Efesooni 4 - Kafa Linguistics Project

Ashittinee Quumee Ikkittino

¹ Illa Doono Yesuusichi maddecho ta tunetoyich, cuchaꞌa beeti ta, Kiristoosi toommooch mulloon ittoshi tooꞌiyemmoyich Yeeri ittoshin bi ceegiyooba bi gettitoommon, mooyo bullina biin emirikkiya biich bedditon tuneree ittoshi beeyemmoyich ittoshin qollaabeeto taane.

² Bulli aaboon qellee giishiyoona, shiimecho tunoona, haaꞌiyoona ittoshinaa ittoshina ikkoo baroon shunibee haaꞌiibote.

³ Ittoshinaa ittoshina diggittinoona yesheree Yeerichi Ayaano immiibeeti ikkittinoon quyoyich kupphebote.

⁴ Yeeri ittoshin bi ceegiyooba ikke gibenoyich bi ceeggitoommon, ittoshi bullich ikke Yaafe Ayaano beetoyich ikke ashittinee quumo ittoshine.

⁵ Ikke Doono, ikke mullee tooꞌiyoo, ikke aacona afaalleyoo beetone;

⁶ bulliyee besho tuneto, bullina shuuneebeeto, bulli waan beeto, bullichoo Nihoo tuneti ikke Nuggishoo beetone.

⁷ Kiristoosi qooditi wojjee woddoommona, no ikkikkoyich wojjoo ichetone.

⁸ Ebich Yaafe Macaafoochaa, “Damba bi keyiyooba kecceti dofeenaꞌon yechiꞌi daammiye; asheenaꞌoyichoo wojjoon immiye” iye.

⁹ Ebi kechiye getochi, ama getone? Shiichiꞌi showee dechi duchooch kinditone getone.

¹⁰ Ebi kindito, bulli xaaꞌooch bi ceennemmoyich shimaayoo bulliyee damba kechitone.

¹¹ Aroo ikkikkeenaꞌo mishiraachechinaꞌo, bareenaꞌo keemechinaꞌo, bareenaꞌo mishiraachee qaaree gettechinaꞌo, bareenaꞌoo qiddeenaꞌonaa dojjechinaꞌona boonoshi tunemmoyich asheenaꞌoyich wojjoon immiye.

¹² Ebin bi tuniito, Kiristoosichi quumo tuneti kittinnee guupho eennemmoyich, yaafeenaꞌon maddee shuunoyich qanniyoyichiye.

¹³ Ebiyoo no bulli Yeeri Bushoo toommooch mullee tooꞌiyoonaa biin ariyoona daneebeeti ikkittinooch shagiree, kachiti ashoon tunoona, bullina Kiristoosin shaahooch no beddemmi wottooniye.

¹⁴ Arooba acona muriciyoyich qanniti asheenaꞌochi dawushee naboona, yongoochoommon shaddeebeeti doyoona wullaawullebee aachi toommooch holliti kokeshoochoommon okk hach tegeggebee gubbich gaggere bushiishoon tuneyaachone.

¹⁵ Ebiyeenoo, iberoon shunoona yibbaatebee shimbo tuneti Kiristoosin shaahoyich bulli mooyona diccemmo noone.

¹⁶ Ashittinee quumo bulli tatoona bi shuunemmoyich tuniibeeto Kiristoosine; quumeenaꞌo bulli gaweto maqqoonane; ebich quumo bi qelli qelloona bi yeshi yeshi shuunoon bi shuunemmona ashittino bulli diccii beetone; shunoonoo eennii beetone.

Kiristoos Waanee Daneebeeti Andire Kasho

¹⁷ Illa Aageteenaꞌo duubeti gaboona boonoshi beemoommon, ebiyee bekk ittoshiyoo ebiyoommon duubeti gaboona ittoshi beetaachemmoyich Doono Yesuusina ittoshin manjii ciiccaabeeto taane.

¹⁸ Boonoshi tuushoonaa mullee muumoonoochee tiyitona boonoshi mullo kaappehe; ebich boonoshiyoo Yeer waanee daneebeeti andire kashoochee wokkiyeete.

¹⁹ Boonoshi gaboona dingiraateꞌi, hiriggiibee eeꞌe shuunoo bullin tuniyoyich yeelliibeeti kaayoyich boonoshi qelloon beshiiꞌi immiyeete.

²⁰ Tunebaani Kiristoosichon ittoshi ariito ebiyoommona toonoone.

²¹ Iberoon biichon waayeto ittoshine; Yesuus waan beeti iberoon biinna tuneꞌi doyito ittoshine.

²² Ebich aafi ittoshi beemon gabibee dachiibeeti qaatoona duubeebeeti wonnee qocoon ittoshi waanee shootote.

²³ Ittoshi gaboonaa ittoshi ayaanoona andirebote.

²⁴ Ibere cadiqittinoonaa yaafittinoona Yeerin shaahoyich halleeti andire ashoon tahebote.

²⁵ Ebich kootoon ittoshi waanee wokkiibote; no bulli ikke ashittinee quumo no tunetoyich, ittoshi ikkikkoona ittoshi maneenaꞌona tookki iberoon yibbaatebote.

²⁶ Ittoshi kaare gaatoona, ebi ittoshi kaaro axaaxooch ittoshin bechiibeeto tunaaye; ittoshi kaaree daggooch aabo giyaaye.

²⁷ Daabiloosichoo kelloon bekkiyaahote.

²⁸ Gaajjiibee echeto ebiyee bekk gaajjaaye; ebi aree qoodoon iriteetoyich qoodi bi immemmo biich beeyemmoyich, bi hajjee kishoona gaaweton aayi shuunebe.

²⁹ Waayee beetinaꞌoyich diiroo tunemmi, asheenaꞌon eenniyemmi, boonoshichoo gaaccemmi gaaweti mooyon getotalli, amee gonde mooyolla ittoshi noonoochee kechaaye.

³⁰ Yeeri ittoshin biishemmi aabo woyemmo tunoon xiishiibeeti yechiyoo, ebiyoo ittoshi toommooch malletoon tuniiꞌi Yeeri gedditi bi Yaafe Ayaanoon ayinikkiyaahote.

³¹ Caamittino, ippo, kaaro, caagoonaa naagoona, gondo bullina tookki ittoshi waanee ciroona wohe.

³² Ittoshinaa ittoshina deꞌoonaa ariqqechona tunebote; Yeeri Kiristoosina ittoshin bi maaritoommon ittoshinaa ittoshina maareebote.