Dojjecho 10 - Kafa Linguistics Project

¹ Qititi yaamminaꞌo cinnechi shittoon boonoshi shaaꞌiyoommon, giisheche tuushoo ooge shalligoon giishiihe.

² Shalligechi ashi mullo qannoo waan gaꞌehe; tunebaani mullaalli ashi mullo yoochoo waan gaꞌehe.

³ Mullaalli asho gommona bi shaꞌee beegaata, am shaahoon mullaallo bi gaata asho bullich bekkiihe.

⁴ Ne ukkiroo neen kaarehooba, ne xaaꞌoon gawukkiyaahine! Cikkaa ne haaꞌiyoo oogeti bi ippoon aqqiihe.

⁵ Hini showee toommoochee gonde mooyon beeggeho; ebiyoo ukkireenaꞌo waanee kechiibeeti muricoone.

⁶ Gaannechinaꞌo giishee xaaꞌooch kotetaa, mullaalleenaꞌo oogee xaaꞌooch koteheete.

⁷ Woraaferasheenaꞌo guunochoommon baatoona hammii beetaa, guuninaꞌo hareshoon yebbee hamon beeggeho.

⁸ Oppoon iijjiibeeto arooch dihemmone; uxeroon happii beeton dingero qoppemmone.

⁹ Xaqqoon waaxxiibeeto xaqqoona qaakkemmone; mixon baddeebeetoo mixona mayemmone.

¹⁰ Xuuroo ducaa asho gayiroo qayigaata, wodde giidoon ciichiye; tunebaani shuunee kuxoyich shalligoona shuuno qaawiihe.

¹¹ Qaaxecho qaaxeyaani bi beetaa dingero qofigaata, qaaxechoyich amoonolla gaacaache.

¹² Mullechochi noonoochee kechiibeeti qaaro biin oogiihe; tunebaani mullaalloochi noonoochee kechiibeeti qaaro biin aalliihe.

¹³ Mullaalli asho bi yibbaatoon tuushittinoona wonniꞌi, oogeti geyoona tacciye.

¹⁴ Mullaalli asho yibbaatoon genjiihe; tunebaani gubb tunemmi mooyon ariibeeti asho koniyoona aalloone; bi qititoyee gubb tunemmon gettemmo koniyoona aalloone.

¹⁵ Mullaalli asho shuunoona bi taahitoyich, katemooch daammiibeeti gommon tuushiye.

¹⁶ Bushe taatechi, maaddoona gifiroon geddiibeeti iraashechi showoyich woowo!

¹⁷ Ooge ashi yaroochee tuneti taatechi, mashoyich tuneyaanoon boonoshin bi kupphiyemmoyich, qaawiiti saatooch maa uchiibeeti iraashechi showoo diireetone.

¹⁸ Asho yeexereꞌi kexon qeeroo bi qayigaata, kechi aafoo maac shekirehe; bi kishoona shuuno bi qayigaata, kexoo cottiye.

¹⁹ Gifiroo asho miiccemmoyich tuniihe; woyinee uyoo ashoon emirikkiye. Gijjoo beegaata bulli mooyo beetone.

²⁰ Ne getteton kafeenaꞌo daami kaakkemminaꞌo boonoshi tunetoyich, ne mulloona taatoon uppaahine! Ne gatoochaanoo gaannechon uppaahine!