Dojjecho 5 - Kafa Linguistics Project

Yeerin Shato

¹ Yeerichi kexooch ne giyaa beegaata, ne qelloon ariibe; waayoyich giddo mullaalleenaꞌo giddiibeeti deejjoyee beshoone. Ebi mullaalleenaꞌo boonoshi tuniibeeto gondo bi tunoonolla ariyaaneenaꞌone.

² Ne yibbaatoona afaafineyaahine! Yeeri aafooch amee mooyonona getoyich ne mulloona afaafineyaahine! Yeeri beeto shimaayooch ne beeto showooch bi tunetoyich, ne yibbaatoo giishecho tunebe.

³ Woddiiꞌi gaboo gumon bi guchiyoommon, yibbaatee meeto tuushooch haddiyemmone.

⁴ Yeerich mookkoon ne mookkegaata, ceechaanoon yagiyaahine! Yeeri mullaalli ashoona emiraano bi tunetoyich, ne mookkoon ceechibe!

⁵ Mookkaachaa ceechoo ne qayoyee, ne mookkeyaano gaata gaawiye.

⁶ Ne yibbaatoo neen axaaxooch bi bechemmoyich tuniyaahine! Qeeshoyich “Ta mookketo muriccaꞌaniye” gettaahine! Yeeri ebi ne yibbaatoona kaareree ne shuunoon aalliyemmone.

⁷ Wodde gumonaa wodde yibbaatoona duuboone; ebich Yeerin shate!

Beemo Duubo Tuno

⁸ Ikke showoochaa girecho xukketaa, dayinnetaalloon bi toommooch nalleeꞌi neexaa hajjee bi beetaa ne beegigaata, ebi mooyona worganeyaahine! Iraashoyich biin quyeebeeti, biyee dambee iraashoo beetone; wotta eboshich boonoshin quyeebeeti, boonoshiyee damboo tuneti bare iraashoo beetone.

⁹ Tunebaani showee asho gaacoon bi danemmo, goyoon shunniibeeti taatoo beegaatane.

¹⁰ Gijjoon shunniibeeto, gijjoon miyaachemmone; gaannoon shunniibeeto, shimon danoona digaayeyaachemmone; ebiyoo wotta duuboone.

¹¹ Gaanno woddegaata, maayecho meettiye; aafoona ciinoyee besh, bi doonoyich bi gaaccemmi gaaco amolla aalloone.

¹² Giishechoon mame woyee oogeton, shuunecho gaawichii tokketee qeyii beetone; tunebaani gaannechon bi gaanno tokketoo muccii beetone.

¹³ Hini showee toommoochee ayinikkiti gonde mooyon beeggeho; asheenaꞌo duꞌiyoobich gijjoon kotiiheete;

¹⁴ tunebaani ebi gijjoon diqqoona aalliiꞌi boonoshi bushiishoyich boonoshi woraashiyemmon mucceheete.

¹⁵ Asho bi indee maacoochee shokkaachoon shiijjehe; shokkaachoon bi shiijjetoommon shokkaachoon wottee hammiye. Bi aajjiti mooyoochee amoonolla yechii hamaache.

¹⁶ Ebi wotta ayinikkiti gonde mooyone; asho shokkaachoon shiijjeꞌi shokkaachoon wottee hammiye; bi aajjiibeeto yongoyich bi tunegaata, bi gaaco amoone?

¹⁷ Bi yemeeno bullin manderoo, eefo, ippo, biiyoonaa ayinoona biin giishi beeyemmone.

¹⁸ Ta beeggeti beshe gaawe mooyo bi beegaata, asho hini showee toommoochaa Yeeri biich immiti qamini bi kashee yemeeno bulliich mamo, uyonaa bi aajjitona emiroonane; bi qoodoo ebine.

¹⁹ Yeeri ashich gaannoonaa gijjoonon bi immiibeeto, bi maayemmonaa bi qoodoon bi danemmonoyich, bi aajjiti aayonoo bi emiremmoyichiye; ebiyoo Yeerichi wojjoone.

²⁰ Ebi ashoochi mullooch Yeeri emiroon bi gedditoyich, bi kasheyich woddoon xuuxeyaache.