Dojjecho 3 - Kafa Linguistics Project

Bulli Mooyoyich Gooroo Beemo

¹ Bulli mooyoyich yemeeno beete; showee toommooch tuneebeeti bulli mooyoyich gooroo beete.

² Shiijjoyich gooroo beete; qitoyich gooroo beete; bechoyich gooroo beete; waaxoyich gooroo beete;

³ wuxoyich gooroo beete; wodiyoyich gooroo beete; happoyich gooroo beete; hagoyich gooroo beete;

⁴ eefoyich gooroo beete; miicoyich gooroo beete; goppii eefoyich gooroo beete; shuurii duuboyich gooroo beete;

⁵ xaqqoon dufoyich gooroo beete; xaqqoon kicoyich gooroo beete; tiqqeyoyich gooroo beete; tiqqeyoochee gawukkeyoyich gooroo beete;

⁶ qaawoyich gooroo beete; qaawee qayoyich gooroo beete; kotiyoyich gooroo beete; kichii dufoyich gooroo beete;

⁷ keexoyich gooroo beete; koyoyich gooroo beete; cikkoyich gooroo beete; yibbaatoyich gooroo beete;

⁸ shunoyich gooroo beete; shixoyich gooroo beete; koyoyich gooroo beete; diggoyich gooroo beete.

⁹ Shuunecho bi aayoochee bi danemmi gaaco amoone?

¹⁰ Asheenaꞌo aajjemmoyich Yeeri immiti shuunee maggoon ciinneho.

¹¹ Bulli mooyon bi gooroona malletechon tuniiꞌi shuunehe. Bulli yemeenee mooyon gaboon ashi mullooch kotiihe; tunebaani Yeeri shiichoochee ciirooch beddaahaa bi tuniiton asheenaꞌo ciichii ariyoon hakkaacheete.

¹² Kashoona beechii emiroonaa gaawe mooyon tuniyoonoyee beshe gaawe mooyo ashich aallo bi tunoon ariiho.

¹³ Ebi geto, mamo, uyo, bi aajjitonoo emiroo getone; ebi bulli Yeeri nooch immiti wojjoone.

¹⁴ Yeeri tuniito bulli, bulli yemeenoon beeyecho bi tunoon ariiho; ebichi toommooch amoonolla daakkoo woyee amoonolla shappayoo hakkeyaache; Yeeri ebin bi tuniito asheenaꞌo biin boonoshi shattemmoyichiye.

¹⁵ And tuneebeeto wonna tuneebee echetone; gubb tunemmoo wonna tuneebee echetone. Yeeri wonneechon wochii tuniihe.

Showee Toommooch Beeti Shappe Nalloo

¹⁶ Wottoo hini showee toommooch dayinneto beeyi bede xaaꞌooch axaaxoo beemon, cadiqee shuunoo beeyi bede xaaꞌooch axaaxoo beemon beeggeho.

¹⁷ Tawoo ta mulloona “Mooyo bullinaa shuunoo bullinoyich taajjeeti aabo bi beetoyich, Yeeri cadiqo toommooch tuneba axaaxecho toommooch nallemmone” iyaꞌa gabiyo.

¹⁸ Wochinnoonoo ta mulloona, “Ashi bushiisheenaꞌo cooxo woyee gijjoyee beshaaneenaꞌo boonoshi tunoon boonoshich bekkiyoyich, Yeeri boonoshin phiree beetone” iyaꞌa gabiyo.

¹⁹ Ashi bushiisheenaꞌochi ciiroonaa cooxochi woyee gijjoochi ciiroona ikkoone. Ikkoo qitoommon baroo qitiye. Gutteenaꞌochi kashee hiinnolla shaahoone. Bulliyona duubo bi tunetoyich, asho cooxoyee bi beshiti mooyo aalloone.

²⁰ Bulliyona ikke xaaꞌooch hammemmone. Bulliyona halleeto showoochee bi tunetoyich, showooch wottemmone.

²¹ Ashi kasho damba bi hamon, cooxonaa gijjoonochi kasho desh showooch bi gimon koni ariihe?

²² Illa ebich, asho tuniiya bede beshe mooyo, bi shuuneebeeti shuunoona emiroo bi tunoon beeggeho; bi qoodoo ebi aroone. Bi qititoyee gubb, tunemmi mooyon ariyoon hakkemmo koniyoona aalloone.