoshi keneenaꞌoyich hajjeebote.

²⁴ Kittinnee guupho Kiristoosich bi hajjee beetoommon, ebiyoommon mechee wotta bulli mooyona bi kenoyich hajjeebuye.

²⁵ Keneenaꞌote, Kiristoosi kittinnee guuphon bi shunoommon, biicha iꞌi bi kashoon beshii bi imoommon, ebiyoommon ittoshi mecheenaꞌon shunote.

²⁶ Kiristoosi bi kashoon kittinnee guuphoyich beshiiꞌi bi immito, aacona machii, bi gettiti mishiraachee qaaroona xalliiꞌi yaafoyichiye.

²⁷ Bi yaafitoo, kiinechi woyee qillifa gonde woyee ebin shaahe gonde mooyo bi waan daneyaani, yaafoonaa bachaalloona tuneti oogee yiirechi kittinnee guuphon tuniiꞌi bi waan giddiyoyichiye.

²⁸ Ebiyoommon keno wotta bi hajjee meenon tuniiꞌi bi mecheen shuno bi tuniiya bede mooyone; bi mecheen shunniibeeto bi qellooniye bi shunniibeeto.

^29-30 Koniyoona bi hajjee meenon shixxiibeeto ciroona aalloone; bi ashittinee quumo no tunetoyich, Kiristoosi wotta kittinnee guuphoyich bi tunii beetoommon, asho koniyoona bi hajjee meenon shiimee beetone; quyeenoo beetone.

³¹ Yaafe Macaafoochaa bi getteetoommon, “Ebich asho bi nihoonaa bi indeenon qayiichi bi mecheena tookki ikkoo tunemmone; gutteenaꞌoo ikke meeno tunemminaꞌone.”

³² Ebi wohi maacee mooyone; tunebaani ebin ta gettaabeeto, Kiristoosichonaa kittinnee guuphochonochi shaahiyoon tuniꞌaaniye.

³³ Tunetaa ebi qaaro wotta ittoshichoonane; asho bi ikkikkoona bi mecheen bi qelloommon tuniiree shune; mecheyoo bi kenoon oogiibuye.