Efesooni 3 - Kafa Linguistics Project

Aageteenaꞌo Daggooch Phawuloosi Shuuneti Shuunoo

¹ Ebich ta Phawuloosi, Kiristoos Yesuusicho ta tunetoyich ta cucheto Aageteenaꞌo ittoshicha iiniye.

² Yeeri ittoshich ta shuunemmoyich ebi maddee shuunoon bi wojjoona taach bi imon iberoon waayeto ittoshine.

³ Shiichaꞌa ebi mooyichon qaminona ta kooritoommon, Yeeri aricheyaani mooyon gaxxiꞌi taach bekkiihe.

⁴ Ebinoo ittoshi shemmegaata aaf aricheyaani, and Kiristoosi ceechiti, Yeerichi gaboon aabichaꞌa ta shalligaabeeto gaata ariyoon hakkiyote.

⁵ Ebiyoo wonnee yemeenooch bare shiijjereenaꞌo waan ashi bushiishoyich aricheyaanoone; tunebaani and yaafeeti bi mishiraachechinaꞌonaa keemechinaꞌonoyich bi Ayaanoona gaxxitone.

⁶ Ebi gaxxeeti mooyoo mishiraachee qaaroona Aageteenaꞌo Ayihudeenaꞌona tookkiꞌi boonoshi woraashoo, ikke ashittino boonoshi tunoonaa Kiristoos Yesuusina Yeeri gibenikkiti gibenee qaaroon tookkiꞌi boonoshi qoodeyoonane.

⁷ Yeeri bi hakkoona bi shuunetoommon taach bi immiti wojjoona mishiraachee qaaroon getoyich Kiristoosichi maddecho tunehoye.

^8-9 Yaafeenaꞌo bulliyee desho taane; tunebaani koniyoona maqqiꞌi ariyoon hakkaani Kiristoosichi wojjeechon Aageteenaꞌoyich ta gettemmoyich, bullinoo halliti Yeeri wonnee yemeenoochee aacheeti, shuuneya bi gabiti mooyo amo gaata asho bullich gaxxi ta gettemmoyich, hini wojjoon taach immiye.

¹⁰ Bi gabiton and kittinnee guupho waanaa bi shuunetaa, meeti baribare bi shalligoon shimaajji xaaꞌooch beeti iraasheenaꞌonaa ukkireenaꞌona ariyemmoyichiye;

¹¹ bulli yemeenoyee aaf Yeeri biich beeti ebi gaboon Kiristoos Yesuusi no Doonona ceechitone.

¹² Kiristoosicho no tunetoyich, bi toommoochoo mulloon no tooꞌitoyich no qolleton Yeeri waayemmo bi tunoon iberiiꞌa bi waan gimoyich aafee kupphittinoon daneto noone.

¹³ Ebich ittoshicha iyaꞌa ta beeggaabeeti iritoona taahiyaahote iyaꞌa ittoshin qollaabeeto taane; ebiyoo Yeerichi oogee yiiroochee ittoshi qoodeyemmi gibenoone.

Kiristoosichi Shuno

^14-15 Ebichi naboyich shimaayoonaa showoonooch beeti yaroo bullin halliti Nihoo Yeeri aafooch gutenaꞌa corootaabeeto taane.

^16-18 Maaci ittoshi ashittino manjemmoyich, Yeeri worganikkiti bi oogoochee bi Ayaanoona giidoon ittoshich bi wojjemmonaa Kiristoosi bi toommooch ittoshi mullee tooꞌiyoona ittoshi mullooch bi beeyemmonoyich, corootaabeeto taane; Yeerinaa ashoonon ittoshi shunnii beetoyich bulli mooyon tuniibee, yaafeenaꞌo bullina tookki Kiristoosichi shunee gamino, gidoo, neexoonaa duchoona ebine getiree ittoshi shalligemmi hakkoo ittoshich bi beeyemmoyich corootaabeeto taane.

¹⁹ Wotta ariyoyee beshiti Kiristoosichi shunoon ittoshi ariyemmoyich, ebina Yeerin ciroona shaahoyich ittoshi beddemmoyich corootaabeeto taane.

²⁰ Illa noonna bi shuuneebeeti bi giidoommon no qollaa beetoyee woyee no gabaabeeto bulliyee beshaa beshiiꞌi tuniyoon hakkiibeeti Yeerich,

²¹ shiijjereenaꞌo bulliich beddaahaa kittinnee guuphonaa Kiristoos Yesuusina waanee bulli yemeenoon oogee yiiroo tunebe. Ameena.