Dojjecho 7 - Kafa Linguistics Project

Shalligoo

¹ Gaawe shigo gaawe shittoyee beshiye; qitee aabo shiijjee aaboyee gaawiye.

² Eeppi kexooch hamo, gifiree kexooch hamoyee gaawiye; ebiyoo qitoo heeyaani mooyo bi tunoon, kashecho bullich bi shalligichii beetoyichiye.

³ Ayinoo miicoyee gaawiye; ayinee naboona aafo dabbidabbitaanona, mulloyich gaawetone.

⁴ Shalligechinaꞌochi mullo bi beeto eeppi kexoochiye; tunebaani mullaalleenaꞌochi mullo bi beeto emiree kexoochiye.

⁵ Mullaalleenaꞌochi shoddoon waayoyee, mullechochi kaaree ciicon waayo gaawiye.

⁶ Mullaalleenaꞌochi miico shexxee dechiichaa tatii aaxxeebeeti angichi kakkoommone; ebiyoo duuboone.

⁷ Xuꞌo shalligechi ashoon mullaallo tunii beetone; xucco mulloon xummii beetone.

⁸ Moochi wonnoyee moochi taco gaawiye; geececho tunoyee haaꞌiyecho tuno gaawiye.

⁹ Kaaroochi kote xaaꞌoo, mullaalleenaꞌochi mullo bi tunetoyich, kaaroyich afaafineyaahine!

¹⁰ “Hini yemeenoyee besheti yemeeno aabichii gaawehe!” gettaahine. Ebiyoommi echo tuushe asho ne tunoon bekkiyemmone.

¹¹ Shalligoo gaawetone; iristoon woraashoommone; hini showee toommooch beeti ashich oogeti gaacechone.

¹² Gijjoochoommon shalligoo ashoon buushaaree wodii beetone; ariyee gaaco, shalligoon bi hajjoo tuniiti ashi kashoon bi quyoone.

¹³ Yeerichi shuunoon ciine! Bi xummiiton koni kaachoon hakkehe?

¹⁴ Yemeeno gaawehooba emiribe; yemeeno gondehooboo gaawichi gabibe; hininoo ohinoo tuniito Yeerine; ebich asho gubb tunemmi mooyo amoonolla ariyoon hakkaache.

¹⁵ Hini duube ta kashee yemeenooch bulli mooyon beeggeto taane; cadiqe asho cadiqo bi tunetaanoona kaatee bi qitoon, gonde asho gondo bi tunetaanoona meeti yemeenoon bi beemon beeggeto taane.

¹⁶ Tuuri ne qitaachemmoyich oogeti cadiqoon, oogeti shalligechonoo tuneyaahine!

¹⁷ Aabaalloon ne aalleyaachemmoyich, oogeti gondoon woyee mullaalloon tuneyaahine!

¹⁸ Hininoo ne yesho ohinoo gawukkee ne qayo gaawetone; ebiyoo Yeerin shattii beetoyich kaamemmo bi tunetoyichiye.

¹⁹ Shalligoo mullechi ashoon, katemoon qeejjiibeeti aashire iraasheenaꞌoyee beshe hakkechon tuniihe.

²⁰ Deꞌe mooyon baach shuuneebeeto, axaaxoon shuunee ariyaani cadiqe asho, hini showee toommooch ciroona aalloone.

²¹ Yibbaateebeeti yibbaatoo bullin elle waayeyaahine; ebin ne tuniigaata, ne maddecho neen bi ufi beetaa waayemmo neene.

²² Newoo ne qelloona ashoon ne ufon ne mullo arii beetone.

²³ Ebi bullin shalligoona yexiiho; tawoo “Mullecho tunemmo taane” iyo; tunebaani ebi ta gaboyee damboone.

²⁴ Bulli mooyo shalligoyich oogeti maggoone; ebin hakki shalligemmo konine?

²⁵ Shalligoonaa mooyinaꞌo tuneebeeti naboonon ariyoon qaawii danoonoyich, axaaxoo tuushittino, tuushittino wotta geyo bi tunoon ariyoyich, ta mulloon wochiyo.

²⁶ Qitoyee beshe caame mooyon daneho; ebiyoo maachee ashich olle tunoone; maachee dabbo yeshoommon ashoon yechahane; qoqqaannoo yeshoommonoo ashoon yecha iyane. Yeerin emirikkiibeeti asho ebi ure waanee muricciye; tunebaani axaaxechon ollaa yechahan.

²⁷ Dojjecho ishichiye: “Moochi ciiroon danoyich, ikkoon baroo toommooch daakkoona ta daneto ebine:

²⁸ Ta kashee ebi moochi ciiroon danoyich oogichaa qaatiyane; tunebaani daneyaaneene; ebiyoo, ‘Humeenaꞌo daggoochee ikke anaamon baach danehoye; tunebaani ebi bulli daggoochee ikke maacheen daneyaano taane’ getteetoommone.

²⁹ Ikke mooyon baach ariiho: Yeeri asheenaꞌon kaamoo tuniiꞌi halliye; tunebaani asheenaꞌo wodde acon qaawiyeete” iye.