Dojjecho 8 - Kafa Linguistics Project

¹ Shalligechi ashoon shaahoo hakkemmo konine? Moochi biishoon ariyemmo konine? Shalligoo ashi aafoon biriihe; ippoon are ashi aafoochee bajjiye.

Taatoyich Deꞌa Geto

² Yeeri biich wogoon bi giyitoyich, taatoochi getoon ne ceechemmoyich neech gettehoye.

³ Taatoo aafoochee wohoyich afaafineyaahine; bi shunnito bullin tuniyoon hakkiibeeto bi tunetoyich, bi toommooch koceyaahine!

⁴ Taatoochi qaaro kuppho bi tunetoyich “Amoyich ebin tuniinne?” geton hakkemmo aalloone.

⁵ Taatoochi getoon ceechiibeeto gonde moochi daggooch bacceyaache; shalligechi asho deconaa gommonon arii beetone.

⁶ Tuneebeeti mooyo bullich deconaa gommona beetone; tunebaani magge iritoo ashi toommooch shaggii beetone.

⁷ Gubb tunemmi mooyon koniyoona ariyaano bi tunetoyich, “Gubb tunemmi mooyo ebine” geton hakkemmo konine?

⁸ Bi kashoon yechii neechoon, woyee bi qitee aaboon shaddoon hakkemmo koniyoona aalloone. Koyo koyee beetaa koniyoona ginoochee wottoon hakkaache; ebiyoommon bi gonde shuunoo gonde ashoon gawukkaache.

⁹ Hini showee toommooch tuneebeeti mooyon shalligaꞌa ebi mooyo bullin beeggeho. Asho giidecho tuneꞌi ashoon xuqqii beetone.

Gonde Asheenaꞌonaa Deꞌe Asheenaꞌonochi Mooyo

¹⁰ Gonde asheenaꞌo worganeeti oogoona duukketaa beeggeho; ebi gonde shuunoon boonoshi shuuneti katemeexi asheenaꞌo boonoshich oogoon immiibee, yaafe xaaꞌoochee daammii duukkiyeete; ebiyoo wotta duuboone.

¹¹ Gondoon shuunee beetinaꞌo toommooch kaatee nalleyoo bi qajjitoyich, asheenaꞌochi mullo gondoon shuunoyich kupphehe.

¹² Axaaxecho balle wottoon gondoon shuuneebee bi eeno genjetaanona, mooyo bi kaamemmo Yeerin shattii beetinaꞌonaa biin oogii beetinaꞌonoyich bi tunoon ariiho.

¹³ Tunebaani gondeenaꞌo Yeerin shato boonoshi qajjitoyich, boonoshich gaaweyaachemmone; boonoshi eeno yagaanoon yiirittoochoommon beshemmone.

¹⁴ Hini showee toommooch tuneebeeti duube mooyo beete: Gonde asheenaꞌo toommooch tun bede mooyo cadiqeenaꞌo toommooch tunehe; deꞌe asheenaꞌoyich tun bede mooyoo gondeenaꞌoyich tunehe; ebiyoo wotta duuboone.

¹⁵ Ashich hini showee toommoochaa mamo, uyonaa emiroonoyee beshe mooyo aallo bi tunetoyich, ebina emiribe iyoye. Ebich Yeeri biich immiti bi kashee yemeeno bulliich bi shuunoona emiroommone.

¹⁶ Shalligoon danoonaa showee toommooch tuneebeeti mooyon ariyoonoyich, xumoon tuneba areddoon tokketeyaani aafoona beeho.

¹⁷ Aroochee Yeerichi shuunoon beeggeho. Hini showee toommooch tuneebeeti mooyon asho koniyoona ariyoon hakkaache; qaawii danoyich bi qiiccetaanona danoon hakkaache. Shalligechi asho “Ebin ariito taane” bi itaanona ciichii ariyoon hakkaache.