Efesooni 2 - Kafa Linguistics Project

Andire Kashoona Beemo

¹ Ebiyee aaf ittoshi xuꞌoonaa ittoshi axaaxee naboona qititon tuneꞌi beehote.

² Arooba hini alemee asheenaꞌo beeti beemoommon, Yeerich deꞌa getaani asheenaꞌo toommooch and shuuneebeeti ayaanee daaggoommonoo beehote. Ebi ayaanoo yongee toommooch beeti gonde ayaaneenaꞌon hajjiibeeti gonde iraashoone.

³ Arooba ebi asheenaꞌo daggooch no bulli wotta no meechi daaggoommonaa no mullee daaggoommonon tuniyaabee, no meechi qaatoommona beehone; bareenaꞌo bullichoommon wotta Yeerichi kaaree shiixxoo no toommooch kindemmi asho tunaꞌa beehone.

⁴ Tunebaani Yeerichi ariqqo oogichii bi woddetoyich, noon bi shunniti shunee beshoochee tiyitona

⁵ no xuꞌee naboona qitaꞌa no beetaanona, Kiristoosina tookkii nooch kashoon immiye; Yeeri bi wojjoona ittoshin wodiitone.

^6-7 Woyemmi yemeenooch Kiristoos Yesuusina nooch bi bekkiiti deꞌittinoona bulliyee beshiti bi wojjee woddoon bekiiya, Kiristoos Yesuusina noon kashecho tuniiꞌi biinna tookkii qitoochee tiijjiye; shimaajji xaaꞌoochoo biinna tookkii noon kotiihe.

⁸ Bi toommooch ittoshi mullee tooꞌiyoona Yeeri bi wojjoona ittoshin wodiitone; ebiyoo bi immiti wojjoonalli ittoshi shuunoona toonoone;

⁹ koniyoona bi geecaachemmoyich bi shuuneti shuunoona toonoone.

¹⁰ Yeeri halliti halloo noone; Kiristoos Yesuusina and noon bi hallito, shiichiꞌi bi qanniiti gaawe shuunoon shuunebee no beeyemmoyichiye.

Mulloon Kiristoosi Toommooch Tooꞌiitinaꞌoyich Beeti Ikkittino

¹¹ Ebich ittoshi shiichiꞌi ittoshi shiijjeroona Ayihudo tuneyaani Aagetee asheenaꞌote, ashi kishoona dokireetinaꞌo getteeti Ayihudeenaꞌo daggooch dokireyaaneenaꞌo getteetinaꞌote, ebin gabibote:

¹² Aroobee yemeenooba, Yeeri kaacciti Israꞌeeleenaꞌoyee wokkiꞌi, gibenee qaaree wogoyich dallaawoon tuneꞌi, hini alemooch gibenoon mucceꞌi, Yeeri aalli ashoon tuneꞌi, Kiristoosiyee bariꞌinoo beehote.

¹³ Tunebaani ebiyee aaf wokkiꞌi beeti ittoshi, Kiristoos Yesuusina tuneꞌi, Kiristoosichi damoona and katinnito ittoshine.

¹⁴ Ayihudeenaꞌonaa Ayihudo tuneyaaneenaꞌonon, gutteenaꞌon ikkochito, daabboochoommon qoodiꞌi barbariiti kaaroon masqalee toommooch bi qitoona happiꞌi diggoona no beeyemmoyich tuniito, biine.

¹⁵ Biyoo gutteenaꞌon ikkochoona biinna beeti ikke andire ashoon halliꞌi, diggoon tuniyoyich, sheeroona tuggeeti geteenaꞌon aalliihe.

¹⁶ Kaaroonoo masqalooch bi qitoona wokkiiꞌi ebi masqaloona gutteenaꞌon ikkochiꞌi Yeerina tookkii shuniihe.

¹⁷ Ebich waaꞌi Yeer waanee wokkiꞌi beeti ittoshich diggoon, bi waan katinniꞌi beeti Ayihudeenaꞌoyichoo wotta diggoon mishiraacha iꞌi gettiye.

¹⁸ No bulli bi gommona Nihoo Yeer waan ikke Ayaanoona gimon hakkito noone.

¹⁹ Illa ebiyee bekk yaafeenaꞌona tookkii ikke showee ashoonaa Yeerichi kechi ashoona ittoshiyani, dallaawoonaa shiqqoona toono ittoshine.

²⁰ Mishiraachechinaꞌonaa keemechinaꞌona baashiti baashee toommooch hakketo ittoshine; kexon tuuggii neechiibeeti giimbee guummoo Kiristoos Yesuusine.

²¹ Biyoo kexo bullin koceebee Doono Yeerichi yaafee kexo bi tunemmoyich neechii beetone;

²² ittoshiyoo wotta biinna Yeeri bi Ayaanoona beeyemmi kexon tunoyich, bareenaꞌo bullina tookkii hakkeebeeto ittoshine.